E taekina ae kangai Janet: “Teutana te tai imwini maten tamau ao e a manga tuangai buu bwa e a reke raona temanna. E aki maan imwin anne, e a booti ana bwai ao ni kitanai ma natiu aika uoman n aki kaboo nakoira.” E a reke ana mwakuri Janet ma e aki tau boona ibukin tikuia n aia auti. Ao e a bati riki ana kangaanga irarikin te karekemwane. E ururing ni kangai: “E rangi ni korakora raraomau ibukini mwaitin tabeu aika I riai ni karaoi ngkai ai tii ngai. I nanokawaki ngkana I aki katauraoi baika bati ibukia natiu n aroia kaaro ake tabeman. I raraoma naba ngkai bwa tera aia iango aomata ibukiu ma natiu. A iangoia bwa I riai ni karaoa ae bati riki ibukini kateimatoaan au mare?”

E buokaki Janet n te tataro bwa e na taobaraa ana namakin anne ao ni kateimatoa reitakina ma te Atua. “Te tai ae kangaanga riki irou bon te tairiki bwa ngkana e mabu ao e a korakora riki iai raraomau. E buokai te tataro ao warekan te Baibara bwa N na matu raoi. Te kibu ae mamate nanou iai bon I-Biribi 4:6, 7 ae kangai: ‘Tai raraomaeakina te bwai teuana, ma a na kaotaki ami bubutii ni bwaai ni kabane nakon te Atua, n te tataro ma te kakorakora n tataro ni bubutii n raonaki n te katituaraoi, ao te rau are mairoun te Atua ae riaon aia iango aomata, e na kawakin nanomi ma ami iango.’ I kabanea au tai n tataro i nanon tairiki aika bati ao I namakina kabebetean nanou n ana rau Iehova.”

A kaineti nakon raraoma n aekaia nako ana taeka Iesu aika karaunano ibukin te tataro n ana Kabwarabwara i aon te Maunga aikai: “E a kaman atai baika kam kainnanoi te Atua ae Tamami, imwain ae kam butiia.” (Mataio 6:8) Ngaia are ti riai ni bubutiia. Te tataro bon te anga ae manena are ti kona ni “kaania [iai] te Atua.” Ao tera mwina? “Ane e na [manga] kaaningkami.”—Iakobo 4:8.

Eng, e bati riki buokara ae ti kona ni karekea n te tataro nakon ae tii kabebetean nanora n raraomara. E na bon tei Iehova are ‘te tia ongo tataro’ ibukia aomata nako aika ukoukoria n onimakinna. (Taian Areru 65:2, BG) Anne bukina are e reireinia iai taan rimwina Iesu bwa a na “tataro n aki toki ma te botumwaaka.” (Ruka  18:1) Ti riai ni butiia te Atua ibukin ana kairiri ao ana ibuobuoki n taai nako ao n onimakinna bwa E na boni kakabwaiaa ara onimaki. Ti aki riai n nanokokoraki ni karaoan ae E tangiria ke konabwaina n tei ibukira. Ngkana ti “tataro n aki toki” n aron aei, ti a kaotia iai bwa ti onimaki ni koaua.—1 I-Tetaronike 5:17.

Ma tera raoi ae nanonaki n te onimaki? E irekereke te onimaki ma ‘riaira n ataa’ te Atua bwa kaanga bon te aomata. (Ioane 17:3) Ti kona ni karaoa anne ngkana ti karina moa ana iango te Atua rinanon te Baibara. Ti ataia bwa e norira n tatabemanira nako ao e kani buokira. Ma e ngae n anne, e bati riki ae nanonaki n te onimaki ni koaua nakon ae tii ataakini bwaai tabeua ibukin te Atua. E nanonaki naba iai karekean ao karinean te reitaki ae kaan ma ngaia. E kakoauaaki anne n reitakia aomata bwa ti aki kona ni kateimatoa te aeka n reitaki anne n te tai ae waekoa. E kona n teimatoa n “ririkirake” ara onimaki ngkana ti reiakina riki taekan te Atua, n arora ni “kakaraoi baike a kakukurei nakoina” ao ngkana ti rinanon ana ibuobuoki ae korakora. (2 I-Korinto 10:15; Ioane 8:29) Bon anne te aeka n onimaki are e buoka Janet bwa e na tokanikai i aon raraomana.

E taku Janet: “Te bwai ae buokai ni koaua are e kakorakoraa au onimaki bon norani bain Iehova n aanga nako ni kaineti ma au kangaanga. A a bati taai aika ti kaaitara iai ma te ribuaka ae taraa ni kangaanga te tokanikai iai. Man arora n tatataro, e a karekea te anga Iehova ae ti na buutakinako iai man te kangaanga are I aki kona ni karaoia i bon irou. Ngkana I kaitaua ao I uringa te baere e a tia ni karaoia nakoiu. E aki toki ni buokira n te tai are ti kainnanoia iai ao e roko raoi n taina n taai nako. E karekeia naba raoraou ni koaua aika mwaane ma aine aika Kristian. A tauraoi n taai nako ibukiu ao a a katei banna ni katoto aika raraoi ibukia natiu. *

“I ataa bukina ngkai e taekinna Iehova ni Maraki 2:16 (BG) bwa e ‘riba te raure.’ Bon te bwai ae rangi ni karawawata nakon te rao ni mare ae akea ana bure. Imwin ririki aika bati ngke e kitanai buu, I bon namakina te maroaa ao akean bongau. Te bwai ae aki toki ni buokai ngkana e roko te namakin anne irou boni karaoan te bwai teuana ae na buokaki iai temanna.” Mangaia are e buokaki Janet mani maiuakinani booto n reirei n te Baibara bwa e na kekerikaaki raraomana. *—Taeka N Rabakau 18:1.

E taku Janet: “E rangi korakora kabebetean nanou man ataakin ae te Atua bon ‘tamaia akana a mate tamaia, ao te tia kaeti taekaia aine aika a mate buia.’ E na bon aki kitanira n aron are e karaoia buu.” (Taian Areru 68:5, BG) E ataia Janet ae e aki kona te Atua ni kataira “ni baika bubuaka.” Ni kaitaraan anne, e bon anga te wanawana te Atua “bwa e tituaraoi . . . nakoia aomata ni kabane” ao “te korakora ae riaoni korakoraia aomata” bwa a aonga ni buokaki n tokanikai i aon raraomaia.—Iakobo 1:5, 13; 2 I-Korinto 4:7.

Ma tera arora ngkana ti a raraoma ibukin maiura bwa e a ruanikai?