MƐI KOMƐI HEƆ YEƆ akɛ edamɔ shi kɛhã Nyɔŋmɔ nɔyeli yɛ mɔ ko tsui mli; mɛi krokomɛi hu susuɔ akɛ eji nɔ ni baajɛ mɔdɛŋ ni adesai bɔɔ koni amɛkɛ toiŋjɔlɛ kɛ ekomefeemɔ aba jeŋ fɛɛ lɛ mli kɛba. Te bo hu osusuɔ tɛŋŋ?

NƆ NI BIBLIA LƐ KƐƆ

‘Nyɔŋmɔ ní yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ. Eeejwara adesai amaŋtsɛyelii nɛɛ fɛɛ wɔtsɔwɔtsɔ.’ (Daniel 2:44) Nyɔŋmɔ Maŋtsɛyeli lɛ ji nɔyeli ko ni yɔɔ diɛŋtsɛ.

MƐNI HU WƆKASEƆ KƐJƐƆ BIBLIA LƐ MLI

• Nyɔŋmɔ Maŋtsɛyeli lɛ yeɔ nɔ kɛjɛɔ ŋwɛi.—Mateo 10:7; Luka 10:9.

• Nyɔŋmɔ tsɔɔ Maŋtsɛyeli lɛ nɔ etsuɔ eyiŋtoi ahe nii yɛ ŋwɛi kɛ shikpɔŋ lɛ nɔ.​—Mateo 6:10.

MƐNI OBAAKƐƐ?

• Mɔ ko leee

• Etsɛŋ

• Ebaŋ

NƆ NI BIBLIA LƐ KƐƆ

“Ni abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase, ni no sɛɛ lɛ naagbee lɛ baaba.” (Mateo 24:14) Kɛ́ aná ashiɛ sanekpakpa lɛ agbe naa lɛ, Maŋtsɛyeli lɛ baaba, ni ekɛ shihilɛ gbɛjianɔtoo fɔŋ nɛɛ baaba naagbee.

NƆ NI HU NI WƆKASEƆ KƐJƐƆ BIBLIA LƐ MLI

• Mɔ ko mɔ ko bɛ shikpɔŋ lɛ nɔ ni le be tuuntu ni Nyɔŋmɔ Maŋtsɛyeli lɛ baaba.​—Mateo 24:36.

• Biblia mli gbalɛi hãa wɔnaa akɛ, etsɛŋ ni Maŋtsɛyeli lɛ baaba.​—Mateo 24:3, 7, 12.