A a tia Ana Tia Kakoaua Iehova ni kamanenai Baibara aika kakaokoro n aia ukeuke n reirei n te Baibara. Mai buakoni Baibara nako n taetae ake a rairaki iai, ti kakaitau riki n Te Baibara ae Tabu​—Te Rairai ae te Aonnaba ae Boou bwa e kamanenaaki iai aran te Atua, e eti raoi kanoana, ao e mataata.

•   Kamanenaakin aran te Atua. A a tia taani katauraoa te Baibara tabeman ni kabwaka n anga te karineaki nakon teuare te tia Koreia. N te katoto, te rairai n te Baibara teuana e karinani araia aomata aika 70 tabun ake a ibuobuoki ni korean te Baibara. N te Baibara naba aei, ao a bane ni kamaunaaki iai aran te tia Koreia, ae Iehova ae te Atua!

   Ma Te Rairai ae te Aonnaba ae Boou, e kaoka aran te Atua aika nga ma nga nakon taabo ake e koreaki iai n te moani Baibara, ao a teimatoa n aki ataaki araia kaain te komete ake a katauraoia.

•   E eti raoi. Iai naba Baibara tabeua aika a aki kaewei kanoan te Baibara nikawai. N te katoto, n te Baibara teuana ao e rairaki Mataio 7:​13 ni kangai: “Kam na ri nanon te mataroa ae e wariki. Ba e warebwe mataroani mone ao e rababa kawaina.” Ma te moani Baibara e kamanena te taeka ae “kamaunanakoaki,” ao tiaki “mone.” Tao a karina te taeka ae “mone” taan rairai ibukina bwa a kakoauaa ae a kammarakaki aomata aika buakaka n te ai ni moone n aki toki. Ma e aki boutokaaki te iango anne n te Baibara. Ngaia are e warekaki n te aro ae eti raoi n Te Rairai ae te Aonnaba ae Boou ni kangai: “Riin n te mataroa ae wariki, bwa e raababa te mataroa ma ni mwawaawa te kawai ae tiki nakon te kamaunanakoaki.”

•   E mataata. E na aki tii eti raoi te rairai ae raoiroi, ma e na mataata ao ni kai ota. Iangoa te katoto aei. E kamanena te kibuntaeka ae rairaki bwa “te taamnei ae buroburo” te abotoro Bauro n I-Rom 12:11. Kioina ngkai e a aki bati n ota nanon te kibuntaeka anne ni boong aikai n te taetae n Ingiriti, e a rairaki n Te Rairai ae te Aonnaba ae Boou n te aro ae e kai ota. E taekinaki iai bwa a riai Kristian n “ingainga rinanon taamnein te Atua.”

 E aki tii kamanenaaki aran te Atua n Te Rairai ae te Aonnaba ae Boou, e eti raoi, ao e mataata te aba iai, ma e bon tibwatibwaaki naba n akea boona. Ibukin anne, a a kona mirion ma mirion aomata ni wareka te Baibara n oin aia taetae, n ikotaki naba ma naake a bon aki kona ni kabooa aia Baibara.