Ŋmɛnɛŋmɛnɛ Beaŋ “Israel Gbekɛ Yoo”

BENI eshwɛ otsii enyɔ ni abaaye Yesu gbele lɛ Kaimɔ lɛ yɛ afi 2006 mli lɛ, Sales weku ni yɔɔ Praia Grande, yɛ Brazil lɛ mli bii lɛ fɛɛ ŋmala mɛi ni amɛbaasumɔ ni amɛfɔ̃ amɛnine kɛba Kaimɔ lɛ shishi lɛ agbɛi. Aha Abigayl ni eye afii ekpaa lɛ ninefɔ̃ɔ wolo lɛ ekome, ni abi lɛ mɔ ni ebaasumɔ ni ekɛha.

Ekɛɛ akɛ, mikɛbaaha “Nuu lɛ ni be fɛɛ be kɛ́ ena mi lɛ eŋmɔɔ lɛ.”

Efɔlɔi lɛ bi lɛ akɛ, “Mɛɛ nuu?”

Eha hetoo akɛ, “Mɔ ni taa helatsɛmɛi ashwiili lɛ mli lɛ.”

Gbii ejwɛ sɛɛ lɛ, Abigayl ha efɔlɔi lɛ na nuu ni etsɔɔ lɛ. Nuu lɛ ji Walter, ni eshĩa bɛŋkɛ Maŋtsɛyeli Asa lɛ. Nɔ ni fe afii 15 ni eho nɛ beni eye afii 28 lɛ, ená tsɔne oshara ni enɛ ha egbɔmɔtso lɛ fã kɛjɛ ehɛ kɛbashi enajiashi fɛɛ gbo. Akɛni niiatsɛ kpanaa ji lɛ hewɔ lɛ, eyɛ mɛi enyɔ ni buɔ ehe. Beni aŋmɛ Abigayl gbɛ ní ekɛ Walter wie lɛ sɛɛ lɛ, emami ha Walter le akɛ ebiyoo lɛ miitao efɔ̃ lɛ nine.

Beni Abigayl kɛ ninefɔ̃ɔ wolo lɛ ha Walter lɛ, ekɛɛ lɛ akɛ: “Mɛi krokomɛi ni yɔɔ wɔ-Maŋtsɛyeli Asa lɛ nɔ lɛ ná ninefɔ̃ɔ woji pii, shi mi lɛ ekome pɛ aha mi. No hewɔ lɛ, bo pɛ ji mɔ ni mifɔ̃ɔ bo nine. Kɛ́ obaaa lɛ, minaŋ mɔ ko mɔ ko. Shi kɛ́ oba lɛ, mimii baashɛ mihe waa, ni Yehowa hu baaná miishɛɛ po fe bɔ ni maná lɛ.”

Yɛ Kaimɔ gbi lɛ nɔ lɛ, Odasefoi lɛ ní Abigayl fata he lɛ efee ekome kɛmiisaa Maŋtsɛyeli Asa lɛ nɔ kɛha gbɛkɛnaashi Kaimɔ nifeemɔ lɛ. Nakai shwane lɛ no mli lɛ Walter miiho, ni beni ena Abigayl lɛ, ekɛɛ etsɔnekudɔlɔ lɛ ni ewa tsɔne lɛ. Kɛkɛ ni egbele tsɔne lɛ samfɛlɛ lɛ, ni ebi Abigayl nɔ ni efeɔ. Abigayl ha lɛ hetoo akɛ, amɛmiisaa asa lɛ nɔ koni efee fɛo eha lɛ.

Nakai gbɛkɛ lɛ, Abigayl kpa mɔ ni efɔ̃ lɛ nine lɛ gbɛ aahu. Beni abɔi wiemɔ lɛ hamɔ lɛ, Abigayl tee nɔ efolɔ ehe ekwɛ akɛ Walter eba lo. Trukaa lɛ, Walter kɛ mɛi ni buɔ ehe lɛ bashɛ shi. Abigayl mii shɛ ehe waa. Beni akpa lɛ, Walter wie akɛ kulɛ eefã gbɛ kɛmiiya maŋ kroko nɔ, shi yɛ Abigayl hewɔ lɛ etsake ejwɛŋmɔ ni eba Kaimɔ lɛ. Kɛkɛ ni ekɛfata he akɛ: “Wiemɔ ni aha nɛɛ ji nɔ ni mitaoɔ akɛ mabo toi.” Ebi ni aha lɛ Biblia, ni akɛ lɛ bɔi nikasemɔ ni ebɔi kpeeiyaa.

Beni enɛɛmɛi fɛɛ yaa nɔ lɛ, no mli lɛ Walter nyɛmi yoo fioo ko hu kɛɛ eetao ni ena Abigayl ní enyɛmi nuu lɛ tsɛɔ egbɛi daa nɛɛ. Beni ena lɛ lɛ, ena ehe miishɛɛ waa, ni ená ele akɛ eji gbekɛ yoo kpakpa. Ekɛɛ akɛ, “Amrɔ nɛɛ mina nɔ hewɔ ni minyɛmi nuu lɛ yɔɔ miishɛɛ waa nakai lɛ.”

Walter miiya nɔ eekase nii, ni eyaa kpeei daa. Ehaa saji ahetoo ni egbaa mɛi krokomɛi nibii ni ekase lɛ. Ekã shi faŋŋ akɛ, gbekɛ yoo fioo ni ji Abigayl lɛ haa wɔkaiɔ Israel gbekɛ yoo fioo ni ye ebua Naeman ni ebale Yehowa ni ji anɔkwa Nyɔŋmɔ lɛ.—2 Maŋtsɛmɛi 5:2-14.