Ko kona n ota n aia taeka naake a kateimatoa marurungin aia iango? Ko a tia n namakina naba aei—ke ko ataa temanna ae ko tangiria—ae e namakina naba aei?

Kakoauaa raoi bwa bon tiaki tii ngkoe n rinanona. A bati ni boong aikai aika rotaki n aorakin aia iango bwa tao e bon reke nakoia ke naake a tangiriia.

Ti kakoaua bwa ti a maeka n “taai aika okoro aika karuanikai” ake a karikii karawawata n aekaia nako. (2 Timoteo 3:1) N te ukeuke teuana ao e noraki bwa ni katobibia te aonnaba, tao temanna mai buakoia waniman aomata aika kabokorakora ma aorakin te iango. N rikin te aoraki ae te COVID-19 are kabutaa te aonnaba n 2020, tao e nakon 26 te katebubua rakan riki mwaitiia aika rotaki n te raraoma nakon are n 2019 ao 28 te katebubua rakani mwaitiia aika rotaki n te rawawatannano nakon are n 2019.

Ma e aki kona ni kabwarabwaraaki raoi marurungin ara iango n taiani ware. E boni kaineti aei ma am namakin ao aia namakin naake a tangiraki iroum, ao aroni maiumi iai.

Marurungin te iango bon namakinan ae nakoraoi arom n iaiango, ao n angiin te tai ko kakaraoi mwakuri aika raraoi. Ko kona ni kaaitarai tabeaianga aika aki toki n rinanoaki, e uaana am mwakuri, ao ko kukurei ni maium.

• E BON AKI reke mani mamaaran te aomata.

• BON te aoraki teuana ae karika te tabeaianga ae korakora, e uruana aron te aomata n iaiango, ana namakin, ao ai aroarona.

• E kona n angiin te tai n totokoa ana konabwai temanna n reitaki ma tabemwaang, n ikotaki ma arona ni kakaraoi baike a kainnanoaki ni katoabong ibukin te maiu.

•   E kona n ituia aomata n aki ongei aia ririki, aia katei, aia reeti, aia baronga, aia aaro, aia reirei, ke aia karekemwane.

Ngkana iai ae tangiraki iroum ke boni ngkoe ae ko namakini bitaki nakon aroarom, matum ke amwarakem, ke te rawawatannano ae teimaan, te raraoma ke te nanokawaki, ko na boni bae ni kainnanoa ae mwaatai bwa e na buokiko n ataa bukin rikini baikai ao ni bwainnaorakiko. Ma e na reke ia buokam?

E taku Iesu Kristo are te kabanea ni wanawana mai buakoia aomata: “A aki kainnanoa te taokita aomata aika marurung, ma a kainnanoia akana aoraki.” (Mataio 9:12) Naake a kabokorakora ma aorakin aia iango ao a karekei buokaia n te onnaoraki ma aia bwainnaoraki, a kona ni karaoa riki ae bati ibukini kauarerekeani kanikina ake a reke irouia, ao ni maiuna te maiu ae uaana ma ni kakukurei. A wanawana naake a waekoa ngkekei naba ni butimwaei bwainnaoraki imwain ae a a kakaiaki kanikina ake irouia. a

E ngae ngke tiaki bokin te bwainnaoraki te Baibara, ma iai bwaai i nanona aika kakawaki ibukini kamarurungan ara iango. Ti kaungako bwa ko na nori kaongora ake imwina ake a na kona ni kabwarabwaraa aron te Baibara ni buokira n tokanikai i aon aorakin ara iango.