Me Sauma na iVolatabu
Na Cava a Talai Jisu Mai Kina i Vuravura na Kalou?
Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.
1. A bula tu mai vei o Jisu ni bera ni talai koya mai vuravura na Kalou?
A bula voli mai lomalagi o Jisu me dua na kabula vakayalo ni bera ni mai sucu i Peceliema. E imatai ni ibulibuli ni Kalou qai buli koya sara ga na Kalou. E veiganiti gona me vakatokai me Luve ni Kalou duabau. E dau kilai me nona mata na Kalou ni tu mai lomalagi. Oya na vuna e vakatokai kina me Vosa. E dau veivuke tale ga vua na Kalou qai vakaitavi ena kena buli na ka kece. (Joni 1:2, 3, 14) Ni bera ni buli na kawatamata, a bula vata tu kei na Kalou mai lomalagi o Jisu ena dua na gauna balavu.—Wilika Maika 5:2; Joni 17:5.
2. E talai Luvena vakacava mai vuravura na Kalou?
A vakayagataka o Jiova na yalona tabu me tokitaka na bula i Jisu mai lomalagi ina katonigone i Meri. Koya gona, a sega ni vakaitavi e dua na tama vakayago ena nona kunekunetaki o Jisu. Era vakarogoya na agilosi na nona sucu o Jisu vei ira na ivakatawanisipi era vakatawana tiko na nodra sipi e tuba ena bogi. (Luke 2:8-12) A sega ni sucu gona o Jisu ena gauna e batabata sivia kina na draki, ia kena irairai ni a sucu ena itekitekivu ni vula o Okotova, ena gauna e se katakata kina na draki. Dua na gauna e muri, a kauti Jisu o Meri kei na watina o Josefa ina nona koro e Nasareci me rau lai susugi koya kina. A qaravi Jisu o Josefa me nona gonesusu.—Wilika Maciu 1:18-23.
A papitaiso o Jisu ni voleka ni yabaki 30, qai vakarogoya e matana levu na Kalou ni o Jisu e Luvena. Sa qai tekivu cakava o Jisu na ka sara ga a talai koya mai kina na Kalou.—Wilika Maciu 3:16, 17.
3. Na cava a talai Jisu mai kina i vuravura na Kalou?
A talai Jisu mai vuravura na Kalou me mai veivakavulici ena ka dina. A vakavulica o Jisu na veika me baleta na Matanitu ni Kalou, e dua na matanitu mai lomalagi ena kauta mai na sautu ina vuravura taucoko. E vakarautaka na inuinui ni bula tawamudu. (Joni 4:14; 18:36, 37) A vakavulici ira tale ga na tamata o Jisu ena levu na sala mera kunea kina na marau dina. (Maciu 5:3; 6:19-21) E dau veivakavulici ena ka e cakava. Kena ivakaraitaki, a vakaraitaka na sala me vakayacori kina na loma ni Kalou, ena gauna mada ga e sotava kina na ituvaki dredre. Ni vakararawataki a sega ni sauma lesu.—Wilika 1 Pita 2:21-24.
A vakavulica vei ratou na nona imuri o Jisu na loloma vosota. A marautaka tu e levu na ilesilesi dokai ena nona bula tu mai lomalagi kei Tamana, ia a yalomalumalumu ga qai talairawarawa vei Tamana me mai bula ena kedra maliwa na kawatamata. O Jisu duadua ga na ivakaraitaki uasivi ni loloma.—Wilika Joni 15:12, 13; Filipai 2:5-8.
4. Na cava na yaga ni mate i Jisu?
Na Kalou a talai Jisu tale ga mai vuravura me mai mate ena vuku ni noda ivalavala ca. (Joni 3:16) Eda kawa ivalavala ca kece, kena ibalebale eda sega ni uasivi da qai ivalavala ca. Oya na vuna eda tauvimate kina da qai mate. Ia a uasivi na imatai ni tamata, o Atama. E sega na nona ivalavala ca, a sega tale ga ni dodonu me mate se tauvimate. Ia ena vuku ga ni nona talaidredre a sega tale kina ni uasivi. A vakadewa vei keda o Atama na nona ivalavala ca qai kena isau na mate.—Wilika Roma 5:12; 6:23.
Me vaka ni uasivi o Jisu, a sega ni mate ena vuku ni nona ivalavala ca. E mate ga ena vuku ni noda ivalavala ca. Na nona mate o Jisu eda rawa kina ni marautaka na bula tawamudu, eda na vakila tale ga veivakalougatataki ni Kalou.—Wilika 1 Pita 3:18.