E ngae ngke a tataku taan rabakau bwa iai rinanin nako te rawawatannano, ma e boni kakaokoro aron temanna ma temanna ni kaota rawawatan nanona. Ma te koaua bwa kakaokoron aroia aomata ni kaota rawawataia, nanona bwa iai ake a aki bati riki n rawawata ni buan aia koraki ke aongkoa akea aia kangaanga iai? Tiaki ngaia anne. E ngae ngke e kona n ibuobuoki kaotiotan rawawatan nanom, ma tiaki nanona bwa aongkoa iai angana ae riai. N angiin te tai e irekereke ma katein temanna ma temanna, anuana, baike e rinanoi ni maiuna, ao e irekereke naba ma aroni maten ae tangiraki.

A bae aomata aika nanokawaki n aki ataia bwa tera ae kona n riki, imwini maten ae a tangiria. Ma iai namakin ao kangaanga tabeua aika bon riiriki ao n angiin te tai a boni kariaaki rikia. Iangoi aikai:

Te taonakinako n te nanokawaki. Te taatang, te ururing, ao kai bibitakin te namakin, boni baika kona n riki. E kona ni korakora riki te nanokawaki n te ururing ke n te mii. Ma ko na bae moa ni mimi iai ao n aki kakoauaa. E uringa arona Tiina ngke e rina ni mate buuna ae Timo. E taku neiei: “E roko moa te ang ni mate ao I aki naba kona n tang. I rangi n taonakinako iai, n te aro are I a aki kona n ikeike n tabetai. I bon aki kona ni kakoauaa te bae riki.”

E riiriki naba i nanon tabeua te tai namakinan te tabeaianga, te un, ao te uringaaba. E taku Ivan: “Teutana te tai imwini maten natira ae Eric ae 24 ana ririki, ao I a rangi n un ngai ma buu ae Yolanda! Ti kubanako iai bwa ti aki kakoauaa ae aomata ngaira aika ti unun. Ti uringaaba naba, ao ti iaiangoia bwa tao ti boni kona ni karaoa ae bati riki ni buoka natira.” E namakina naba te uringaaba Alejandro, are e mate buuna man aorakina ae wenemaan, ao e taku: “N te moantai ao I iangoia bwa bon te aomata ngai ae I buakaka, ibukina bwa e kariaia te Atua bwa N na rangi ni karawawataaki n aron aei. Ao I a manga uringaaba riki ngke I a bukina te Atua ibukin te baere riki.” Ma e taku Kostas are e taekinaki n te kaongora are mai mwaina: “N tabetai ao I un iroun Sophia ngkai e a mate naba. Ao I a manga uringaaba ngkai I namakina anne. Ma bon tiaki ana bure Sophia.”

Te kangaanga ma arora n iango. Iai taai ake e a manga bitaki iai aron te aomata n iaiango ke e a manga aki boo ma ongina te baere e iangoia. N te katoto, e kona n iangoia te aomata ae nanokawaki, bwa e kona n ongo te aba bwanaan te aomata are mate, e namakinaki, ke n noraki. Ke e kona ni kangaanga iroun te aomata anne kaatuuan ana iango, ke n uringi bwaai. E taku Tiina: “N tabetai ngkana I kakaraki ao au iango e warewarenako! I iaiangoi baike a irekereke ma maten Timo. E karawawata ngkana ko a aki kona ni kaatuua raoi am iango.”

Te kan tiku i bon iroum. E kona te aomata ae rawawata nanona ni kakai ebu ke ni mwengabuaka i buakoia aomata. E taku Kostas: “Ngkana I mena i buakoia taanga, ao I namakina ae I tebe iai. Ma I nanamakina naba anne i buakoia ake akea buuia.” E ururing ni kangai buun Ivan ae Yolanda: “E rangi ni kangaanga te mena i buakoia aomata aika ngungureakini baika tiaki oi ni kangaanga ni kabotauaki ma ara kangaanga! Ma iai naba ake a kona ni karakini nakoira aron nakoraoini baike a karaoi natiia. I kukurei ibukia, ma e kangaanga naba bwa N na kakauongo irouia. I ataia ma buu ae e aki titiku n arona te maiu aei, ma e boni kangaanga bwa ti na kaaitarai baika riiriki iai ke n taotaon nanora iai.”

