I bungiaki i Santo Domingo, n te Dominican Republic, boni ngaira 4 ao ngai te bina. Bon aomata aika reireiaki raoi au karo ao a tangiriia naba natiia bwa a na karikirakeia bwa aomata aika raoiroi ao ni bwaina te koaua. Aua te ririki imwaini bungiau, ao a kaitiboo au karo ma mitinaren te Moomon. Ibukin anaakin nanoia n aron itiakia ma tamaroaia ataeinimwaane akanne, a a motinnanoia au karo n te tai ae waekoa bwa ti na riki bwa te moan utu i aon abara ni kaaina te Aro ae Ana Ekaretia Iesu Kristo Ibukia Aika Itiaki ni Boong aika Kaitira, ke te Moomon.

Ngke I a ikawairake, ao I iririi bobotaki n iraorao n te Aro ni Moomon ao e kakawaki irou kabanean au tai ma au utu ao te aroaro ni maiu ae riai. I kukurei n riki bwa kaain te Moomon ao I a katea tiau bwa N na riki bwa te mitinare.

Ngke ai 18 au ririki, a a mwaing au utu nakon te United States bwa I aonga ni karekea au reirei ae rietata ae raoiroi. Tao teuana te ririki imwina, ao a kawarira tarin tinau ma buuna aika kaain Ana Tia Kakoaua Iehova i Florida. A boni kaoira bwa ti na iriia nakon te bwabwaro ae boto i aon te Baibara. E bon anaaki nanou irouia aomata nako ake i rarikiu bwa a tarai kiibu ao ni korei baike a taekinaki. Ai ngaia are I a bubutii te kai ni koroboki ma te beeba ao ni kakairi irouia.

Imwin te bwabwaro ao a tuangai ai tinau ma ai tamau bwa ngkai I kan riki bwa te mitinare, a kona ni buokai n reiakina taekan te Baibara. I iangoia bwa bon te iango ae raoiroi bwa n te tai anne, e rangi ni bati au atatai i aon Ana Boki Moomon nakon te Baibara.

Inanon ara tai ni mamaroroakina te Baibara n te tareboon, ao a aki toki ni kaungaai ai tinau ma ai tamau bwa N na kabotaua au koaua ma te reirei n te Baibara. A bon tangirai bwa N na ukeri baika a taekinaki raoi n te Baibara.

A bati baika I a tia ni butimwaei ni kaineti ma aia onimaki  kaain te Moomon, ma I aki koaua raoi iai bwa a boraoi ma te bae e taekinaki n te Baibara ke a aki. E kanakoa nakoiu te maekatin ae te Awake! ai tinau, ae bwain Nobembwa 8, 1995 are e boreetiaki irouia Ana Tia Kakoaua Iehova ae a mena iai kaongora tabeua ibukin aia onimaki kaain te Moomon. I rangi ni kubanako bwa a bati riki ana reirei te Moomon ake I aki atai. Anne are e a kairai bwa N na kawara te atureti ae kakawaraki n te Internet are e boni karaoaki irouia kaain te Moomon ni kakoauaa raoi te baere e taekinaki n te Awake! E boni koaua, ao I a boni kakoauai riki iango akanne ngke I a nakon aia umwanibong kaain te Moomon i Utah.

I aki toki ngkoa ni kakoauaa bwa a inanoi Ana Boki Moomon ao te Baibara. Ma ngke I karaua raoi ni wareka te Baibara ao I a noria bwa bon iai te kauntaba i marenan ana reirei te Moomon ao are e taekinaki n te Baibara. N te katoto, e taekinaki n te Baibara n Etekiera 18:4 bwa e na mate te taamnei ae bure. Ma e taekinaki n Ana Boki Moomon n Aramwa 42:9 ae kangai: “E aki kona ni mate te tamnei.”

Irarikini kakaokoroni koaua, e bon aki naba rau nanou ni kaineti ma te nanonnaba are a angareirei iai kaain te Moomon. N te katoto, a reiakinia aomata kaain te Moomon bwa e mena te onnaroka are Eten i Jackson County, Missouri, U.S.A. A taekinna naba mataniwi n te Moomon bwa n te bong teuana, “e na tautaekana te aonnaba ni kabuta te Atua rinanon te tautaeka n te United States.”

I mimi bwa e na kanga te aba ae I bungiaki iai ke te aba riki teuana ni kona n riki aei nakoina. I bon taekinna naba n ara maroro n te tairiki teuana nakon te roro n rikirake temanna ae kaain te Moomon are e kataneiaaki bwa e na riki bwa te mitinare, ngke e tarebooniai. I karaua n titirakinna bwa e na ira te buaka ni kaaitaraia raona ni Moomon ngkana a buaka kaain abana ma aaba tabeua. I rangi ni mimi ngke e taekinna bwa e kona! I a kananoa riki au ukeuke i aon reirei ni kaineti ma au onimaki ao n titirakinia naba mataniwi n te Aro ni Moomon ake a onimakinaki. I bon tuangaki bwa a irekereke kaekaan au titiraki ma te miterio are e kona ni kaekaaki n te bong teuana, kaanga te oota ae e rikirake ootana.

Ibukin aki kukurein nanou n aia kabwarabwara, I a karaua n tirotiroa nanou bwa e aera ngkai I kan riki bwa te mitinare n te Moomon. I a ataia ae bukina teuana ae I kan riki iai bwa te mitinare bwa I kani buokiia aomata tabeman. Bukina riki teuana bwa a karineai iai aomata. Ma bon akea au atatai ibukin te Atua ni kaineti ma te bae e tangiria. E ngae ngke I a tia n nenera te Baibara n taai aika bati rimoa, ma I bon aki iangoia bwa e kakawaki. Bon akea au atatai ni kaineti ma ana kantaninga te Atua ibukin te aonnaba ke te botannaomata.

Inanon au tai n reirei n te Baibara ma Ana Tia Kakoaua Iehova, aikai bwaai tabeua aika I reiakin mai buakon taian reirei: Antai aran te Atua, tera ae riki n te mate, ao tera mwiokoan Iesu ni kakororaoan ana kantaninga te Atua. N tokina, I a rangi ni mwaatai n te boki ae rangi n tamaroa aei ao I kukurei n tibwai koaua ake I a tia n reiakin ma aomata. I ataia n taai nako bwa bon iai te Atua, ma I a tibwa ataia ngkai ae I kona n taetae nakoina rinanon te tataro kaanga raoraou ae I tatangiria. I bwabetitoaki bwa temanna Ana Tia Kakoaua Iehova n Turai 12, 2004 ao onoua te namwakaina imwina, I a moana au mwakuri ni kabwanina au tai n te mwakuri ni minita ni Kristian.

I mwakuri ni kautun aia botaki Ana Tia Kakoaua Iehova n te aonnaba i nanon nimaua te ririki. I rangi ni kukurei ngkai I a kona n ibuobuoki ni karaoani Baibara ao booki aika boto man te Baibara ake a kakabwaiaaki iai mirion ma mirion ni katobibia te aonnaba, ao I teimatoa naba ngkai ni buokiia aomata n reiakina taekan te Atua.