Jezun lokank, sodanch eka-meka lagim xanti korunk xikoilem. Punn eka vellar, tannem aplea apostlank oxem mhunnttlem: “Hanv prithumecher xanti haddunk ailam mhonn somzum nakat; xanti nhoi, punn torvar haddunk Hanv ailam; kiteak putak tachea bapaicher add, dhuvek tiche avoicher add, sunek tiche sasucher add doxim korunk Hanv ailam.” (Mt. 10:34, 35) Tor Jezuchea hea utrancho orth kitem aslo?

Jezu familint futt ghalunk sodhinaslo. Punn tache xikounnek lagon thoddea familimnim futt poddttoli mhunn taka khobor asli. Tor bautizm gheun Jezuche xis zaunk sodhtat tannim ugddas dovrunk zai, ki tanchea hea nirnnoiak lagon tanchea familichim sodoxio ghoddie khuxal aschimnant. Thodde pavtti tancho kazari sangati vo tanchea familiche sodoxio tancho virodh korunk puro. Ani hea pasot, Jezuchi xikounn pallunk tankam kotthin zaunk xokta.

Bible amkam “soglleam lagim xantin jieunk” urba dita. (Rom. 12:18) Punn thodde pavtti, familintlo eklo Jezuchi xikounn apnnaita ani her familintle sodoxio tacho virodh kortat tednam, Jezuchi xikounn tanchea familint ek “torvar” koxi zaunk pavta. Osle poristhitint, familintle her sodoxio, sot xiktat tachim ‘dusmanam’ zaunk pavtat.—Mt. 10:36.

Thodde pavtti, Jezucho pattlav kortat tanchim sotant naslolim familichim sodoxio tancher dobhav ghalunk puro. Udharonnak, tanchim familichim sodoxio porbo-festam monounk tancher dobhav ghalunk xoktat. Tor hea vellar tim Jehovak ani Jezuk khuxal kortolim vo aplea familichea sodoxiank khuxal kortolim, ho nirnnoi tannim gheunk zai. Tannim Jezuchea hea utrancho ugddas korunk zai: “Mhoje-von aplea bapaicho vo avoicho odik mog kortat tim Mhaka laik nhoi.” (Mt. 10:37) Punn hea utrantlean, aple xis zatat tannim aplea avoi-bapaicho unno mog korcho, oxem Jezu sangonk sodhinaslo. Tache bodlek, tanchea jivitant kitem chodd mhotvachem tem tannim koxem tharaunk zata, tem to tankam xikoitalo. Tor sotant naslolim amchim familichim sodoxio amcho virodh korta zalear pasun ami tancho mog korit ravonk zai. Punn Devacho mog korop amchea jivitant sogleam-von chodd mhotvachem mhunn ami ugddas dovrunk zai.

Khorench, amche famili thaun amkam dhumallo sosunk poddtta tednam amkam khub dukh zata. Punn Jezuche xis zalolean ami Jezuchim him utram ugddas dovortat. Tannem mhunnttlem: “Zo konn aplo trasancho khambo ubarunk toiar na ani mhojea fattlean ieunk toiar na to mhozo xis zaunk purto na.” (Mt. 10:38, NW) Tor ami Kristanv asat dekhun amchi famil amcho virodh korta tednam ami tem sostat. Punn ek dis amcho virodh korpi amchim familichim sodoxio aplem mon bodoltolim ani Bible-antlo sondex xikonk lagtolim mhunn ami bhorvonso dovortat.—1 Ped. 3:1, 2.