Rotakini marurungin te rabwata. E kona naba n aki rin te amwarake, e bibitaki rawawatan rabwatam, ao teini matum. E uringa te ririki Aaron are imwini maten tamana ao e taku: “E a kangaanga rerekeni matuu. I a bon ututi naba n te bong n te aoa ae titeboo ao n iaiangoa maten tamau.”

 E uringi taai Alejandro ake e rotaki iai marurungin rabwatana n te aro ae kaminonano, ao e taku: “I tuoaki tabeua te tai iroun te taokita ao I tuangaki ae I boni marurung. E a iangoaki bwa a riki aorakin rabwatau man rawawatan nanou.” A bon toki imwina riki. Ma e boni wanawana Alejandro ngke e motinnanoa kawaran te taokita. E kona te nanokawaki ni kamamaraa tautian te rabwata, ni kakorakoraa riki aorakim, ke ni karekea te aoraki ae boou.

E aki bebete karaoani baika kakawaki. E ururing ni kangai Ivan: “Imwini maten Eric ao ti a riai ni kaongoia tiaki tii ana koraki ao raoraona, ma bon raona naba ni mwakuri ao teuare e kakabooa tangoan ana auti. A bati naba booma aika kainnanoaki i aan te tua aika ti na kanoai. Ao ti na manga barongai ana bwai Eric. E tangiraki kaatuuan raoi te iango ni karaoani baikai ni kabane, ma n taai akanne a korakai ara iango, rabwatara, ao ti nanokawaki naba.”

Ma tabeman a a boo ma te kangaanga aei imwina riki, ngkana a a riai ni karaoi baike a boni kakaraoi ngkoa naake a tangiraki irouia ake a a tia ni mate. Anne te bae e rinanona Tiina. E kabwarabwaraa ni kangai: “Bon tatabeni ngkoa Timo te nanako n te bangke ao bwaai riki tabeua ibukin ara bitineti. Ma a a riki bwa tabeu ngkai, ao ai aron ae e a uaatao riki rawawatau. I kona ni karaoi baikai n te aro ae a na nakoraoi?”

Kangaanga aika tibwa taekinaki aikai, ae te maraki ao te korakai n te iango ao n te rabwata, e oti iai bwa e kona ni kangaanga te kekeiaki ma te rawawatannano. E boni kona ni korakora te maraki imwini buan temanna ae ti tangiria, ma moantaain ataakina e kona ni buokiia aika a rawawata bwa a na kona ni kekeiaki iai. Uringnga naba are a aki bane aomata n rotaki ni kangaanga ni kabane aika reke man te rawawatannano. Ma tao a kona ni kabebeteaki teutana naake a nanokawaki, n ataakin ae iai namakin tabeua aika bon riiriki ngkana e rawawata nanom.

Te bae kona n riki: Kammarakin te rawawatannano e na bon aki teimatoa. E na bon tabe ni kekerikaaki. Ma tiaki nanona bwa e a toki raoi rawawatan te aomata anne, ke e a mwaninga taekan te aomata ae tangiria are e a tia ni mate. Ma e a kerikaaki kammarakina teutana imwin teutana. A kona ni manga ueke namakin akanne ngkana a a manga oki ururing n taai aika aki kantaningaaki, ke n taai tabeua n aroni boong ni kauring. Ma imwina riki, angia aomata a a manga bon toki nanokawakia ao a a manga kona n iangoi raoi baika a na karaoi ni maiuia. E kona n riki aei ngkana e boutokaaki te aomata ae rawawata irouia ana utu ke raoraona, ao ngkana e karaoi naba bwaai tabeua aika riai bwa e aonga ni kekeiaki ma nanokawakina.

E na maanra? Irouia tabeman e toki rotakibuakaia iai i nanon tabeua namwakaina, ma a bati aika kabanea tao teuana te ririki ke uoua ao a a tibwa kona ni bebete. Ao iai naba aika a kainnanoa te tai ae maan riki. * E ururing ni kangai Alejandro: “E reitinako rawawatau ae korakora i nanon tao tenua te ririki.”

Ataa tian am konabwai. Iangoa te bong teuana ma kanoana, ao waaki n aron ae ko boni konaa, ao uringnga are e na bon aki teimatoa te rawawatannano ae korakora. Ma iai baika ko kona ni karaoi ni kabebetea iai rawawatan nanom ngkai, ao ni kamanoko naba man rotakim iai n te aro ae wenemaan?