“Nyɛbaa miŋɔɔ, nyɛ mɛi fɛɛ ni eetɔ nyɛ, ni nyɛtere jatsui ni tsii, ni mahã nyɛhe ajɔ nyɛ. Nyɛwóa mikɔɔŋtso lɛ nyɛfɔ̃a nyɛnɔ, ni nyɛkasea mi, ejaakɛ mihe jɔ, ni mibaa mihe shi yɛ mitsuiŋ, ni nyɛhe baajɔ nyɛ. Ejaakɛ mikɔɔŋtso lɛ teremɔ waaa, ni mijatsu lɛ etsiii.”​—Mateo 11:28-30, Jeŋ Hee Shishitsɔɔmɔ.

 “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipã lɛ nyɛfɔ̃a nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaaná hejɔɔmɔ nyɛaaha nyɛsusumai lɛ. Ejaakɛ mipã lɛ teremɔ waaa, ni mijatsu lɛ etsiii.”​—Mateo 11:28-30, Ga Biblia momo.

 Yesu jɛ mlihilɛ mli efɔ̃ etoibolɔi lɛ nine koni amɛba eŋɔɔ. Ehã amɛná nɔmimaa akɛ, kɛ́ amɛkase lɛ lɛ amɛbaaná hejɔlɛ ni amɛtsui baanyɔ amɛmli.

 “Nyɛbaa miŋɔɔ, nyɛ mɛi fɛɛ ni eetɔ nyɛ, ni nyɛtere jatsui ni tsii.” Mɛi ni Yesu kɛ ninefɔɔ nɛɛ hã lɛ ji mɛi ni amɛjamɔŋ hiɛnyiɛlɔi lɛ kɛ amɛsusumɔi kɛ gbɔmɛi akitai ni tamɔ jatsui ni tsitsii lɛ eshwie amɛnɔ. (Mateo 23:4; Marko 7:7) No mli lɛ, mɛi nɛɛ ateŋ babaoo ehao, ni amɛkɛ ŋmɛlɛtswai pii tsuɔ nii dani amɛnyɛɔ amɛkwɛɔ amɛhe kɛ amɛwekui lɛ.

 “Mahã nyɛhe ajɔ nyɛ.” Yesu wo mɛi ni kpɛlɛ eninefɔɔ lɛ nɔ shi akɛ, ebaahã amɛhe ajɔ amɛ loo amɛbaaná hejɔɔmɔ. Efee nakai kɛtsɔ bɔ ni eye ebua amɛ ni amɛnu nɔ ni Nyɔŋmɔ taoɔ yɛ amɛdɛŋ lɛ shishi lɛ nɔ. (Mateo 7:24, 25) Enɛ ni etsɔɔ amɛ lɛ hã amɛye amɛhe kɛje susumɔi ni ejaaa kɛ jamɔŋ amale tsɔɔmɔi ni eŋɔ amɛ nom lɛ ahe. (Yohane 8:31, 32) Eyɛ mli akɛ ebi hiɛmiamɔ dani amɛnyɛ amɛkase Yesu tsɔɔmɔi lɛ ni amɛkɛtsu nii yɛ amɛshihilɛ mli, shi nakai ni amɛfee lɛ, hã amɛhe jɔ amɛ.

 “Nyɛwóa mikɔɔŋtso lɛ nyɛfɔ̃a nyɛnɔ, ni nyɛkasea mi.” Yɛ Biblia beiaŋ lɛ, bei pii lɛ, nitsulɔi kɛ tso fɔ̃ɔ amɛkɔɔŋ ni amɛkɛholeɔ jatsui ni tsiitsii. No hewɔ lɛ, wiemɔ ni ji “kɔɔŋtso” lɛ tsɔɔ akɛ mɔ ko aba ehe shi ehã mɔ kroko ni ebo egbɛtsɔɔmɔi kɛ efamɔi atoi. (3 Mose 26:13; Yesaia 14:25; Yeremia 28:4) Abaanyɛ atsɔɔ “nyɛkasea mi” lɛ hu shishi akɛ, “nyɛbatsɔmɔa (mikaselɔi) loo sɛɛnyiɛlɔi.” No hewɔ lɛ, no mli lɛ, Yesu miiwo etoibolɔi lɛ hewalɛ ni amɛbatsɔmɔ ekaselɔi kɛtsɔ esɛɛ ni amɛbaanyiɛ kɛ enɔkwɛmɔnɔ lɛ ni amɛbaakase lɛ nɔ.​—Yohane 13:13-15; 1 Petro 2:21.

