Nɔ Ni Yohane Ŋma 5:1-47
5 Enɛ sɛɛ lɛ, Yudafoi lɛ agbi jurɔ ko bashɛ,+ ni Yesu kwɔ kɛtee Yerusalem.
2 Agbɛnɛ, kpaakpo ko yɛ Yerusalem Gwantɛŋi Agbó+ lɛ masɛi ni atsɛɔ lɛ yɛ Hebri mli akɛ Betzata, ni ablanai enumɔ yɛ ehewɔ.
3 Mɛi pii ni ji helatsɛmɛi, kɛ shwilafoi, kɛ obubuafoi,* kɛ mɛi ni niji kɛ naji egboi kamɔ ablanai nɛɛ anɔ.
4 * ——
5 Shi nuu ko yɛ jɛmɛ ni hela emɔ lɛ afii 38.
6 Be ni Yesu na nuu nɛɛ kã jɛmɛ, ni ele akɛ hela emɔ lɛ afii pii lɛ, ebi nuu lɛ akɛ: “Ani oosumɔ ni oná hewalɛ?”+
7 Helatsɛ lɛ hã lɛ hetoo akɛ: “Onukpa, mibɛ mɔ ko ni kɛ́ ata nu lɛ mli lɛ, ebaawó mi ewo mli, shi be fɛɛ be kɛ́ miiya lɛ, mɔ kroko tsɔɔ mihiɛ eyagbeɔ mli.”
8 Yesu kɛɛ lɛ akɛ: “Tee shi! Wó osaa lɛ ni onyiɛ.”+
9 Ni amrɔ lɛ, nuu lɛ ná hewalɛ, ni ewó esaa lɛ ni ebɔi nyiɛmɔ.
Nakai gbi lɛ, Hejɔɔmɔ Gbi ni.
10 No hewɔ lɛ, Yudafoi lɛ kɛɛ nuu ni atsa lɛ lɛ akɛ: “Hejɔɔmɔ Gbi nɛ, ni mla eŋmɛɛɛ gbɛ akɛ owóɔ saa lɛ.”+
11 Shi ehã amɛ hetoo akɛ: “Mɔ ni hã miná hewalɛ lɛ diɛŋtsɛ ni kɛɛ mi akɛ, ‘Wó osaa lɛ ni onyiɛ.’”
12 Amɛbi lɛ akɛ: “Mɛɛ nuu kɛɛ bo akɛ, ‘Wó osaa lɛ ni onyiɛ’ lɛ?”
13 Shi nuu ni atsa lɛ lɛ leee mɔ ni ji, ejaakɛ Yesu ebote mɛi ni bua shi yɛ jɛmɛ lɛ ateŋ.
14 Enɛ sɛɛ lɛ, Yesu na lɛ yɛ sɔlemɔ shĩa lɛ ni ekɛɛ lɛ akɛ: “Naa, oná hewalɛ. Kaafee esha dɔŋŋ, koni nɔ ko ni fe tsutsu nɔ lɛ akaba onɔ.”
15 Nuu lɛ yiŋ etee ni eyakɛɛ Yudafoi lɛ akɛ Yesu ji mɔ ni hã ená hewalɛ lɛ.
16 Enɛ hewɔ lɛ, Yudafoi lɛ bɔi Yesu naagbamɔ ejaakɛ eefee nibii nɛɛ yɛ Hejɔɔmɔ Gbi lɛ nɔ.
17 Shi ehã amɛ hetoo akɛ: “Mi-Tsɛ miitsu nii kɛbashi amrɔ nɛɛ, ni no hewɔ mi hu mitsuɔ nii lolo lɛ.”+
18 Enɛ kwraa hewɔ ni Yudafoi lɛ tao waa akɛ amɛgbe lɛ lɛ, ejaakɛ kɛhã amɛ lɛ, jeee Hejɔɔmɔ Gbi lɛ kɛkɛ ebuleɔ, shi moŋ eetsɛ Nyɔŋmɔ akɛ lɛ diɛŋtsɛ e-Tsɛ,+ koni mɛi asusu akɛ ekɛ Nyɔŋmɔ yeɔ egbɔ.+
19 No hewɔ lɛ, Yesu here nɔ ekɛɛ amɛ akɛ: “Lɛɛlɛŋ, lɛɛlɛŋ, miikɛɛ nyɛ akɛ, Bi lɛ diɛŋtsɛ nyɛŋ ekpɛ eyiŋ efee nɔ ko, ja nɔ ni enaa akɛ Tsɛ lɛ feɔ lɛ.+ Ejaakɛ nibii fɛɛ ni nakai mɔ lɛ feɔ lɛ, nomɛi nɔŋŋ Bi lɛ hu feɔ.
