E okati kina nomu

• sega ni vakaceguya totolo nomu gagadre

• lewa vinaka e dua na ka o vinakata vakasauri

• cakava eso na itavi o sega ni taleitaka

• vakaliuci ira eso tale

O ira na gone era lewa matau, e rawarawa nodra vorata na veitemaki kevaka mada ga era kila nira na marautaka vakalekaleka. Ia o ira era sega ni lewa matau, era na rairai

• cudrucudru

• lomabibi

• vakayagataka vakasivia na alakaolo se wainimategaga

• sega ni digia vinaka na ka era kania

E laurai ena dua na vakadidike ni o ira na gone era lewa matau era sega ni tauvimate vakalevu, leqataka na ka vakailavo, se beca na lawa nira sa uabula. E liutaka na vakadidike qori o parofesa Angela Duckworth ena University of Pennsylvania, qai kaya: “E vinaka na itinitini ni lewa matau.”

Ni o kaya na sega, mo dei kina.

IVAKAVUVULI VAKAIVOLATABU: “Me ‘Io’ ga na nomu io, me ‘Sega’ na nomu sega.”—Maciu 5:37.

Era dau vakatovolei ira na itubutubu na gone ena nodra vakacudrucudru, era na rairai cakava qori e matanalevu. Ke soro o itubutubu, ena vakayagataka qori o gone me vakadonui tale na ka e vinakata.

Ia ni vakasega na itubutubu qai dei kina, ena vulica o gone ni na sega ni vakadonui na ka kece e vinakata. E vola e dua na vuniwai o David Walsh ni “o ira na vakavulici va qori era dau marautaka nodra bula. Eda sega ni vukei ira na luveda nida vakavulici ira ni na soli na ka kece era vinakata.” *

Ni o sega ni vakadonuya e dua na ka e vinakata o luvemu, ena rawa ni cakava tale ga qori ke temaki ena dua na gauna me vakayagataka na wainimategaga, veiyacovi ni se bera ni vakawati, se cakava eso na ka ca.

 Vakavulici koya me kila na kena itinitini, ena vinaka se ca.

IVAKAVUVULI VAKAIVOLATABU: “Na ka kece e kaburaka e dua ena tamusuka tale ga.”—Kalatia 6:7.

Me kila o luvemu ni tiko na itinitini ni ka e cakava. Ke sega gona ni lewa matau ena sotava ga na rarawa. Kena ivakaraitaki, ke cudru ni rarawataka e dua na ka, era na yawaki koya e levu. Ia ena taleitaki ke lewa matau qai vosota ni vakacudrui. Vukei koya me kila ni na vinaka nona ivakarau ni bula ke dau lewa matau.

Vakavulici koya ena ka me vakaliuca.

IVAKAVUVULI VAKAIVOLATABU: “Moni vakadeitaka kina na veika era bibi sara.”—Filipai 1:10.

Na lewa matau e sega ni kena ibalebale ga me kua ni caka na ka ca, e okati tale ga kina na kena e veiganiti, ke sega mada ga ni taleitaki se marautaki. E bibi me kila o luvemu na ka bibi kei na ka me vakaliuca, qai dei kina. Kena ivakaraitaki, me cakava e liu na nona lesoni e koronivuli ni bera ni lai qito.

Mo ivakaraitaki vinaka.

IVAKAVUVULI VAKAIVOLATABU: “Na ka au cakava qo e ivakaraitaki vei kemudou, mo dou cakava tale ga na ka au cakava vei kemudou.”—Joni 13:15.

Ena raica tiko o luvemu na ka o cakava ke o sega ni taleitaka e dua na ka. Me laurai ena nomu ivakaraitaki na vinaka ni lewa matau. Kena ivakaraitaki, ke cakava dua na ka ca o luvemu o na lewai iko vakamatau se cudruvaka?