Oshara Ba Solomon Islands Lɛ Anɔ

Yɛ Ju, April 2, 2007 lɛ, shikpɔŋhosomɔ ni naawalɛ ji 8.1 lɛ hoso Solomon Islands, ni ji ŋshɔkpɔi srɔtoi ni yɔɔ Australia kooyi-bokagbɛ lɛ. Yɛ minitii fioo komɛi amli lɛ, nui babaoo ni atsɔɔ akɛ ekomɛi anɔkwɔlɛ shɛɔ mitai 10 lɛ kumɔ eshwie ŋshɔkpɔi ni yɔɔ Anaigbɛ Kpokpai lɛ nɔ lɛ anɔ, ni egbe mɛi 52 ni ekpata mɛi 6,000 ashĩai ahiɛ.

Gizo ni ji maŋ ko ni kã Ghizo Ŋshɔkpɔ lɛ ŋshɔnaagbɛ, ni mɛi aaafee 7,000 yɔɔ mli lɛ fata hei ni oshara nɛɛ kpata nii ahiɛ waa yɛ lɛ ahe. Ghizo Ŋshɔkpɔ lɛ kɛ he tuuntu ni shikpɔŋhosomɔ lɛ ba yɛ lɛ teŋ jɛkɛmɔ ji kilomitai 45. Yehowa Odasefoi asafo ko kɛ emli bii fioo ni yɔɔ Gizo maŋ lɛ mli lɛ miikpa gbɛ akɛ amɛbaaye Yesu gbele lɛ Kaimɔ ni ayeɔ lɛ daa afi lɛ nakai gbi lɛ gbɛkɛ. (1 Korintobii 11:23-26) Bei babaoo lɛ, gbi lɛ jeɔ shishi kɛ hulu shitee ni yɔɔ fɛo kɛ ŋshɔ ni eŋmɛ dɛmm. Kɛkɛ ni trukaa lɛ, leebi beni atswa 7:39 lɛ shikpɔŋ lɛ hoso.

Shikpɔŋhosomɔ!

Beni shikpɔŋ lɛ hoso lɛ, no mli lɛ Ron Parkinson ni ji asafoŋ onukpa lɛ kɛ eŋa Dorothy miito amɛleebi niyenii ahe gbɛjianɔ. Ron kɛɛ akɛ: “Wɔshĩa lɛ hoso waa tamɔ akokooshi tso, shi ekumɔɔɔ. Gbɛɛmɔ lɛ naa wa waa diɛŋtsɛ. Kɔbai, sɛi, tsɛŋsii, saŋku, kɛ nibii krokomɛi ni anyɛɔ aholeɔ nɔ lɛ fɛɛ gbeegbee shi. Wɔbɔ mɔdɛŋ waa dani wɔnyɛ wɔje kpo kɛjɛ tsũ lɛ mli. Dorothy ni no mli lɛ ewooo tokota lɛ yanaa glase ko ni ejwa nɔ.”

Tony kɛ Christine Shaw ni amɛji maŋsɛɛ sanekpakpa shiɛlɔi ni yɔɔ akutso lɛ mli lɛ hu bɔ mɔdɛŋ ni amɛhe fee oya kɛje kpo. Christine kɛɛ akɛ: “Shikpɔŋ lɛ hoso waa aahu akɛ migbee shi ni minyɛɛɛ shi mate. Yɛ hei ni bɛŋkɛ ŋshɔ lɛ naa lɛ, obaana ni tsũi babaoo tɔɔ nu lɛ hiɛ. Ŋshɔ lɛ ku waa ni ekumɔ amɛ eshwie shi. Mɛi komɛi hu tara lɛji amli ni amɛkɛ hiɛdɔɔ miiwiri kɛmiitao mɛi ni hiɛ kãmɔ lolo yɛ tsũi ni ekumɔ eshwie nu lɛ mli lɛ. Kɛkɛ ni shikpɔŋhosomɔ ni naa wa kroko hu ba, ni ekroko hu nyiɛ no sɛɛ kɛba. Enɛ tee nɔ nakai gbii enumɔ sɔŋŋ. Eyɛ gbeyei waa!”

Kɛkɛ ni Ŋshɔŋ Shikpɔŋhosomɔ Hu Ba

Beni shikpɔŋhosomɔ lɛ ba lɛ, no mli lɛ Patson Baea yɛ eshĩa yɛ Sepo Hite ni kɛ Gizo teŋ jɛkɛmɔ aaafee kilomitai ekpaa lɛ. Mɛni ba Patson kɛ eweku lɛ nɔ beni oshara nɛɛ ba lɛ?

