E VAKATAU ENA IYAU NA MARAU KEI NA RAWAKA? E vica vata na milioni e va qori nodra rai. Se mani vakacava na kena veivakaocai, era bolea e levu mera cakacaka me vica vata na aua me rawa ni levu nodra ilavo. Ia ena rawati dina na marau tawamudu ena ilavo kei na iyau? Dikeva mada eso na ka e tukuni me baleta na iyau kei na ilavo.

E tukuna na ivola Journal of Happiness Studies, ni bibi ga me tiko na ka meda bula kina e veisiga. Ke sa tiko ya, sega ni gadrevi me levu noda ilavo meda qai marau. E sega ni ca na ilavo. Ia e kaya na mekesini Monitor on Psychology ni rawa ni vakavuna noda sega ni marau na matamatailavo. Na vakasama qori e tautauvata kei na ivakasala vakaivolatabu a volai ena rauta na rua na udolu na yabaki sa oti: “Ni levu sara na ka ca e vu mai na lomani ni ilavo. Nira vakasaqara qo eso, era . . . sualaka na yagodra taucoko ena levu na mosi.” (1 Timoci 6:9, 10) Na leqa cava soti e rawa ni yaco?

LOMALEQA, SEGA NI MOCE VINAKA. “E kamica na nona moce na dauveiqaravi se mani levu se lailai na ka e kania, ia na levu ni nona iyau na vutuniyau ena dredre kina ni moce.”—Dauvunau 5:12.

RARAWA. E dau vakavu rarawa na nona diva e dua me levu nona ilavo, ia e sega ni yaco na ka e diva tu. “O koya e lomana na siliva ena sega ni lomavakacegu ena siliva, se o koya e lomana na iyau ena kena isau.” (Dauvunau 5:10) Na levu ni nona vinakata na ilavo e dua, e rawa sara ga ni vakawalena na veika ena rawati kina na marau. Kena ivakaraitaki, nona veimaliwai kei ratou nona vuvale, itokani, se nona ituvatuva vakayalo.

LOMABIBI, VUTURI NI YALI SE LUSI NA ILAVO. “Mo kua ni vakaocai iko mo vutuniyau. Mo tu vakadua mo vakaraitaka ni o yalomatua. Ni o wanonova, sa sega e kea, ena tubu sara ga na tabana me vaka na ikeli qai vuka yani i macawa.”—Vosa Vakaibalebale 23:4, 5.

LOMAVAKACEGU. “Nida sega ni kauta mai vuravura e dua na ka, ena sega tale ga ni dua na ka eda kauta tani yani. O koya gona, ke sa tiko na kakana, na isulu, meda lomavakacegu ena veika qo.” (1 Timoci 6:7, 8) O ira era lomavakacegu era sega ni dau vosakudrukudru se didivaka e dua na ka, qori e vukei ira mera kua ni vuvu. Era sega ni nuiqawaqawa se lomaocaoca nira sega ni vinakata e levu na iyau.

LOMASOLI. “E marau vakalevu o koya e solia na ka, vakalailai o koya e taura na ka.” (Cakacaka 20:35) Era dau mamarau o ira era lomasoli nira kila era vakamarautaki ira eso tale ke mani lailai mada ga na ka era cakava se solia. Na ka era vakila kina e sega ni volia rawa na ilavo. Era na lomani, dokai, era na veitokani tale ga kei ira era dau lomasoli!—Luke 6:38.

LOLOMA. “E vinaka na veleti kakana draudrau e tu vata kei na loloma e ca na bulumakau uro e tu vata kei na veicati.” (Vosa Vakaibalebale 15:17) E tukuni tiko e keri ni bibi cake mai na iyau na veilomani. Eda na qai raica ena dua tale na ulutaga ni dua na itovo bibi ena rawati kina na marau na loloma.

E vakadinadinataka o Sabina e dua na marama ni Sauca Amerika na yaga ni kena muri na ivakavuvuli vakaivolatabu. E biuti koya o watina, qai dredre na nona vakarautaka na ka me ratou bula kina vakaveitinani. E rua nona cakacaka, qai yadra e veimataka ena va na kaloko. Ia na nona osooso o Sabina e sega ni tarova na nona vulica na iVolatabu. Na cava e qai yaco?

E sega ni veisau nona bula vakailavo, e veisau ga vakalevu nona rai me baleta na bula! Kena ivakaraitaki, e vakila na marau ni kauaitaka nona bula vakayalo. (Maciu 5:3) E kunea na itokani dina vei ira era vakabauta vata. E marautaka tale ga na yaga ni nona soli ka ni wasea vei ira eso tale na ka sa vulica.

E kaya na iVolatabu: “Ena kilai na vuku ena ka e cakava.” (Maciu 11:19) Io, e yaga dina na lomavakacegu, lomasoli, kei na loloma!