 “Nyɛhe baajɔ nyɛ.” Yesu wooo amɛ shi akɛ amɛnaagbai lɛ fɛɛ asɛɛ baafo amrɔ nɔŋŋ. Kɛ̃lɛ, Yesu ye ebua etoibolɔi lɛ ni amɛná hiɛnɔkamɔ kɛ miishɛjemɔ. (Mateo 6:25-32; 10:29-31) Mɛi ni batsɔmɔ Yesu kaselɔi, ni amɛkpɛlɛ etsɔɔmɔi lɛ anɔ lɛ bana akɛ Nyɔŋmɔ jamɔ jeee jatsu, shi moŋ ehãa mɔ tsui nyɔɔ emli.​—1 Yohane 5:3.

 “Ejaakɛ mikɔɔŋtso lɛ teremɔ waaa, ni mijatsu lɛ etsiii.” Yesu tamɔɔɔ jamɔŋ hiɛnyiɛlɔi ni yɔɔ ebei amli lɛ, ebaa ehe shi, ni ehe jɔ. (Yohane 7:47-49) Efeee mɛi basabasa loo hai-hai. Moŋ lɛ, emli jɔ ni mɛi fɛɛ nyɛɔ amɛbɛŋkɛɔ lɛ. Enu esɛɛnyiɛlɔi lɛ shishi, ni ekpaaa babaoo gbɛ kɛjɛɛɛ amɛdɛŋ. (Mateo 7:12; Marko 6:34; Luka 9:11) Agbɛnɛ hu, etsɔɔ amɛ bɔ ni amɛbaafee amɛná Nyɔŋmɔ mɔbɔnalɛ lɛ he sɛɛ, kɛ bɔ ni amɛbaafee amɛná henilee kpakpa ni hãa mɔ he jɔɔ lɛ. (Mateo 5:23, 24; 6:14) Sui kpakpai ni Yesu yɔɔ lɛ gbala mɛi kɛbɛŋkɛ lɛ, ni etsirɛ amɛ ni amɛbatsɔmɔ esɛɛnyiɛlɔi hu.

 Yesu wie wiemɔ ni aŋma yɛ Mateo 11:28-30 lɛ be ni eshiɛɔ yɛ Galilea yɛ afii 31 Ŋ.Ŋ.B. Mateo pɛ ji kaselɔi lɛ ateŋ mɔ ni bɔ Yesu ninefɔɔ nɛɛ he amaniɛ. Akɛni tsutsu ko lɛ, Mateo ji toohelɔ ni eji Yudanyo hu hewɔ lɛ, ena bɔ ni Roma nɔyeli lɛ toohemɔ lɛ kɛ Yudafoi lɛ ajamɔ gbɛjianɔtoo lɛ hã maŋbii lɛ ahe fĩ amɛ hã. No hewɔ lɛ, wɔbaanyɛ wɔná nɔmimaa akɛ, be ni ena akɛ Yesu kɛ hegbɛ ni Etsɛ, Yehowa a kɛhã lɛ lɛ miifɔ̃ mɛi ni ehao lɛ nine koni amɛbɛŋkɛ lɛ Yesu lɛ, ewo Mateo hewalɛ waa.​—Mateo 11:25-27.

 Mateo Sanekpakpa lɛ wie sui ni sa kadimɔ waa ni Yesu jie lɛ kpo akɛ Mesia ni awo ehe shi lɛ, kɛ mɔ ni baaye nɔ akɛ Nyɔŋmɔ Maŋtsɛyeli lɛ nɔ maŋtsɛ wɔsɛɛ lɛ he.​—Mateo 1:20-23; Yesaia 11:1-5.

 Kwɛmɔ Mateo wolo lɛ hiɛkpamɔ vidio kuku nɛɛ.