Dabi. Biblia lɛ kɛɔ akɛ esa akɛ wɔsɔle wɔhã Nyɔŋmɔ pɛ yɛ Yesu gbɛ́i lɛ mli. Yesu kɛɛ ekaselɔi lɛ akɛ: “No hewɔ lɛ nyɛsɔlea nɛkɛ: Wɔtsɛ ni yɔɔ ŋwɛi, ogbɛi lɛ he atse.” (Mateo 6:9) Ekɛɛɛ amɛ be ko be ko akɛ amɛsɔle amɛhã saints, ŋwɛibɔfoi, aloo mɔ kroko, ekɛɛ amɛsɔle amɛhã Nyɔŋmɔ pɛ.

 Yesu kɛɛ ekaselɔi lɛ akɛ: “Mi nɔŋŋ ji gbɛ lɛ kɛ anɔkwale lɛ kɛ wala lɛ; mɔ ko baaa tsɛ lɛ ŋɔɔ, akɛ ja etsɔ minɔ.” (Yohane 14:6, NAB) Yesu ji mɔ pɛ ni Nyɔŋmɔ ehã lɛ hegbɛ akɛ ebaanyɛ edamɔ mli ehã wɔ.—Hebribii 7:25.

Ani tɔ̃mɔ yɛ he akɛ masɔle mahã Nyɔŋmɔ, ni masɔle mahã hetselɔi loo saints hu?

 Yɛ Kitãi Nyɔŋma lɛ mli lɛ, Nyɔŋmɔ kɛɛ akɛ: “Mi, Yehowa, o-Nyɔŋmɔ lɛ, mi ji Nyɔŋmɔ awuŋayelɔ.” (2 Mose 20:5, Ga Biblia Momo) Mɛɛ gbɛ nɔ Nyɔŋmɔ ji “awuŋayelɔ”? No tsɔɔ akɛ “esumɔɔ ni ajá ekome too pɛ.” Nyɔŋmɔ biɔ ni akɛ nibii fɛɛ ni kɔɔ hetuu kɛhãmɔ loo jamɔ he, ni sɔlemɔ hu fata he lɛ ahã ekome too pɛ.—Yesaia 48:11

 Kɛ́ wɔsɔle wɔhã mɔ kroko, loo saints ni ji hetselɔi, loo ŋwɛibɔfo po lɛ, belɛ wɔmiiwo Nyɔŋmɔ mli la loo wɔmiiwo lɛ mlifu ji no. Be ni bɔfo Yohane ka akɛ ebaakoto ŋwɛibɔfo ko ni ejá lɛ lɛ, ŋwɛibɔfo lɛ tsĩ enaa koni ekafee nakai, ekɛɛ lɛ akɛ: “Kaakwɛ ni ofee! Onaanyo tsulɔ kɛ onyɛmimɛi lɛ ni hiɛ Yesu odase lɛ mli lɛ ateŋ mɔ ko ji mi; Nyɔŋmɔ moŋ ojá!”—Kpojiemɔ 19:10, Ga Biblia momo.