EKIRAJAAYA 15
¿Jarai chi kanüliakai Jesús?
Watta naalii na wayuu aapüinnakana nüchiki Jesús. Wainmapejeʼe na nnojoliikana eʼraajüin maʼin nukuwaʼipa. Naatayaa müsü tü jülüjakat naaʼin nüchiki Jesús. ¿Jamüsü sünüiki tü Bibliakat nüchiki Jesús?
1. ¿Jarai chi kanüliakai Jesús?
Chashi Jesús chaa iipünaa, meʼrujusai nia otta pülashi nia. Akumajünüshi nia palajana nutuma Jehová süpülapünaa nukumajüin süpüshuaʼa tü kasakalüirua. Müshijeseʼe «niʼirumakai Maleiwa» nümünüin (Colosas 1:15, TNM). Saashin tü Bibliakat nia Jesús «chi waneeshikai Nüchoin» Maleiwa, süka jamüin, nnojolin jaralin eejachin nümaa Jehová wanaa sümaa nukumajüin Jesús (Juan 3:16). Aʼyataashi mapa Jesús nümaa Jehová sünain akumajaa süpüshuaʼa tü kasakalüirua (paashajeʼera Proverbios 8:30). Ayatüshia aleewain maʼin Jesús maaʼulu nümaa Jehová. «Pütchi» münüshi nia süka nünüikimaain nia waneepia. Nüküjain sümüin wayuu süchiki Nünüiki Maleiwa jee süchiki tü nuluwataakalü anain (Juan 1:14).
2. ¿Kasapülajachi nüntaka Jesús mmapaʼamüin?
Alatüirü suulia 2.000 juya süchikijee naaʼinrüin Jehová wanee kasa pülasü: nülatirüin Jesús suluʼumüin süchoʼunla wanee wayuu majayüt, María sünülia. Naaʼinrüin Jehová tia süpüla wayuuinjachin Jesús (paashajeʼera Lucas 1:34, 35). Antüshi Jesús mmapaʼamüin süpüla niainjachin chi Mesíaskai jee chi Cristo münakai, nuʼtteʼerüinjatü tü wayuukalüirua. a Süpüshuaʼa tü pütchi aküjünatüjütkalia suluʼu tü Bibliakat nüchiki chi Mesíaskai, ekeraajüsü tia pansaa sümaa nukuwaʼipa Jesús. Müsüjeseʼe wayaawatüin saaʼu niain Jesús «chi Nüchonkai chi Maleiwa matüjüinkai ouktaa» (Mateo 16:16).
3. ¿Kasa naaʼinraka Jesús maaʼulu?
Asoʼiraasü naaʼin Jesús süchikijee outuin nia jee nuʼunaka sirumatuʼumüin. «Eʼitaanüshi nia nütüma Maleiwa süpüla kojutüinjachin sütüma wayuu» (Filipos 2:9). Aapünüsü laülawaa nümüin Jesús nutuma Jehová, jama pülashaatain maʼin Jehová.
WEKIRAJAA SOOʼOMÜIN
Wekirajaa sooʼomüin süchiki jaralin maʼin Jesús otta jamüin choʼujaaka wekirajaain nüchiki.
4. ¿Niachejeʼeya neʼe Jesús chi Maleiwa Pülashikai maʼin?
Mayaainjeʼe pülashin Jesús saashin tü Bibliakat, jüüjüüshi nia nümüin Jehová, chi Nüshikai. ¿Jamüsü watüjaaka saaʼu tia? Jünaja tü VIDEOKOT süpüla jiyaawatüin saaʼu Pülashaatain maʼin Maleiwa nuulia Jesús.
Sünainjee tü pütchi suluʼujeejatkat tü Bibliakat, wayaawata aaʼu kasain Jesús nünain Jehová. Jaashajeʼera tü pütchikat otta yooto jia süchiki tüü:
Jaashajeʼera Lucas 1:30-33.
-
Naashin chi aapieekai, ¿kasa Jesús nünain Jehová, «chi Maleiwa Miyoʼushikai maʼi»?
Jaashajeʼera Mateo 3:16, 17.
-
¿Jamüsü sünüiki tü pütchi ojuʼitakalü iipünaajee soʼu woutiisain Jesús?
-
¿Jara kanüikika tia pütchikat?
Jaashajeʼera Juan 14:28.
-
¿Jaraiche chi laülaakai otta chi aluwataakai? ¿Niache nüchon wanee wayuu niataapa chi nüshikai?
-
«Chi Tashikai» wanaa sümaa nümüin Jesús, ¿kasa nüküjeeka achiki?
Jaashajeʼera Juan 12:49.
-
¿Nüküjainche Jesús niajiraainya neʼe nümaa chi Nüshikai? ¿Jamüsüjaʼa pünüiki süchiki tia?
