Jezun sanglolem: “Veg-vegllea zageancher vhodd bhuimkamp zatole. Toxench bhuk poddttoli ani pidda posortoli.” (Lukas 21:10, 11) Tor heo ghoddnneo eka borabor ghoddttat tednam “Devachem Raj laginch asa” mhunn amkam kollon ieta. Punn heo ghoddnneo khorench sonvsarbhor ghoddleat kai? Ani teo ekach borabor ghoddttat kai? Tem vixim ami zannam zaum-ia.

1. ZHUZAM

1914-nt, jem vixv zhuz zalʼlem tache poros vhodd zhuz kednach zaunk naslem! Itihaskar sangtat hem vixv zhuz zalea uprant sonvsarachi poristhiti sarkich bodolʼli. Karonn hea zhuzant poilim kednanch uzar korunk na titlea vhodd promannan hotʼtearam uzar kelʼlim. Zoxem vimanantlean bomb uddoile, machine gun, bomb uddoupachi gaddi, vikari gas, ani her bhirankull hotʼtearam uzar kelʼlim. Ani uprant dusrea vixv zhuzant poilech pavtt nuclear bomb uzar kele. Tor 1914 thaun zhuzam chaluch asat ani tantunt lakʼkhamnim lok moron gele.

2. BHUIMKAMP

Encyclopedia Britannica sangta ki vorsak sumar xembor bhuimkamp zatat, zaka lagon “zaitem luksonn” zata. Amerikentlea Geological Survey pormonnem 1,900 vorsam thaun dor vorsak, sumar 16 vhoddle bhuimkamp zait astat. Punn thoddim mhunnot itlo vhoddlo ankddo amkam melltta karonn bhuimkamp khoim zata tem sodhun kaddunk amchea lagim aiz sadhonam asat. Hem khorem zait, punn khorem mhunnttlear sonvsarbhor aiz zaite bhuimkamp zatat. Ani taka lagon zaitea lokamnim aplo jiv hogddaila. Tea bhair, zaite tras ani luksonn pasun zalam.

 3. JEVNNACHEM UNNEMPONN

Sonvsarbhor zhuz, broxttachar, poixeanchem unnemponn ani pik piddʼddear zata dekhun jevnnachem unnemponn zata. The World Food Programme “2018 Year in Review” oxem sangta: “Akʼkhea sonvsarant, 82 korodd, dha lakh lokank sarkem jevonn mellona. Ani tantuntle 12 korodd challis lakh lok bhuken mortat.” Dor vorsak sumar 31 lakh bhurgeank ghottai melltta toslem jevonn mellona dekhun tim mortat. 2011-nt akʼkhea sonvsarant jitlim bhurgim melim tantuntlim 45 tokʼke bhurgim heach karonnak lagon meleant.

4. DUENSAM ANI PIDDA

World Health Organization-achem ek prokaxon oxem sangta: “21-avea xekddeant zaitim vhodd duensam ani pidda aileo, zoxem cholera, plague ani yellow fever. Tea uprant him duensam porotui ailim. Tea bhair SARS, pandemic influenza, MERS, Ebola ani Zika oslea duensank lagon zaiteancho jiv gelo.” Ani halinchi COVID-19 pidda akʼkhea sonvsarant posorli. Aiz duensam vixim bori zannvai aslole zaite dotor ani vidneanik asat, toxech bore ilaz pasun asat. Tori astana, lokanchim duensam borim korunk tanche lagim zaunk na.

5. AKʼKHEA SONVSARANT PORGOTTNNECHEM KAM

Jezun anik eke ghoddnne vixim oxem sanglolem: “Soglea raxttrank govai mellche khatir Rajeachi bori khobor akʼkhea sonvsarant porgott zatoli, ani tea uprant xevott ietolo.” (Matev 24:14) Ami polloilem toxem sonvsarbhor vaitt ghoddnneo ghoddot astat. Tori astana soglea raxttram thaun 80 lakham poros chodd lok Devachea Rajeachi bori khobor porgottit asat. Ani hem kam 240 desamnim ani 1000-am poros chodd bhasamnim kortat. Oxem munxachea itihasant kednanch zaunk na.

Jezun sangloleo ghoddnneo aiz ghoddot asat. Punn ami hacher kiteak dhean diunk zai? Karonn Jezun mhunnttlem: “Heo vostu ghoddttat tem tumi polloitat tednam Devachem Raj laginch asa mhunn zannam zaiat.”​—Lukas 21:31.

Jezun sangloleo ghoddnneo ani Bible-antlea her bhasaunneam udexim amkam kollon ieta ki, Devachem Raj sorgar 1914 hea vorsa suru zalem. a Tea vellar Devan tacho put Jezu Kristak tea Rajeacho Raza mhunn nemlo. (Stotr 2:2, 4, 6-9) Beginuch hem Raj sonvsarantleo sogleo razvottkeo kabar kortolem. Tor tem Raj hea prithumer razvottki choloitolem tednam, hi prithum ek sobit bag zatoli ani thoim munxam sasnak khuxalkaien jietolim.

Tor beginuch, “tujem Raj ieum. Tuji khuxi sorgar zata, toxi sonvsarant zaum,” Jezun magnneant mhunnttlolim him utram purnn zatolim. (Matev 6:10) Tor hem Raj 1914 thaun aiz meren kitem korit asa? Ani hem Raj munxancher razvottki choloitolem tednam kitem boreponn haddttolem?