1. ¿Jamüsü nukumajaka Maleiwa tü Mmakat?

NAAINJAIN Maleiwa tü Mmakat süpüla talatüin otta nnojoluin ayuulin wayuu suluʼu. Saashin tü Wiwüliakat ‹niʼitaain Jeʼwaa wanee apain suluʼu Edén› jee ‹niweetirüin wunuʼulia eekai anachoin sümaa jemetüin süchon›. Mapa nukumajaka Adán sümaa Eva, niʼitaaka naya suluʼu tia mmakat, nümaka namüin: ‹Anakajaʼa kachonniire jia, jouluiwa jia sainküin tü mmakat süpüla laülaainjanain jia saaʼu tü kasa mmapaʼajatkat› (Génesis 1:28; 2:8, 9, 15). Keeʼireesü naaʼin Maleiwa kachoinjanain na wayuukana, paʼaraiisüinjatüin tü Mmakat natuma jee naaʼinmajüinjanain na mürütkana.

2. (1) ¿Jamüsü watüjaaka saaʼu shikeraajeerüin tü nümakat Jeʼwaa süchiki tü Mmakat? (2) ¿Jaralii na kepiainjanakana waneepia saaʼu tü Mmakat?

² ¿Ekeraajeetche tü nümakat Jeʼwaa kepiainjatüin wayuu suluʼu wanee paʼaraiisü? Müshi nia: «Tü tanüiki tojuʼitirakat, tekeraajeerü shia» (Isaías 46:9-11; 55:11, TNM). Nikeraajeerü Jeʼwaa süpüshuaʼa tü nüküjakat. «Naainjüin tü wayuukalüirua süpüshuaʼa, tü wattakat saalin shiʼipapaʼa sainküin mmakat, süpüla eeinjatüin shia süpaʼa»  (Aluwataaushikana 17:26). ¿Jaralii na kepiainjanakana suluʼu tü Mmakat? ¿Jeʼrainjana kaʼi suluʼu? Müsü tü Wiwüliakat: «Na lotokana akuwaʼipa, nayeena kepiaka saaʼu tü mmakat süpüla kaʼika süpüshuaʼa» (Salmo 37:29, TNM; Alateetkat Mapeena 21:3, 4).

3. ¿Kasa eeka maaʼulu saaʼu tü Mmakat? ¿Kasa tü wasakirüinjatkalü anain?

³ Nnojoliyülia ekeraajüin tia pütchikat. Ayuuishii, ouktüshii otta atkaajiraashii na wayuukana. Naatajaasü sukuwaʼipa tü Mmakat. Nnojotsü nücheküin Jeʼwaa mojuinjatüin sukuwaʼipa. ¿Jamüsü mojuka sukuwaʼipa? ¿Jamüsü nnojotka shikeraajüin tü keeʼireekat naaʼin Maleiwa? Nnojotsü aküjünüin wamüin tia suluʼu tü karaloukta ashajuushikat süchiki kasa sümaiwajatü süka chajatüin shia oʼttuin sirumatuʼu.

4, 5. (1) ¿Jarai chi kanüikiyaakai atuma wanee wüi sümüin Eva? (2) ¿Jamüshi süpüla kaʼruwaralin wanee wayuu?

⁴ Saashin Génesis eejaashi wanee nüʼünüü Maleiwa chaaʼaya Edén. Mayaapejeʼe «wüi» nümünüin, nnojoishi wülin nia. Saashin Alateetkat Mapeena nia ‹chi wüi sülaülakai yolujaa kanüliakai Satanaa, chi eʼikeʼerakai wayuu sainküin tü mmakat›. «Chi wüi nümaiwajaikai» münüshi nia (Génesis 3:1; Alateetkat Mapeena 12:9). Aapiee pülashi otta meʼrujusai nia. Kanüikiyaasü wanee wüi nutuma sümüin Eva maʼaka kanüikiyaain atumaa wanee wayunkeera. Eejachi chia aapieekai wanaa sümaa nukumajüin Maleiwa tü Mmakat süpüla wayuu (Job 38:4, 7).

⁵ Watüjaa aaʼu anain maʼin tü kasa nukumajalakat Jeʼwaa. ¿Jara akumajaka «Satanaa chi Yolujaakai»? Chia aapieekai Yolujaashi nümüiwaʼa. ¿Jamakuwaʼipat tia? Müshi aka naaʼin wanee wayuu eeka kaʼruwaralin süchikijee lotuin paala nukuwaʼipa. ¿Jamüshi nuʼluwajaka?  Shia süka jülüjain naaʼin wanee kasa mojusü. Ayatüle jülüjain naaʼin shia, keeʼireejeerü maʼin naaʼin. Mapa eesü süpüla naainjain shia (paashajeʼera Santiago 1:13-15).