5. ¿Jamüsü watüjaaka saaʼu niain Jesús chi Mesíaskai?
Watta saalii tü pütchi aküjünatüjütkalia suluʼu tü Bibliakat wayaawataka anainjee niain Jesús chi Mesíaskai, chi nüneekajalakai Maleiwa süpüla nuʼtteʼerüin wayuu. Jünaja tü VIDEOKOT. Aküjünüsü yala waneirua pütchi ekeraajaka nüchiki Jesús wanaa sümaa yaajachin nia saaʼu tü Mmakat.
Jaashajeʼera tü pütchi aküjünatüjütkalia nüchiki Jesús otta yooto jia süchiki tüü:
Jaashajeʼera Miqueas 5:2 süpüla jütüjaain saaʼu jalainjachin jemelin chi Mesíaskai. b
-
¿Ekeraajüsüche nüchiki Jesús tia pütchikat? (Mateo 2:1).
Jaashajeʼera Salmo 34:20 otta Zacarías 12:10 süpüla jütüjaain saaʼu kasain aainjünajatüin nüka Jesús soʼu nuʼutunuin aaʼin.
-
¿Ekeraajüsüche süpüshuaʼa tia pütchikat? (Juan 19:33-37).
-
¿Nukumajüinche neʼe Jesús sukuwaʼipa süpüla shikeraajüin tü pütchi aküjünatüjütkalia nüchiki?
-
¿Kasa pütüjaka nüchiki Jesús sünainjee tia?
6. ¿Kasa anasü weʼreetka wekirajaale nüchiki Jesús?
Süküjain wamüin tü Bibliakat weʼreenain kasa anasü wekirajaale nüchiki Jesús otta süchiki kasain aneekünüin apüla nia nutuma Maleiwa. Jaashajeʼera Juan 14:6 otta 17:3, TNM otta yooto jia süchiki tüü:
-
¿Jamüsü choʼujaaka maʼin wekirajaain nüchiki Jesús?
Aleewashii waya nümaa Maleiwa nünainjee Jesús. Nikirajüin wayuu sünain tü shiimainkat nüchiki Jehová otta eesü süpüla katüin woʼu waneepia nünainjee.
EESHII WAYUU EEKAI NAMÜIN: «Jiakana Aküjaliikana pütchi, nnojoishii jia anoujain nünain Jesús».
-
¿Jameerü pünüiki sümüle wayuu pümüin?
WATÜJAAITPAKA AAʼU
Pülashi Jesús otta meʼrujusai nia, Nüchon nia Maleiwa otta nia chi Mesíaskai.
Pusouta shiʼipajee
-
«Chi niʼirumakai Maleiwa» ¿jamüshi nümünaka Jesús?
-
¿Kasa naaʼinrapuʼuka Jesús süpülapünaa joʼuuin nia yaa saaʼu tü Mmakat?
-
¿Jamüsü watüjaaka saaʼu niain Jesús chi Mesíaskai?
PÜNAʼLA SOOʼOMÜIN
Pikirajaa sooʼomüin nüchiki Jesús, chi Mesías nüneekajalakai Maleiwa.
Pikirajaa sünain jamüin «Nüchon Maleiwa» sümakat tü Bibliakat nüchiki Jesús.
«¿Jamüshi ‹Nüchon Maleiwa› nümünaka Jesús?» (Pütchi suluʼuka jw.org)
Pikirajaa süchiki jamüin nnojoika niainya neʼe Jesús chi Maleiwakai otta tü nüpülainkat.
«¿Niachejeʼeya neʼe Jesús chi Maleiwakai?» (Aapiria Wayuu, aaʼuriiroʼu 1, 2009)
Paashajeʼera süchiki wanee wayuu eeʼirataka sukuwaʼipa süka shikirajaain süchiki nukuwaʼipa Jesús.
«Süpansaajirüin sunoula wanee wayuu judío» (¡Eeja Waaʼin!, maayoʼu 2013)
a Wekirajaajeerü anain sünain ekirajaaya 26 otta 27 jamüin choʼujaaka noʼtteʼennüin na wayuukana otta jamüin niaka Jesús oʼtteʼerüin naya.
b Paashajeʼera tü nootakat 2 süpüla pütüjaain saaʼu joujaleechin niiʼiyataaka saaʼu tü Mmakat chi Mesíaskai.
Eesüjaʼa kamalainjeerüle pümüin aashajeʼeraa tüü
SÜSAKIRAWAIKA ANAIN WAYUU
¿Jamüsü sukuwaʼipa shikirajia wayuu sünain tü Bibliakat natuma na Aküjaliikana pütchi?
Pikirajaale sünain tü Bibliakat namaa na aküjaliikana pütchi nüchiki Jehová, eesü süpüla pikirajaain süka tü Biblia eekat pümaʼana otta puunejaain püpüshi jee paʼaleewainyuu.