Patson wie shihilɛi ni ehiii kwraa ni amɛtsɔ mli lɛ he akɛ: “Mijo foi kɛtsɔ ŋshɔ lɛ naa kɛtee he ni miŋa Naomi kɛ wɔbii ejwɛ lɛ yɔɔ lɛ. Shikpɔŋhosomɔ lɛ etsirɛ amɛ etswiatswia shi, shi amɛgboiko. Gbekɛbii lɛ ahe miikpokpo, ni amɛteŋ mɛi komɛi miifó. Mikɛ Naomi shɛje amɛ mii amrɔ nɔŋŋ.

“Miyɔse akɛ ŋshɔ lɛ miifee hamahama fe nine. Enɛ tsɔɔ faŋŋ akɛ ŋshɔŋ shikpɔŋhosomɔ nyiɛ gbɛ kɛmiiba. Ekolɛ enɛ baaha wɔ ŋshɔkpɔ bibioo lɛ amii. Minyɛ Awo Evalyn ni yɔɔ ŋshɔkpɔ bibioo ko ni bɛŋkɛ wɔ lɛ hu nɔ lɛ wala yɛ oshara mli. Mifã wɔweku lɛ mlibii lɛ ni amɛtara  wɔweku lɛlɛ ni akɛ tsɔne kudɔɔ lɛ mli koni wɔyajie lɛ.

“Beni wɔtee hiɛ fioo lɛ, ŋshɔke wulu ko batsɔ wɔlɛlɛ lɛ shishi. Ŋshɔ lɛ miifo ehe kɛmiiya kɛmiiba. Beni wɔyashɛ he ni minyɛ Awo yɔɔ lɛ, no mli lɛ ŋmiŋmi emɔ lɛ ni eyiŋ efutu lɛ, ni eeshe gbeyei akɛ ebaabote nu lɛ mli. Naomi kɛ Jeremy ni ji wɔbinuu ni eye afii 15 lɛ tu amɛwo nu ni naa wa ni hoɔ lɛ mli ni amɛyaye amɛbua lɛ koni esere kɛba lɛlɛ lɛ mli. No sɛɛ lɛ, wɔfã lɛlɛ lɛ kɛ foi kɛtsɔ ŋshɔ lɛ hiɛ.

“Nakai beaŋ lɛ, ŋshɔ lɛ efã bɔ ni eko bako nakai dã, ni eha aana tɛi kɛ nibii krokomɛi ni yɔɔ ŋshɔ lɛ shishi lɛ. Trukaa lɛ, ŋshɔ lɛ ku kɛba ni eha ŋshɔkpɔi enyɔ lɛ fɛɛ anɔ yi kɛ nu babaoo. Enɛ ha wɔgbɔiatoohe ni yɔɔ ŋshɔ lɛ naa lɛ kumɔ bɔ ni anyɛŋ asaa. Nu babaoo ke kɛba wɔweku shĩa lɛ mli, ni enɛ fite wɔnibii babaoo. Beni ŋshɔ lɛ fã lɛ, wɔyaloo Bibliai kɛ lala woji kɛjɛ wɔshĩa ni efite lɛ mli, ni wɔyi gbɛ kɛtee Gizo.”

Nibii babaoo ahiɛ ekpata yɛ ŋshɔ lɛ naa, ni mɛi babaoo hu egboi. Ghizo Ŋshɔkpɔ lɛ anaigbɛ ji he ni nibii ahiɛ kpata waa yɛ fe fɛɛ. Kɛ́ hooo kwraa lɛ, nu babaoo ni nɔkwɔlɛ shɛɔ mitai enumɔ lɛ kpata akrowai 13 ahiɛ butuu!

Nakai gbi lɛ gbɛkɛ lɛ, mɛi 22 bua amɛhe naa yɛ Yehowa Odasefoi a-Maŋtsɛyeli Asa ni yɔɔ Gizo lɛ nɔ koni amɛye Yesu gbele lɛ Kaimɔ lɛ. Miishɛɛ sane ji akɛ mɛi nɛɛ ateŋ mɔ ko kwraa epilako tsɔ. Ron ni atsi etã kɛtsɔ hiɛ lɛ kɛɛ akɛ: “Srawa hewalɛ bɛ, ni wɔkanei ni akɛ glasin woɔ mli lɛ efite. No hewɔ lɛ, Nyɛminuu Shaw kɛ tɔɔtsi ha maŋshiɛmɔ lɛ. Wɔkɛ gbee ni wa kɛ gbee srɔtoisrɔtoi lá yijiemɔ lalai wɔha Yehowa yɛ duŋ lɛ mli.”