6. ¿Jamüshi süpüla Satanaa chi Yolujaakai nümünüinjachin wanee aapiee?

⁶ Shia alataka nümüin Satanaa tia. Naapüin tü nüküjakat Jeʼwaa nümüin Adán otta Eva kachoinjanain naya süpüla jouluin nooʼuliwoʼu sainküin tü Mmakat (Génesis 1:27, 28). Müshi Satanaa: «¡Eeshi süpüla suʼwaajüin taya süpüshuaʼa wayuu nuulia Maleiwa!». Tü jülüjakat maʼin naaʼin Satanaa naainjain shia, makalaka nimeejüin Eva sükajee nüküjüin naʼalain nüchiki Maleiwa (paashajeʼera Génesis 3:1-5). Sutuma tia, «Yolujaa» münüshi süka «nüküjüin alawaa». «Satanaa» münüshi süka «nüʼünüüin» nia Maleiwa.

7. (1) ¿Jamüshi ouktaka Adán sümaa Eva? (2) ¿Jamüshii laülaaka jee ouktaka waya?

⁷ Aküjüshi Satanaa naʼalain otta nimeejüin Adán sümaa Eva süpüla nnojoluinjanain noonooin sümaa nünüiki Maleiwa (Génesis 2:17; 3:6). Sutuma tia, ouktüshii naya maʼaka nüküjüin shia Maleiwa (Génesis 3:17-19). Sutuma kaainjalain Adán, kaainjalashii napüshuaʼa na nuuʼuliwoʼukana (paashajeʼera Roma 5:12). Tia alatakat müsü aka saaʼin wanee aainjia keesü eeka sumoʼolotuuin. ¿Jameerü tü keesü aainjünakat süka? Kamojuleerü. Müshiʼiya waya, kaainjalashii süka ‹kaainjalain› Adán. Sutuma tia, laülaashii jee ouktüshii waya (Roma 3:23).

8, 9. (1) ¿Jamüsü nünüiki Satanaa nüchiki Jeʼwaa? (2) ¿Jamüshii nnojoliika ouktüin nutuma Maleiwa na eʼrüliikana wayumüin?

⁸ Nekiipuʼushi Satanaa na eʼrüliikana wayumüin wanaa sümaa naainjirüin kasa mojusü Adán otta Eva. Nujuyaajüin Jeʼwaa, mojusü nünüiki süchiki sukuwaʼipa tü nuluwataayakat. Müshi nümakai: «Aküjüshi Maleiwa naʼalain namüin na nuluwataakana aaʼu jee nnojotsü  naapeein kasa anasü namüin. Nnojotsü choʼujaain namüin na wayuukana nuluwataain naaʼu, eesü süpüla naneeküin tü kasa eekat anain jee tü eekat mojuin. Aneerü nakuwaʼipa noonoole sümaa tanüiki». ¿Kaseerü naainjaka Maleiwa sutuma tia? Anashiijeʼe noʼutünüle aaʼin eeshii eekai namüin. Naainjale Maleiwa tia, ¿niiʼiyatüinjee  nüküjüin naʼalain Satanaa? ¿Niiʼiyatüinjee anain sukuwaʼipa tü nuluwataayakat?

⁹ Lotusü maʼin nukuwaʼipa Jeʼwaa, makalaka nnojoluin noʼutüin naaʼin na eʼrüliikana wayumüin. Nuuʼulaain naya süpüla sütüjaanüin aaʼu nüküjüin naʼalain Satanaa. Nuuʼulaain na wayuukana süpüla naluwanaajiraain naaʼu sümaa naainjain tü nümakat Satanaa. Suluʼu ekirajaaya 11 aküjüneerü jamüin naainjaka Jeʼwaa tia otta jamüin nuuʼulaaka sülatüin wainma kaʼi süpüla nünoukteʼerüin sukuwaʼipa tü nüküjakat Satanaa. Püsakira paaʼin jooluʼu: ¿aainjashi Satanaa kasa anasü nümüin Adán otta Eva süpüla nanoujain tü nünüikikat? Aküjüi alawaa Jeʼwaa naashin Adán sümaa Eva, ¿anasüche tia namakat süchikijee naapüin Jeʼwaa kasa anasü namüin? ¿Kasajeʼe paainjaka?

10. ¿Kasa paainjainjatka süpüla poonooin sümaa nünüiki Jeʼwaa?

