Kasemɔ Nii Kɛjɛ Nyɔŋmɔ Wiemɔ Lɛŋ

Mɛni Hewɔ Abaptisiɔ Kristofoi?

Fã nɛɛ teɔ saji komɛi ní ekolɛ obi pɛŋ lɛ ashi, ni etsɔɔ o-Biblia lɛ mli hei ni obaanyɛ ona hetoi lɛ yɛ. Yehowa Odasefoi yɛ he miishɛɛ akɛ amɛkɛ bo aaasusu hetoi nɛɛ ahe.

1. Mɛni Kristofoi abaptisimɔ tsɔɔ?

Baptisimɔ ji gbɛ ni mɔ ko tsɔɔ nɔ ebiɔ Nyɔŋmɔ akɛ eesumɔ ni wekukpaa kpakpa akã ekɛ lɛ teŋ. No hewɔ lɛ, esa akɛ abaptisi Kristofonyo beni eda bɔ ni ebaanyɛ ekase Nyɔŋmɔ he nii ní ebatsɔ Yesu kaselɔ, shi jeee beni eji abifao. (Bɔfoi lɛ Asaji 8:12; 1 Petro 3:21) Kɛ́ mɔ ko kase Yesu famɔi lɛ ni eye nɔ lɛ, no dani ebatsɔɔ ekaselɔ.—Kanemɔ Mateo 28:19, 20.

Yesu bɔfoi lɛ abeaŋ lɛ, mɛi babaoo kase Nyɔŋmɔ kɛ Yesu he nii ní amɛshashaooo shi. Ákɛ nɔkwɛmɔnɔ lɛ, beni nuu ko ná ele akɛ Yesu gbele lɛ baanyɛ aha mɔ aná yiwalaheremɔ lɛ, amrɔ nɔŋŋ ni ebatsɔ Yesu kaselɔ. Ŋmɛnɛ lɛ, mɛi babaoo ni hiɛ tsui kpakpa ebatsɔmɔ Yesu sɛɛnyiɛlɔi.—Kanemɔ Bɔfoi lɛ Asaji 8:26-31, 35-38.

2. Mɛni hewɔ abaptisi Yesu?

Beni Yesu ye aaafee afii 30 lɛ, Yohane Baptisilɔ lɛ baptisi lɛ yɛ Yordan Faa lɛ mli. Yesu baptisimɔ lɛ damɔ shi kɛha eyiŋ ni ekpɛ akɛ ebaafee Nyɔŋmɔ suɔmɔnaa nii lɛ. (Hebribii 10:7) Nɔ ni fata enɛ he ji ewala ni no mli lɛ ebaaŋɔha akɛ afɔleshaa yɛ adesai ahe eshai ahewɔ lɛ. Dani Yesu aaajɛ ŋwɛi aba ní ebahi shikpɔŋ lɛ nɔ po lɛ, esumɔɔ e-Tsɛ Yehowa ni eboɔ lɛ toi be fɛɛ be.—Kanemɔ Marko 1:9-11; Yohane 8:29; 17:5.

  3. Mɛni hewɔ esa akɛ abaptisi Kristofonyo?

Wɔshihilɛ lɛ tamɔɔɔ Yesu nɔ̃ lɛ—afɔ wɔ akɛ eshafeelɔi. Ni kɛlɛ, Yesu afɔleshaa gbele lɛ haa wɔnáa wɔkɛ Nyɔŋmɔ teŋ wekukpaa kpakpa. (Romabii 5:10, 12; 12:1, 2) Yɛ anɔkwale mli lɛ, wɔbaanyɛ wɔtsɔmɔ enii—eweku lɛ mli bii. (2 Korintobii 6:18) Te wɔfeɔ tɛŋŋ wɔnáa nakai hegbɛ lɛ? Wɔ kome too pɛ wɔsɔleɔ wɔhaa Yehowa kɛjɔɔ wɔhe nɔ wɔhaa lɛ, ni wɔwoɔ lɛ shi akɛ wɔbaafee esuɔmɔnaa nii yɛ wɔwala bei ni eshwɛ lɛ fɛɛ mli. Kɛ́ wɔjɔɔ wɔhe nɔ wɔha lɛ sɛɛ lɛ, wɔhaa abaptisiɔ wɔ yɛ mɛi ahiɛ kɛfeɔ he okadi.—Kanemɔ Mateo 16:24; 1 Petro 4:2.

4. Te ooofee tɛŋŋ osaa ohe kɛha baptisimɔ?

Yehowa Odasefoi kɛ mɔ fɛɛ mɔ ni miisumɔ ni etsi ebɛŋkɛ Nyɔŋmɔ lɛ kaseɔ Biblia lɛ. Kɛ́ okase Biblia lɛ ni otee Kristofoi akpeei lɛ, ebaaha suɔmɔ ni oyɔɔ kɛha Nyɔŋmɔ kɛ hemɔkɛyeli ni oyɔɔ yɛ emli lɛ mli awa. No hu baaye abua bo koni oná sui kpakpai ní oba ojeŋ jogbaŋŋ. Kɛ́ oná suɔmɔ, hemɔkɛyeli, kɛ sui krokomɛi ni saa Nyɔŋmɔ hiɛ lɛ, nomɛi baaye abua bo koni oye shi ni owo Yehowa akɛ obaasɔmɔ lɛ kɛya naanɔ lɛ nɔ.—Kanemɔ Yohane 17:3; Hebribii 10:24, 25.

Kɛ́ ootao ole enɛ he sane babaoo lɛ, kwɛmɔ wolo nɛɛ ni Yehowa Odasefoi fee lɛ, Mɛni Biblia Lɛ Tsɔɔ Diɛŋtsɛ? yitso 18 lɛ mli.