E AKI tuangira te Baibara te tai are e bungiaki iai Iesu. Ma e tii kaotii bwaai ni kakoaua are e na ataaki iai bwa e aki bungiaki n Ritembwa.

Iangoa taraani kanoan te bong n te tai anne i Betereem, ike e bungiaki iai Iesu. Aia karuaiwa n namwakaina Iutaia ae Kitirewi (e iorooro ma Nobembwa/Ritembwa) bon te namwakaina ae kamwaitoro ae irianaki n te karau. Te namwakaina are imwina bon Tebeta (Ritembwa/Tianuare). E a korakora riki te kamwaitoro n te namwakaina aei, ao e bwaka te tinoo n taabo aika ririeta. Ti na noria bwa tera ae e taekinna te Baibara ni kaineti ma tauani kanoan te bong n te tabo arei.

E kaotia te tia korea te Baibara ae Etira bwa Kitirewi bon te namwakaina ae ataaki bwa e kamwaitoro ao e aomwaimwai. Imwin taekinan are a botaki aomata aika mwaiti i Ierutarem n “te karuaiwa n namwakaina [Kitirewi] ae 20 iai bongin te namwakaina,” ao e taekinna Etira bwa a “a rurubenebene . . . ibukin te karau ae korakora.” Ni kaineti ma kanoan te bong n te tai arei  ao a taku aomata ake a ikotaki: ‘Tain te kakarau ao ti aki kona n tei i tinaniku.’ (Etira 10:9, 13; Ieremia 36:22) Maroaka ae a rangi n rawa iai ni mena n te tawaana n te tairiki taani kawakin tiibu, ake n taabo akekei ma aia tiibu ngkana e roko Ritembwa!

E taekinna te Baibara bwa a tantani taani kawakin tiibu i buakoia aia tiibu ake a mena n te tawaana n te tairiki are e bungiaki iai Iesu. E katerea te tia korea te Baibara ae Ruka n te tai anne bwa taani kawakintiibu a “titiku i tinaniku ao a uatei n tantani n te bong i rarikin aia nanai” n uakaan ma Betereem. (Ruka 2:8-12) E teretere bwa a bon titiku i tinaniku taani kawakintiibu n te tai arei, ma tiaki n ae a tii otinako bwa a na nakonako iai n te ngaina ni kaukiang. A tiku aia nanai i rarikia n te tawaana n te tairiki. A kona ngkanne ni maeka n te tawaana kaain Betereem n Ritembwa, ni kaineti ma kanoan te bong ae te aamwaitoro ao te aomwaimwai? A bon aki. Mangaia are baika a riki n te tai are e bungiaki iai Iesu, a katereterea bwa e bon aki bungiaki Iesu n Ritembwa. *

E kaotaki n Ana Taeka te Atua te tai are e mate raoi iai Iesu, ma e uarereke te kamataataa ni kaineti ma te tai are e bungiaki iai. Ti kauringaki iai ana taeka te Uea are Toromon are e kangai: “E raoiroi riki te ara ae raoiroi nakon te kabira ae raoiroi, ao e raoiroi riki te bong ni mate nakon te bong ni bungiaki.” (Te Minita 7:1) Maroaka ae e bati rongorongon ana mwakuri ni minita Iesu n te Baibara ao matena, ma e karako taekani bungiakina.