20 Ejaakɛ Tsɛ lɛ sumɔɔ Bi lɛ,+ ni etsɔɔ lɛ nibii fɛɛ ni lɛ diɛŋtsɛ efeɔ lɛ, ni ebaatsɔɔ lɛ nitsumɔi wuji fe enɛɛmɛi po, koni nyɛnaa akpɛ nyɛhe.+
21 Ejaakɛ bɔ ni Tsɛ lɛ teɔ gbohii ashi ni ehãa amɛ wala lɛ,+ nakai nɔŋŋ Bi lɛ hu kɛ wala hãa mɔ fɛɛ mɔ ni esumɔɔ akɛ ekɛhã lɛ lɛ.+
22 Ejaakɛ Tsɛ lɛ ekojooo mɔ ko mɔ ko, shi moŋ ekɛ kojomɔ lɛ fɛɛ ewo Bi lɛ dɛŋ,+
23 koni mɛi fɛɛ kɛ woo ahã Bi lɛ tamɔ bɔ ni amɛkɛ woo hãa Tsɛ lɛ. Mɔ fɛɛ mɔ ni kɛ woo hãaa Bi lɛ, ekɛ woo hãaa Tsɛ lɛ ni tsu lɛ lɛ hu.+
24 Lɛɛlɛŋ, lɛɛlɛŋ, miikɛɛ nyɛ akɛ, mɔ fɛɛ mɔ ni nuɔ miwiemɔ ni eheɔ mɔ ni tsu mi lɛ nɔ eyeɔ lɛ yɛ naanɔ wala,+ ni akojoŋ lɛ, shi moŋ efo mli kɛjɛ gbele mli kɛtee wala mli.+
25 “Lɛɛlɛŋ, lɛɛlɛŋ, miikɛɛ nyɛ akɛ, ŋmɛlɛtswaa lɛ miiba, ni eshɛ agbɛnɛ, be mli ni gbohii lɛ baanu Nyɔŋmɔ Bi lɛ gbee, ni mɛi ni baabo toi* lɛ baaná wala.
26 Ejaakɛ bɔ ni Tsɛ lɛ yɔɔ wala yɛ lɛ diɛŋtsɛ emli* lɛ,+ nakai nɔŋŋ ekɛhã Bi lɛ hu akɛ ená wala yɛ lɛ diɛŋtsɛ emli.+
27 Ni ehã lɛ hegbɛ akɛ ekojo,+ ejaakɛ lɛ ji gbɔmɔ Bi lɛ.+
28 Enɛ akafee nyɛ naakpɛɛ, ejaakɛ ŋmɛlɛtswaa lɛ miiba, be mli ni mɛi fɛɛ ni yɔɔ gbohii abui* lɛ amli lɛ baanu egbee+
29 ni amɛbaaje kpo, mɛi ni fee nibii kpakpai lɛ baate shi kɛya wala mli, ni mɛi ni fee nibii gbohii lɛ baate shi kɛya kojomɔ mli.+
30 Mi diɛŋtsɛ minyɛŋ mato miyiŋ mafee nɔ ko. Bɔ ni minuɔ lɛ, nakai mikojoɔ, ni mikojomɔ lɛ ja,+ ejaakɛ mitaooo nɔ ni mi diɛŋtsɛ misumɔɔ, shi moŋ nɔ ni mɔ ni tsu mi lɛ sumɔɔ.+
