Karaloʼuta namüinjatka na Hebreokana 13:1-25
-
Sajaʼttiamüin nünüiki Pablo sünain achiawaa jee aluwataashi nia nünüiki süpüla nasakünüin na anoujashiikana (1-25)
13 Ayataʼaya aijiraain jia maʼaka aijiraain wanee wayuu namaa nuwalayuu.
2 Ayataʼaya kamaneein jia sümüin wayuu süka eejanainkain na wayuu nnojoliikana atüjaain saaʼu aapieein nümaʼanajeejana Maleiwa na antapünaakana nepialuʼu, kamaneepejeʼe naya namüin.
3 Soto jaaʼin na juwalayuu püreesakana, müinjana chakaijaʼaya jaaʼin püreesain wanaa namaa otta soto jaaʼin na wayuu müliakana atumawaa süka ayatayülinña katüin joʼu saaʼu tü mmakat.
4 Kojutajatü sümüin wayuu kasaalüin wanee wayuu, nnojotkalaka nuʼluwajiraainjachin nukuwaʼipa* wanee wayuu sümaa wanee wayuu nnojotka nuʼwayuusein, jama süsaleenain nutuma Maleiwa na wayuu aʼluwajiraakana nakuwaʼipa otta müshiʼiya na wayuu kawalaʼatakana atuma naʼwayuuse.*
5 Nnojo kachiiruain jaaʼin washirüü, talata jaaʼin sümaa tü kasa eekat jümaʼana. Anuu nünüiki Maleiwa: «Nnojoleechi pia tapütüin pümüiwaʼa».
6 Shiakalaka anain aluʼu yalayalale waaʼin sünain maa: «Nia Jehová* akaalinjaka taya, nnojoleechi mmoluin taya, ¿jamajeechikaʼa taya sutuma wayuu?».
7 Soto jaaʼin na wayuu oʼunirakana jukuwaʼipa, na aküjakana jümüin süchiki nünüiki Maleiwa. Jüshatüinjatü nanoula sünainjee jiʼrüin anain sukuwaʼipa tü kasa naaʼinrakat.
8 Matüjainsat aʼwanajawaa nukuwaʼipa Jesucristo, tü nukuwaʼipapuʼukat sümaiwa paala ayatüsiaʼaya müin shia maaʼulu jee ayateeriaʼaya müin shia waneepia.
9 Nnojo jaapaain sümaa pütchi naatajatü, tü wattakat saalii. Tü akatchinreetkat jaaʼin shia kamaneein jümüin chi Maleiwakai, nnojotsü shiain akatchinreerüin jaaʼin tü eküütkat,* jama nnojoleerüin anain nukuwaʼipa wanee wayuu shiale neʼe jülüjain naaʼin tia.
10 Eesü wamaʼana tü aʼajünakalü aaʼu wanee kasa nümüin Maleiwa, na wayuu aʼyataakana suluʼu tü aʼwaajüleekat* nnojoishii süpüla neküin tü kasa eʼitaanakat saaʼu tia aʼajüleekat.
11 Tü mürüt oʼutunapuʼukalü aaʼin aʼajünapuʼusü anooipaʼa sünain tü pueulokot jee müsia tü süshakat niʼikajaapuʼuin chi laülaashikai napüleerua na sacerdotekana suluʼumüin tü kuatta wulekat. Naaʼinrüin tia süpüla sülaʼajaanüinjatüin saainjala wayuu suulia.
12 Müshijaʼaya neʼe Jesús, eʼrüshi nia müliaa chaa anooipaʼa sünain tü pueulokot süpüla wuleinjatüin sukuwaʼipa wayuu nutuma sünainjee tü nüsha amülakat.
13 Anashii woʼunule eere nia chaa anooipaʼa sünain tü pueulokot, weʼreenakalaka tü japülii niʼrakat.
14 Yaa eere waya, nnojotsü wanee pueulo eeinjatkat waneepia, shia wachajaaka maʼin tü pueulo eeinjateetkat.
15 Anakajaʼa waʼwaajüle chi Maleiwakai waneepia sünainjee kanoulain waya nünain Jesús. Waaʼinrüle tia, müshiijaʼa wasülajakai aaʼin wanee kasa nümüin Maleiwa jee waküjain sümüin wayuu süchiki tü nünüliakat.
16 Nnojo motuin jaaʼin jaaʼinrüinjanain kasa anasü süpüleerua wayuu jee jüsülajüinjanain namüin wanee kasa eekai jümaʼanain, jama talatüin naaʼin Maleiwa jaaʼinrüle tia.
17 Joonoo sümaa nanüiki na wayuu oʼunirakana jukuwaʼipa jee jüüjüü jia namüin, jama nasouteenain nümüin Maleiwa saaʼu naaʼinmajüin jia. Naainjeetkalaka tia sümaa talatüin naaʼin, nnojoleerü akulajaain naaʼin, jama mojeerüin jukuwaʼipa nnojoliire jaa jümüin.
18 Ayataʼaya juʼuraajüin wapüleerua, jama watüjaain saaʼu wulein tü suluʼukat waaʼin, shia wachekaka achiki lotuinjatüin sukuwaʼipa süpüshuaʼa tü kasa waainjakat.
19 Shiapejeʼe tachuntuin maʼin jümüin juʼuraajüinjanain tapüleerua süpüla taleʼejamaatüin chaa jümaʼanamüin.
20 Chi Maleiwa eekai atuma jimataa aaʼin nüsoʼireʼera aaʼinchi süchikijee outaa chi Waseñotsekai Jesús, müsü eekai saaʼin waneepia nümaa Jesús tü isha apansaajünakalü aka tü pütchikat, nia chi arüleejüi atüjakai maʼin arüleejaa tü anneetkalüirua.
21 Wachuntuin nümüin chi Maleiwa aapakai jimataa aaʼin, naapaiwa süpüshuaʼa tü kasa choʼujaakat jümüin süpüla jaaʼinrüin tü nüchekakat jee nükaalinjaiwa waya süpüla waaʼinrüin tü kasa nüchekakat nükajee Jesucristo. Kasataalejeseʼe nuʼwaajünüin chi Maleiwakai süpüla kaʼikat süpüshuaʼa. Amén.*
22 Tawalayuwaa, tachuntuin maʼin jümüin nnojoliinjanain jukulajaain aaʼin sümaa tü pütchi taküjakat jümüin, tü takatchinrakalü aka jaaʼin, jama paliʼirüin neʼe tü pütchi tashajakat jümüin.
23 Anakajaʼa jütüjaale saaʼu nüjütünüitchipain achiki Timoteo süchikijee püreesaa. Nüntamaatüle maalü, oʼuneena waya piamaleʼeya sünain anaʼlawaa jümüin.
24 Jüsakai tamüin na oʼunirakana jukuwaʼipa jee müshiʼiya napüshuaʼa na aneekuushikana. Nasaküin jia na wawalayuu yaakana Italia.
25 Kasataalejeseʼe kamaneein chi Maleiwakai jümüin jüpüshuaʼa.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Tü aluwataanakalü anain süchiki jamüinjatüin sukuwaʼipa tü eküütkat.
^ «Na aʼyataakana nümüin Maleiwa» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
