Ko Kona n Onimakini Aaro Aika Irekereke ma Kabonganaan te Mwane?
E katoatai Estelle * n iriri n te taromauri ma ataei tabeman. E taku neiei: “I tuanga au mitinare bwa I kan reiakina te Baibara.” Ma e aki reireinaki neiei iroun teuaei. N tokina, e aikoa irira te taromauri. E reitia ni kangai: “A kororeta mataniwi n te Aro ao n taekinna bwa ngkana I aki kona n roko n te taromauri, N na tii kanakoa te mwane. I taku: ‘A bon aki tabeakinai ngkana I iri n taromauri ma a tii tangira au mwane.’”
E taku Angelina ae rangi n taua te Aro: “E kabutaki te raurau tenua te tai n taai n taromauri ni kabane n au Aro, ao ti kantaningaaki bwa ti na anga ara karemwangko ni katoaa butina. A tangira te mwane n taai nako. I taku i nanou: ‘Bon akea taamnein te Atua irouia.’”
A karaoi mwakuri ni kairoro aika kakaokoro naba Aaro aika n am aono nakoia aia aomata bwa a na aanga te mwane? E boraoi anne ma ae taekinaki n te Baibara?
TERA ANA REIREI TE BAIBARA?
E taku Iesu are e moani katea te Aro ni Kristian: “Kam anganaki n akea boona, aanga naba n aki kabooaki.” (Mataio 10:8) E aki riai ni kabooaki n te mwane te rongorongo ae kakawaki man te Baibara, ma e riai n reke irouia aomata nako ake a tangiria.
Tera aroia Kristian rimoa ni kaineti ma te kabanemwane n te ekaretia?
A bon anga n tatabemania nako n aron are e “kataua i nanona temanna ma temanna, tiaki n aron ae akea nanona iai ke e tebonaki nako iai, bwa te Atua e tangira ane anga ma kukurein nanona.” (2 I-Korinto 9:7) E taku te abotoro Bauro: “Ngke ti tataekina ngkoa [te] rongorongo ae raoiroi . . . ti mwakuri naba ni ngaina ao ni bong bwa ti aonga n aki karawawataa temanna i buakomi n te kabanemwane ae bati.” (1 I-Tetaronike 2:9) E boni karaoi umwanrianna Bauro bwa boutokaan ana mwakuri ni minita.—Mwakuri 18:2, 3.
A KANGA ANA TIA KAKOAUA IEHOVA NI KAKORORAOA AEI?
A taneiai ni bobotaki Ana Tia Kakoaua Iehova n Taabo n Taromauri aika tau buburaia ao n aki bobuaka. A kanga ni mwanenaki? Akea te karemwangko iai ao a aki naba kanakoi tinaniku ni bubutii ibukin te mwane ni buoka. Ma ngkana iai ae kani kaota nanona ni kaitau ibukini kaetieti n amwarake n taamnei, e kona ni kabwakaa ana bwaintangira n te bwaoki n te Tabo n Taromauri n akea ae ataia.
E boni bobuaka boreetian te maekatin aei ao kantokana n te kaibuke. Ma ko aki kona n nora te katanoata ibukini karikirake ke bubutii ibukin te mwane. E kaatuuaki riki iai tibwaan te koaua man te Baibara.
Tera am iango: E boraoi te mwakuri aei ma ana taeka Iesu ao aia katoto Kristian ake rimoa?
^ A bitaki aara tabeua ni kaongora aikai teuana imwin teuana.
Tera aroia Aaro ae riai ibukini mwanenakin aia waaki?