Yelikɛbuamɔ Nibii

Beni mɛi ni yɔɔ Honiara ni ji maŋtiase lɛ mli lɛ nu oshara ni eba lɛ he lɛ, Yehowa Odasefoi anitsumɔhe nine ni yɔɔ jɛmɛ lɛ he fee oya ni amɛkɛ yelikɛbuamɔ nibii yaha mɛi ni oshara lɛ eba amɛnɔ lɛ. Amɛtswiatswia tɛlifoŋ kɛtee hei ni oshara lɛ ba yɛ lɛ, ni no ha amɛná nɔmimaa akɛ Odasefoi ni yɔɔ jɛmɛ lɛ yɛ shweshweeshwe. Atsu mɛi ni ayɔɔ hekɛnɔfɔɔ yɛ amɛmli kɛtee Choiseul Ŋshɔkpɔ lɛ nɔ koni amɛyatao Odasefonyo kome pɛ ni yɔɔ jɛmɛ lɛ. Amɛyana lɛ ni nɔ ko kwraa efeko lɛ. Akɛ shika hu yaha mɛi ni yɔɔ Gizo lɛ ni amɛkɛhe yelikɛbuamɔ nibii.

Nitsumɔhe nine lɛ najiaŋdamɔlɔi ni atsu amɛ lɛ tá kɔɔyɔŋ lɛlɛ ni fã klɛŋklɛŋ lɛ mli kɛtee Gizo ni amɛyashɛ jɛmɛ Soo. Craig Tucker ni ji Nitsumɔhe Nine Ajinafoi Akuu lɛ mlinyo lɛ kɛɛ akɛ: “Wɔhiɛ adekai babaoo ni yelikɛbuamɔ nibii yɔɔ mli kɛtee. Ashi gbɛfalɔi krokomɛi lɛ ajatsui lɛ ekomɛi akɛni amɛmli tsii tsɔ lɛ hewɔ, shi wɔná miishɛɛ waa akɛ wɔdekai lɛ fɛɛ bashɛ shi shweshweeshwe. Wɔdekai lɛ fata klɛŋklɛŋ yelikɛbuamɔ nibii ni akɛtee hei ni oshara lɛ ba yɛ lɛ ahe. Gbii enyɔ sɛɛ lɛ, wɔnibii krokomɛi ni akɛmaje kɛtsɔ lɛlɛ nɔ lɛ hu bashɛ shi.”

Yɛ nakai beaŋ lɛ, Tony Shaw kɛ Patson Baea kɛ Odasefoi krokomɛi ni jɛ Gizo lɛ kɛ lɛlɛ fã gbɛ ŋmɛlɛtswai enyɔ ni amɛyaye amɛbua Odasefoi ni yɔɔ Ranongga ŋshɔkpɔ lɛ nɔ lɛ. Bɔ ni shikpɔŋhosomɔ lɛ naa wa sɔŋŋ hewɔ lɛ, eha ŋshɔkpɔ ni kɛlɛ ji kilomitai 32 kɛ elɛɛmɔ kilomitai 8 lɛ nɔ ekwɔ fe ŋshɔ lɛ mitai 2! Ekã shi faŋŋ akɛ nu ni ebɔle ŋshɔkpɔ lɛ ni fã trukaa lɛ ji nɔ ni ha ŋshɔŋ shikpɔŋhosomɔ ni sa ŋshɔkpɔi krokomɛi ni bɛŋkɛ lɛ ahe lɛ ba.

Tony kɛɛ akɛ: “Asafoŋbii lɛ ná miishɛɛ waa beni amɛna wɔ lɛ. Amɛyɛ shweshweeshwe, ni akɛni shikpɔŋhosomɔi bibii krokomɛi ni ba lɛ eha gbeyei emɔmɔ amɛ hewɔ lɛ, amɛkãmɔɔ kpo nɔ amɛwɔɔ. Wɔlɛlɛ lɛ ji klɛŋklɛŋ nɔ̃ ni kɛ yelikɛbuamɔ nibii ba. Dani wɔbaashi amɛ lɛ, wɔkɛ amɛ fɛɛ fee ekome kɛsɔle kɛda Yehowa shi.”

Patson kɛɛ akɛ: “Gbii saŋŋ sɛɛ lɛ, wɔku wɔsɛɛ kɛtee Ranongga ni wɔkɛ yelikɛbuamɔ nibii krokomɛi yaha amɛ, ni agbɛnɛ hu wɔyatao weku ko ni ji Odasefoi ni yɔɔ he ko ni etse ehe banee yɛ ŋshɔkpɔ lɛ naagbee gbɛ lɛ. Naagbee lɛ, wɔyana Matthew Itu kɛ eweku lɛ yɛ ŋa lɛ nɔ he ko shɔŋŋ. Amɛhiŋmɛiiaŋ kpala nu kɛ miishɛɛ beni amɛna akɛ wɔhiɛ kpako amɛnɔ lɛ! Shikpɔŋhosomɔ lɛ efite amɛshĩa lɛ kɛ tsũi krokomɛi ni yɔɔ amɛkrowa lɛ. Shi kɛlɛ, nɔ titri ni he hiaa amɛ ji ni amɛweku lɛ mli bii ateŋ mɔ fɛɛ mɔ aná Biblia hee kɛto nɔ ni oshara lɛ ekpata hiɛ lɛ najiaŋ.”

