Satáan kpo awoví lɛ kpo nɔ wà nǔ dó gbɛtɔ́ lɛ wu sɔmɔ̌ bɔ Biblu ɖɔ: “Gbɛ̀ ɔ bǐ ka ɖò Mɛnyanya ɔ sín acɛ mɛ.” (1Jaan 5:19) Biblu ɖè ali e nu Satáan nɔ wà nǔ dó gbɛtɔ́ lɛ wu ɖè lɛ é xlɛ́.

•   Mɛblɛblɛ́. Biblu dó wusyɛn lanmɛ nú Klisanwun lɛ ɖɔ ye ni “nɔte ɖò mɔ e awoví nɔ ɖó nú mɛ lɛ nukɔn.” (Efɛzinu lɛ 6:11) Wlɛnwín e é nɔ zán dó blɛ́ mɛ lɛ é ɖokpo wɛ nyí ɖɔ é nɔ bló bɔ mɛ lɛ nɔ ɖi ɖɔ mɛ e ɖò azɔ̌ wà n’i wɛ lɛ é ɔ, mɛsɛntɔ́ Mawu tɔn lɛ wɛ ye nyí nǔgbo.—2 Kɔlɛntinu lɛ 11:13-15.

•   Awovínúwiwa. Satáan nɔ zán kɛnnɛsinɔ lɛ, nǔkantɔ́ lɛ kpo mɛ ɖěɖee nɔ kan amɔɛ alǒ ba dò nú sun sín wuntun lɛ é kpo dó blɛ́ mɛ lɛ. (Sɛ́nflínmɛ 18:10-12) Amasin aɖǐnɔ lɛ zinzan, mɛlulú, kpo wlɛnwín tamɛ lin dó nǔ jí tɔn ɖěɖee nɔ zɔ́n bɔ taglomɛ mɛtɔn nɔ jɛ vɔ̌ lɛ é kpo lɔ nɔ zɔ́n bɔ awoví lɛ nɔ kpé mɛɖé wu.—Luki 11:24-26.

•   Sinsɛn nǔvú. Sinsɛn ɖěɖee nɔ kplɔ́n adingban-núkplɔnmɛ lɛ mɛ lɛ é nɔ sísɛ́ mɛ lɛ bɔ ye nɔ vɛtoli nú Mawu. (1 Kɔlɛntinu lɛ 10:20) Biblu ylɔ́ adingban-núkplɔnmɛ mɔhun lɛ ɖɔ “yɛ nyanya lɛ sín nǔkplɔnmɛ.”—1 Timɔtée 4:1.

•   Yɛ nyanya ɖò mɛ jí. Biblu ɖɔ mɛ e jí yɛ nyanya wá é ɖé lɛ xó. Hweɖelɛnu ɔ, mɛ e jí yɛ nyanya ɖè lɛ é nɔ tɔ́n nukún, nɔ sixu ɖɔ xó ǎ, bo tlɛ nɔ lɛ́ gblewǔ yeɖée.—Matie 12:22; Maki 5:2-5.

Lee è sixu nyi alɔ nú nǔ e Awoví nɔ wà dó mɛ wu lɛ é gbɔn é

 É byɔ ɖɔ ado ni hu we dó wlɛnwín awoví lɛ tɔn lɛ wu ǎ, ɖó Biblu ɖè lee a sixu huzu kpannukɔn Satáan bo ɖu ɖò jǐ tɔn gbɔn é xlɛ́:

•    Nɔ kplɔ́n bo nɔ tuùn wlɛnwín Satáan tɔn lɛ bo na dó “tuùn linlin tɔn lɛ ganji.”—2 Kɔlɛntinu lɛ 2:11.

•    Nɔ kplɔ́n Biblu, bo nɔ zán nǔ e a kplɔ́n lɛ é. Nǔgbododó Biblu tɔn lɛ zinzan na cyɔn alɔ jǐ towe bɔ Satáan na wà nǔ dó wǔ we ǎ.—Efɛzinu lɛ 6:11-18.

•    Bɛ̌ nǔ ɖebǔ e cá kan xá awovínúwiwa é kɔn nyi gbě. (Mɛsɛ́dó 19:19) Han, nǔxixo, wema, xójlawema, ɖiɖe, fɔtóo, kpo video kpo ɖěɖee nɔ flɔ́ zo dó glɔ̌ nú awovínúwiwa lɛ é ɖò nǔ enɛ lɛ mɛ.