NIKASEMƆ 5
Mɛni Ji Nyɔŋmɔ Yiŋtoo Kɛhã Shikpɔŋ Lɛ?
1. Mɛni hewɔ Nyɔŋmɔ bɔ shikpɔŋ lɛ?
Yehowa bɔ shikpɔŋ lɛ ehã adesai. Eji wɔshĩa. No hewɔ lɛ, abɔɔɔ Adam kɛ Hawa ni ji klɛŋklɛŋ nuu kɛ yoo lɛ koni amɛwo shwiei yɛ ŋwɛi—no mli lɛ Nyɔŋmɔ ebɔ bɔfoi yɛ ŋwɛi momo. (Hiob 38:4, 7) Yɛ no najiaŋ lɛ, Nyɔŋmɔ kɛ klɛŋklɛŋ nuu lɛ wo paradeiso fɛfɛo ko ni atsɛɔ lɛ Eden abɔɔ lɛ mli. (1 Mose 2:15-17) Yehowa kɛɛ lɛ akɛ ekɛ eshwiei ni ebaawo wɔsɛɛ lɛ baahi shikpɔŋ lɛ nɔ kɛya naanɔ.—Kanemɔ Lala 37:29; 115:16.
Shishijee lɛ, Eden abɔɔ lɛ pɛ ji paradeiso. Akɛɛ klɛŋklɛŋ nuu kɛ yoo lɛ akɛ amɛfɔ ni amɛyi shikpɔŋ lɛ nɔ obɔ. Be ni yi aaawula shi lɛ, amɛbaalɛɛ paradeiso lɛ mli kɛkpele shikpɔŋ muu lɛ fɛɛ nɔ. (1 Mose 1:28) Afiteŋ shikpɔŋ lɛ kɔkɔɔkɔ. Ebaakã he efee adesai ashĩa kɛya naanɔ.—Kanemɔ Lala 104:5.
Kwɛmɔ vidio ni ji Mɛni Hewɔ Nyɔŋmɔ Bɔ Shikpɔŋ Lɛ?
2. Mɛni hewɔ shikpɔŋ lɛ jeee paradeiso bianɛ?
Adam kɛ Hawa gbo Nyɔŋmɔ nɔ toi, no hewɔ lɛ Yehowa shwie amɛ kɛje abɔɔ lɛ mli. Paradeiso lɛ fite, ni adesa ko nyɛko ahã shikpɔŋ lɛ atsɔ paradeiso ekoŋŋ. Biblia lɛ kɛɔ akɛ: “Atu shikpɔŋ lɛ awo mɛi fɔji adɛŋ.”—Hiob 9:24.—Kanemɔ 1 Mose 3:23, 24.
Ani Yehowa baatsu eyiŋ ni eto kɛhã adesai lɛ he nii? Hɛɛ! Lɛ ji ofe. Enine nyɛŋ anyɛ shi kɔkɔɔkɔ. (Yesaia 45:18) Ebaaku sɛɛ ehã adesai ahi shi yɛ bɔ ni eto eyiŋ lɛ naa.—Kanemɔ Lala 37:11, 34.
3. Mɛɛ gbɛ nɔ Paradeiso baatsɔ aba ekoŋŋ?
Shikpɔŋ lɛ baatsɔ Paradeiso ekoŋŋ be ni Yesu yeɔ nɔ akɛ Maŋtsɛ ní Nyɔŋmɔ ehala lɛ lɛ. Yesu baanyiɛ Nyɔŋmɔ bɔfoi lɛ ahiɛ ni amɛbaakpãtã mɛi fɛɛ ni teɔ shi amɛwoɔ Nyɔŋmɔ lɛ ahiɛ yɛ ta ko ni atsɛɔ lɛ Harmagedon lɛ mli. Kɛkɛ lɛ, Yesu baawo Satan tsuŋ afii 1,000. Nyɔŋmɔ webii lɛ baaje hiɛkpatamɔ lɛ mli, ejaakɛ Yesu baatsɔɔ amɛ gbɛ ni ebaabu amɛhe. Amɛbaaná naanɔ wala yɛ Paradeiso mli yɛ shikpɔŋ lɛ nɔ.—Kanemɔ Kpojiemɔ 20:1-3; 21:3, 4.
4. Mɛɛ be piŋmɔ sɛɛ baafo?
Mɛɛ be Nyɔŋmɔ baafo efɔŋfeemɔ sɛɛ yɛ shikpɔŋ lɛ nɔ? Yesu kɛ “okadi” ko ni baatsɔɔ akɛ naagbee lɛ ebɛŋkɛ lɛ hã. Nibii ni yaa nɔ yɛ je lɛŋ amrɔ nɛɛ kɛ adesai ashihilɛ miiwo oshãra mli, ni etsɔɔ akɛ wɔyɛ “je nɛŋ naagbee” be lɛ mli.—Kanemɔ Mateo 24:3, 7-14, 21, 22.
Yesu baajɛ ŋwɛi eye shikpɔŋ lɛ nɔ afii 1,000, ni yɛ nakai be lɛ mli lɛ ebaahã piŋmɔi fɛɛ asɛɛ afo. (Yesaia 9:6, 7; 11:9) Kɛfata nii ni Yesu baatsu akɛ Maŋtsɛ lɛ he lɛ, ebaasɔmɔ akɛ Osɔfonukpa, ni ebaatsumɔ mɛi ni sumɔɔ Nyɔŋmɔ lɛ ahe eshai lɛ. No hewɔ lɛ, Nyɔŋmɔ baatsɔ Yesu nɔ ejie hela, gbɔlɛ, kɛ gbele.—Kanemɔ Yesaia 25:8; 33:24.
5. Namɛi baahi Paradeiso ni baaba wɔsɛɛ lɛ mli?
Kɛ́ otee Maŋtsɛyeli Asa lɛ nɔ lɛ, obaana mɛi ni sumɔɔ Nyɔŋmɔ ni miisumɔ ni amɛkase bɔ ni amɛbaafee amɛsa ehiɛ
Mɛi ni boɔ Nyɔŋmɔ toi lɛ baahi Paradeiso. (1 Yohane 2:17) Yesu tsu esɛɛnyiɛlɔi lɛ koni amɛyatao heshibalɔi ni amɛtsɔɔ amɛ bɔ ni amɛbaafee amɛsa Nyɔŋmɔ hiɛ. Ŋmɛnɛ lɛ, Yehowa miisaa mɛi akpekpei abɔ koni amɛhi Paradeiso mli yɛ shikpɔŋ lɛ nɔ wɔsɛɛ. (Zefania 2:3) Mɛi kaseɔ bɔ ni amɛbaafee amɛtsɔmɔ wumɛi kpakpai, tsɛmɛi kpakpai, ŋamɛi kpakpai, kɛ nyɛmɛi kpakpai, yɛ Yehowa Odasefoi a-Maŋtsɛyeli Asai lɛ anɔ. Gbekɛbii kɛ amɛfɔlɔi fɛɛ feɔ ekome kɛjáa Nyɔŋmɔ ni amɛkaseɔ bɔ ni amɛbaafee amɛná sane kpakpa lɛ he sɛɛ.—Kanemɔ Mika 4:1-4.