 Mɛi ni Na Nɔ ni Tee Nɔ lɛ Jie Odasefoi lɛ Ayi

Mɛi na Kristofoi asuɔmɔ ni tamɔ nɛkɛ ni ajie lɛ kpo lɛ. Craig Tucker kɛɛ akɛ: “Adafitswaa woloŋmalɔ ko ni wie eshi yelikɛbuamɔ nibii ni maŋ lɛ kɛha lɛ naa kpɛ ehe beni ená ele akɛ gbii fioo sɛɛ beni shikpɔŋhosomɔ lɛ ba lɛ, Yehowa Odasefoi lɛ baha amɛwebii lɛ niyenii, tapolin kɛ nibii krokomɛi ni he hiaa lɛ, ni ehiɛ sɔ amɛnifeemɔ lɛ waa.” Patson kɛfata he akɛ: “Mɛi ni yɔɔ Ranongga akrowai amli lɛ jie wɔyi waa yɛ bɔ ni wɔhe fee oya ni wɔkɛ yelikɛbuamɔ nibii tee jɛmɛ lɛ hewɔ, ni amɛwie amɛshi amɛ diɛŋtsɛ amɛsɔlemɔ lɛ akɛ eyeee ebuaaa amɛ.” Yoo ko kɛɛ akɛ, “Nyɛsafo lɛ he fee oya waa ni ekɛ yelikɛbuamɔ nibii ba!”

Odasefoi lɛ ye amɛbua mɛi krokomɛi ni jeee Odasefoi hu. Christine Shaw kɛɛ akɛ: “Beni wɔyasara mɛi ni yɔɔ Gizo helatsamɔhe ni ato he gbɛjianɔ koni akɛtsu nii yɛ be kukuoo ko mli lɛ, wɔyana nuu ko kɛ eŋa ni wɔkɛ amɛ kpe nyɛsɛɛ nɛɛ yɛ shiɛmɔ nitsumɔ lɛ mli lɛ. Amɛ fɛɛ amɛpila ni ŋmiŋmi emɔmɔ amɛ waa. Ŋshɔŋ shikpɔŋhosomɔ lɛ eshá yoo lɛ nabi kɛtee. Wɔhe fee oya kɛtee shĩa ni wɔyaloo niyenii kɛ atadei ni he hiaa kɛbaha amɛ. Amɛhiɛ sɔ enɛ waa.”

Yɛ anɔkwale mli lɛ, jeee heloonaa yelikɛbuamɔ nibii pɛ he hiaa mɛi ni adebɔɔ naa oshara enina amɛ lɛ. Miishɛjemɔ ni Nyɔŋmɔ Wiemɔ ni ji Biblia lɛ pɛ baanyɛ ekɛha lɛ ji nɔ titri ni he hiaa amɛ. Ron kɛɛ akɛ: “Jamɔŋ hiɛnyiɛlɔi lɛ miikɛɛ akɛ Nyɔŋmɔ miigbala gbɔmɛi lɛ atoi yɛ amɛhe eshai lɛ ahewɔ. Shi wɔha amɛle kɛjɛ Biblia lɛ mli akɛ jeee Nyɔŋmɔ ji mɔ ni kɛ efɔŋfeemɔ baa. Mɛi babaoo da wɔ shi yɛ Nyɔŋmɔ wiemɔ nɛɛ ni wɔkɛshɛje amɛmii lɛ hewɔ.”—2 Korintobii 1:3, 4; Yakobo 1:13. *

[Shishigbɛ niŋmaa]

[Nitɛŋmɔ ni akɛmiitsɔɔ nɔ ko mli/​Shikpɔŋ he mfonirii babaoo ni yɔɔ baafa 13]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Choiseul

Ghizo

Gizo

Ranongga

HONIARA

AUSTRALIA

[Mfoniri ni yɔɔ baafa 15]

Baea weku lɛ, yɛ amɛlɛlɛ ni akɛ tsɔne kudɔɔ lɛ mli

[Mfoniri ni yɔɔ baafa 15]

Nibii ni ŋshɔŋ shikpɔŋhosomɔ lɛ kpata hiɛ yɛ Gizo

[Mfoniri ni yɔɔ baafa 15]

Maŋtsɛyeli Asa nɛɛ ji tsu pɛ ni shwɛ yɛ Lale ni yɔɔ Ranongga Ŋshɔkpɔ lɛ nɔ lɛ