3 Mose 17:1-16
17 Yehowa tee nɔ ekɛɛ Mose akɛ:
2 “Okɛ Aaron kɛ ebihii lɛ kɛ Israelbii lɛ fɛɛ awie ni okɛɛ amɛ akɛ, ‘Nɔ ni Yehowa efã nɛ:
3 “‘“Kɛ́ Israelnyo ko gbe tsina loo gwantɛŋ loo abotia yɛ nsara lɛ mli loo egbe lɛ yɛ nsara lɛ sɛɛ,
4 shi ekɛbaaa kpee buu lɛ shinaa lɛ naa koni ekɛbahã Yehowa akɛ afɔle yɛ Yehowa sɔlemɔ buu lɛ hiɛ lɛ, abaabu nakai mɔ lɛ akɛ eye lá yi sɔ̃. Nakai mɔ lɛ eshwie lá shi, ni esa akɛ afo lɛ ashɛ afɔ̃* kɛje emaŋbii lɛ ateŋ.
5 Enɛ baahã Israelbii lɛ kɛ kooloi ni amrɔ nɛɛ amɛgbeɔ yɛ ŋa lɛ nɔ lɛ abahã Yehowa yɛ kpee buu lɛ shinaa lɛ naa; amɛkɛbahã osɔfo lɛ. Amɛgbe kooloi nɛɛ akɛ naanyobɔɔ afɔlei amɛhã Yehowa.+
6 Ni osɔfo lɛ kɛ lá lɛ ashwã Yehowa afɔleshaa latɛ lɛ nɔ, yɛ kpee buu lɛ shinaa lɛ naa, ní eshã fɔ lɛ* akɛ nɔ ko ni jeɔ ŋma jogbaŋŋ* woɔ Yehowa.+
7 No hewɔ lɛ, amɛkashã afɔlei amɛhã wɔji ni tamɔ abotiai*+ ní amɛkɛ amɛ bɔɔ ajwamaŋ+ lɛ dɔŋŋ. Enɛ atsɔ mla ni kã shi daa hã nyɛ yɛ nyɛyinɔi fɛɛ amli.”’
8 “Kɛɛmɔ amɛ akɛ, ‘Israelnyo fɛɛ Israelnyo loo gbɔ fɛɛ gbɔ ni yɔɔ nyɛteŋ ní shãa shãa afɔle loo afɔle kroko
9 ní ekɛbaaa kpee buu lɛ shinaa lɛ naa ní ekɛbahã Yehowa lɛ, afo lɛ ashɛ afɔ̃* kɛje emaŋbii lɛ ateŋ.+
10 “‘Israelnyo fɛɛ Israelnyo loo gbɔ fɛɛ gbɔ ni yɔɔ nyɛteŋ, ni baaye lá ko* lɛ,+ bɔ fɛɛ bɔ ni fee lɛ, majie mihiɛ maka mɔ* ni yeɔ lá lɛ, ni mafo lɛ mashɛ mafɔ̃* kɛje emaŋbii lɛ ateŋ.
11 Ejaakɛ heloo lɛ wala* yɛ lá lɛ mli,+ ni mi diɛŋtsɛ mikɛhã nyɛ yɛ afɔleshaa latɛ lɛ nɔ+ koni akɛkpãtã ahã nyɛ,* ejaakɛ lá lɛ ji nɔ ni kpãtãa,+ yɛ wala* ni yɔɔ mli lɛ hewɔ.
12 No hewɔ ni mikɛɛ Israelbii lɛ akɛ: “Nyɛteŋ mɔ ko mɔ ko akaye lá, ni gbɔi ni yɔɔ nyɛteŋ+ lɛ hu ateŋ mɔ ko mɔ ko akaye lá”+ lɛ.
13 “‘Kɛ́ Israelbii lɛ ateŋ mɔ ko loo gbɔ ko ni yɔɔ nyɛteŋ lɛ tee gbɔbimɔ ni egbe ŋa mli kooloo loo loofɔlɔ ko ni ayeɔ lɛ, efɔse elá lɛ eshwie shi+ ni ekɛ sũ* atsĩ nɔ.
14 Ejaakɛ heloo fɛɛ heloo wala* ji elá lɛ, ejaakɛ no mli wala* lɛ yɔɔ. No hewɔ ni mikɛɛ Israelbii lɛ akɛ: “Nyɛkayea heloo ko heloo ko lá, ejaakɛ heloo fɛɛ heloo wala* ji elá lɛ. Mɔ fɛɛ mɔ ni yeɔ lɛ, abaafo lɛ ashɛ afɔ̃.”*+
15 Kɛ́ mɔ* ko ye kooloo ko ní egbo loo kooloo ni kooloo awuiyelɔ ko etserɛ emli lɛ,+ Israelnyo ni jio, gbɔ ni jio, efɔ etadei lɛ ahe ni ekɛ nu aju ehe, ni ehe tseee kɛyashi gbɛkɛ;+ no sɛɛ lɛ, ehe baatse.
16 Shi kɛ́ efɔɔɔ etadei lɛ ahe, ni ejuuu ehe* lɛ, no lɛ, ehe sɔ̃ lɛ baakã enɔ.’”+
Shishigbɛ Niŋmaa
^ Loo “agbe lɛ.”
^ Loo “ehã fɔ lɛ aje lasu.”
^ Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
^ Hebri sht. ŋm., “amɛkashã afɔlei amɛhã abotiai.”
^ Loo “agbe lɛ.”
^ Loo “lá fɛɛ lá.”
^ Loo “susuma.”
^ Loo “magbe lɛ.”
^ Loo “susuma.”
^ Loo “nyɛsusumai.”
^ Loo “susuma.”
^ Hebri sht. ŋm., “mulu.”
^ Loo “susuma.”
^ Loo “abaagbe lɛ.”
^ Loo “susuma.”
^ Loo “susuma.”
^ Loo “susuma.”
^ Hebri sht. ŋm., “eheloo he.”