31 “Kɛ́ mikome miyeɔ mihe odase lɛ, midase lɛ jeee anɔkwale.+
32 Mɔ kroko yɛ ni yeɔ mihe odase, ni mile akɛ odase ni eyeɔ yɛ mihe lɛ, anɔkwale ni.+
33 Nyɛtsu mɛi kɛtee Yohane ŋɔɔ, ni eye anɔkwale lɛ he odase.+
34 Shi mi lɛ, mikɛ mihe efɔ̃ɔɔ gbɔmɔ ko odase nɔ, shi moŋ miiwie nibii nɛɛ koni ahere nyɛyiwala.
35 Nakai nuu lɛ ji kane ni tsoɔ ni kpɛɔ, ni nyɛshwe be kukuoo akɛ nyɛmii ashɛ nyɛhe babaoo yɛ ela lɛ mli.+
36 Shi miyɛ odase ni fe Yohane nɔ lɛ, ejaakɛ nitsumɔi tuuntu ni mi-Tsɛ kɛwo midɛŋ akɛ mitsu migbe naa lɛ, nakai nitsumɔi lɛ ni mitsuɔ lɛ yeɔ mihe odase akɛ Tsɛ lɛ tsu mi.+
37 Ni Tsɛ lɛ ni tsu mi lɛ diɛŋtsɛ eye mihe odase.+ Nyɛnuko egbee dã, ni nyɛnako bɔ ni eyɔɔ hu dã,+
38 ni ewiemɔ lɛ ehiii nyɛmli, ejaakɛ mɔ tuuntu ni etsu lɛ, nyɛheee lɛ nyɛyeee.
39 “Nyɛtaoɔ Ŋmalɛ lɛ mli,+ ejaakɛ nyɛsusuɔ akɛ nyɛbaatsɔ nomɛi anɔ nyɛná naanɔ wala; ni nomɛi nɔŋŋ* ji nibii ni yeɔ mihe odase lɛ.+
40 Ni kɛ̃lɛ nyɛsumɔɔɔ akɛ nyɛbaa miŋɔɔ+ koni nyɛná wala.
41 Mitaooo gbɔmɛi ahiɛnyam,
42 shi mile jogbaŋŋ akɛ nyɛbɛ Nyɔŋmɔ suɔmɔ lɛ yɛ nyɛmli.
43 Miba yɛ mi-Tsɛ gbɛ́i mli, shi nyɛhereee mi. Kɛ́ mɔ kroko ba yɛ lɛ diɛŋtsɛ egbɛ́i mli lɛ, nyɛbaahere nakai mɔ lɛ.
44 Kɛ́ nyɛwoɔ gbɔmɛi ahiɛ nyam ni nyɛtaoɔ hiɛnyam kɛjɛɔ amɛdɛŋ, shi hiɛnyam ni jɛ Nyɔŋmɔ kome pɛ lɛ ŋɔɔ lɛ, nyɛtaooo lɛ, te nyɛbaafee tɛŋŋ nyɛhe nyɛye lɛ?+
45 Nyɛkasusua akɛ mikɛ sane baafɔ̃ nyɛnɔ yɛ Tsɛ lɛ hiɛ; mɔ ko yɛ ni kɛ sane fɔ̃ɔ nyɛnɔ, lɛ ji Mose,+ mɔ ni nyɛkɛ nyɛhiɛ efɔ̃ enɔ lɛ.
46 Anɔkwa, eji nyɛhe Mose nyɛye kulɛ, nyɛbaahe mi nyɛye, ejaakɛ eŋma mihe sane.+
47 Shi kɛ́ nyɛheee eniŋmai lɛ nyɛyeee lɛ, te nyɛbaafee tɛŋŋ nyɛhe nɔ ni miwieɔ lɛ nyɛye lɛ?”
Shishigbɛ Niŋmaa
^ Loo “akpaketsɛmɛi.”
^ Kwɛmɔ Saji Krokomɛi A3 lɛ.
^ Loo “mɛi ni boɔ toi.”
^ Loo “yɔɔ wala nikeenii lɛ yɛ lɛ diɛŋtsɛ emli.”
^ Loo “gbohii akaimɔ bui.”
^ Ni ji, Ŋmalɛ lɛ.
