Marta, ni eji Yehowa Odasefonyo yɛ Guatemala lɛ, miikase Kekchi wiemɔ lɛ koni enyɛ eshiɛ Biblia mli sane lɛ ehã mɛi ni wieɔ nakai wiemɔ lɛ. Gbi ko lɛ, ena nuu ko ni miishi helatsamɔhe ko. Be ni Marta na ehesaamɔ lɛ, eyɔse akɛ ejɛ Kekchi akrowa ko ni yɔɔ gɔji ni Yehowa Odasefoi efɔɔɔ shiɛmɔ yɛ jɛmɛ lɛ mli lɛ anɔ. Eyɛ mli akɛ Marta nuuu Kekchi wiemɔ lɛ jogbaŋŋ moŋ, shi eyanina nuu lɛ ni ekɛ lɛ gba sane.

 Marta kɛɛ lɛ akɛ ebaasumɔ ni ekɛ lɛ akase Biblia lɛ. Ekɛ miishɛɛ kpɛlɛ nɔ, shi ekɛɛ Marta akɛ ebɛ shika ni ekɛbaawo nikasemɔ lɛ he nyɔmɔ. Marta hã ele akɛ Yehowa Odasefoi kɛ mɛi kaseɔ Biblia lɛ ni amɛheee nɔ ko. Ekɛfata he akɛ amɛbaanyɛ amɛtsɔ foŋ nɔ amɛkase nii lɛ, ni eweku muu lɛ fɛɛ hu baanyɛ afata he kɛkase. Nuu lɛ kpɛlɛ nɔ. Akɛni nuu lɛ nyɛɔ ewieɔ Spanish ni ekaneɔ hu hewɔ lɛ, Marta hã lɛ Jeŋ Hee Shishitsɔɔmɔ lɛ eko yɛ Spanish mli. Agbɛnɛ hu, ehã lɛ wolo ko ni wɔkɛ mɛi kaseɔ, ni ji Mɛni Biblia Lɛ Tsɔɔ Diɛŋtsɛ? lɛ ni yɔɔ Kekchi wiemɔ mli lɛ eko? Enɔ otsi lɛ, Marta kɛ nuu lɛ, eŋa, kɛ amɛbii enyɔ lɛ bɔi Biblia lɛ kasemɔ yɛ foŋ nɔ. Ekɛ amɛ kase nii shii enyɔ yɛ otsi mli. Marta wie akɛ, “Akɛni minuuu Kekchi jogbaŋŋ hewɔ lɛ, wɔkaseɔ nii lɛ yɛ Spanish mli, ni nuu lɛ tsɔɔ shishi kɛyaa Kekchi mli ehãa eŋa lɛ. Shi gbekɛbii lɛ nuɔ Spanish.”

 Nuu lɛ ji osɔfo yɛ esɔlemɔ lɛ mli. Ebɔi esɔlemɔbii lɛ nibii ni Marta kɛ lɛ kaseɔ yɛ Biblia lɛ mli lɛ tsɔɔmɔ. Sɔlemɔbii lɛ nya nibii ni etsɔɔ amɛhe lɛ he waa ni amɛbi lɛ ni etsɔɔ amɛ he ni ekase tsɔɔmɔi hei nɛɛ yɛ. Be ni ekɛɛ amɛ akɛ mɔ ko baa ekɛ lɛ bakaseɔ Biblia lɛ, amɛ hu amɛbafata ehe ekomekome kɛkase. Gbii fioo komɛi asɛɛ lɛ, mɛi aaafee 15 babuaa amɛhe naa shi kome yɛ otsi mli ni Marta kɛ amɛ kaseɔ Biblia lɛ yɛ foŋ nɔ. Sɛɛ mli lɛ, amɛkɛ microphone fɔ̃ɔ foŋ lɛ he koni mɔ fɛɛ mɔ anu nikasemɔ lɛ.

 Be ni Marta gba esafoŋ onukpai lɛ sane nɛɛ lɛ, amɛteŋ mɔ kome tee eyasara Biblia mli nikaselɔi lɛ yɛ akrowa lɛ. Efɔ̃ amɛ nine koni amɛbabo maŋshiɛmɔ ni kpokpaa nɔkwɛlɔ a lɛ baahã yɛ akrowa ko ni ebaabi ni amɛta lɔle mli ŋmɛlɛtswaa kome ni amɛsaa amɛnyiɛ ŋmɛlɛtswai enyɔ kɛya lɛ. Amɛkpɛlɛ nɔ, ni amɛyi 17 tee amɛyabo lɛ toi.

 Otsii komɛi asɛɛ lɛ, kpokpaa nɔkwɛlɔ lɛ kɛ Odasefoi krokomɛi yaye gbii ejwɛ yɛ Biblia mli nikaselɔi lɛ aŋɔɔ. Leebi lɛ, amɛkwɛɔ vidioi yɛ jw.org lɛ nɔ yɛ Kekchi wiemɔ mli, ni amɛkaseɔ broshuɔ ni ji Namɛi Feɔ Yehowa Suɔmɔnaa Nii Ŋmɛnɛ? Kɛ́ eshɛ shwane lɛ, amɛkwɛɔ JW Broadcasting vidioi lɛ fãi komɛi. Agbɛnɛ hu, kpokpaa nɔkwɛlɔ lɛ to gbɛjianɔ koni amɛteŋ mɔ fɛɛ mɔ aná mɔ ko ni kɛ lɛ baakase nii.

 Gbii ejwɛ ni Odasefoi lɛ yaye yɛ jɛmɛ lɛ mli lɛ, amɛshiɛ amɛhã mɛi ni yɔɔ akrowai ni bɛŋkɛ Kekchi lɛ amli ni amɛfɔ̃ amɛ nine kɛhã kpee krɛdɛɛ ko. Yɛ nakai kpee lɛ shishi lɛ, nyɛmimɛi lɛ hã mɛi 47 ni ba lɛ fɛɛ le akɛ, amɛbaanyɛ amɛbi koni akɛ amɛ akase Biblia lɛ. Wekui nyɔŋma kɛ ekome kpɛlɛ koni akɛ amɛ akase.

 Nyɔji fioo komɛi asɛɛ lɛ, asafoŋ onukpai lɛ to gbɛjianɔ akɛ daa otsi naagbee lɛ amɛbaafee kpee yɛ nuu lɛ akrowa lɛ. Ŋmɛnɛ lɛ mɛi aaafee 40 baa kpeei nɛɛ daa. Ni be ni nyɛmimɛi lɛ yafee Yesu gbele lɛ Kaimɔ lɛ yɛ jɛmɛ lɛ, mɛi 91 sɔŋŋ ba, ni enɛ hã nyɛmimɛi lɛ ná miishɛɛ waa.

 Marta wie akɛ, gbi fɛɛ gbi ni ebaakai niiashikpamɔ nɛɛ kɛ nɔ ni jɛ mli kɛba lɛ, ekɛɔ akɛ: “Miida Yehowa shi waa. Bei komɛi lɛ, minuɔ he akɛ minyɛɛɛ mafee babaoo. Shi Nyɔŋmɔ baanyɛ ekɛ wɔ atsu nii kɛye abua mɛi krokomɛi. Ele nɔ ni yɔɔ nakai akrowa lɛ mli bii lɛ atsuii amli, ni egbala amɛ kɛba ewebii lɛ amasɛi. Yehowa sumɔɔ amɛ.”