¹⁰ Anasü wasakirüle waaʼin sünain tia süka sülatüin wamüin kasa eeka müin aka saaʼin tia. Süpüla poonooin sümaa nünüiki Jeʼwaa, püneeka nia süpüla nuluwataain paaʼu. Piiʼiyateetka mayaa nüküjüin alawaa chi Yolujaakai (Salmo 73:28; paashajeʼera Proverbios 27:11). Mayaapejeʼe wainmain maʼin wayuu saaʼu tü Mmakat, palitchon na aneekakana Jeʼwaa. Sutuma tia, wasakirüin waaʼin: ¿aluwataashiche Satanaa saaʼu tü Mmakat saashin tü Wiwüliakat?

11, 12. (1) ¿Jamüsü watüjaaka saaʼu nuluwataain Satanaa saaʼu tü Mmakat sükajee tü naainjakat nümüin Jesuu? (2) ¿Kasa pütchi eeʼiyataka niain Satanaa aluwataain saaʼu tü manoujainsatkalüirua?

¹¹ Nütüjaa aaʼu Jesuu nuluwataain Satanaa saaʼu tü Mmakat. Soʼu wanee kaʼi, niiʼiyatüin chi Yolujaakai nümüin Jesuu ‹tü suumainkalüirua wayuu sümaa tü suwashirüinkat ›, nümaka nümüin: ‹Püsapainyoʼukale pia tamülatuʼu sünain puʼwaajüin taya, taapeerü pümüin  süpüshuaʼa tü suumainkalüirua wayuu› (Mateo 4:8, 9; Lucas 4:5, 6). Nnojorüle nukoroloin Satanaa suumainkalüirua wayuu, ¿nuuʼulaküinjeʼe naaʼin Jesuu süka? Nnojotsü nunjulajüin Jesuu nukoroloin chi Yolujaakai tü niiʼiyatakat, nnojorüle nukoroloin chi Yolujaakai tü suumainkalüirua wayuu, nnojotsüjeʼe naapüin shia nümüin Jesuu.

¹² Jeʼwaa nia chi Maleiwa pülashikai maʼin, chi Kakumalakai tü kasakat süpüshuaʼa (Alateetkat Mapeena 4:11). Akatsaʼa saashin tü Wiwüliakat nnojoishi niain Jeʼwaa otta Jesukürisüto aluwataain saaʼu tü Mmakat. Naashin Jesuu nia Satanaa «chi aluwataashikai naaʼu na manoujainsaliikana [saaʼu tü mmakat]» (Juan 12:31; 14:30; 16:11). Saashin tü Wiwüliakat, Satanaa nia «chi aluwataakai saʼaka wayuu manoujainsat» (2 Corinto 4:3, 4). Müshi chi aluwataaushikai Juan: ‹Tü manoujainsatkalüirua süpüshuaʼa, nia aluwataaka saaʼu chi Yolujaakai› (1 Juan 5:19).

13. ¿Jamüsü choʼujaaka wanee mma jeketü?

¹³ Amojujaasü maʼin sukuwaʼipa tü Mmakat. Atkaashii na surulaatkana, aainjashii kasa mojusü na sünainpünaakana poliitika, piama oʼupünaachii na shikiipuʼukana tü iküleesia nnojotkat shiimain otta eeshii na oʼutüliikana saaʼin wayuu. Nnojotsü süpüla sünoukteʼennüin tia. Saashin tü Wiwüliakat najaʼttirüinjana Jeʼwaa naya soʼu Armagedón, süchikijee eeinjana na lotushiikana akuwaʼipa suluʼu wanee mma jeketü (Alateetkat Mapeena 16:14-16).

14. ¿Jara nüneekaka Jeʼwaa süpüla Sülaülain tü Nuluwataayakat? ¿Jamüsü sünüiki tü Wiwüliakat süchiki tia?

¹⁴ Nüneeküin Jeʼwaa süpüla Sülaülain Jesukürisüto tü  Nuluwataayakat. Müsü tü Wiwüliakat paala: ‹Aneekuushi chi joʼuukai nutuma Maleiwa süpüla nuluwataainjachin. Müichia nnojolin ooʼulaain suulia aluwatawaa› (Lucas 1:32, 33). Naashin Jesuu achuntüinjana na nikirajüinkana saaʼu tia aluwataayakat, müshi nia: ‹Pünta maalü sünain aluwatawaa süpüla saainjünüin tü keeʼireekat paaʼin saaʼu tü Mmakat maʼaka chaaʼaya sirumatuʼu› (Mateo 6:10). Wekirajaajeerü anain mapeena sajaʼttirüinjatüin Nuluwataaya Maleiwa süpüshuaʼa suluwataaya wayuu otta shia eeinjatka süchikumüin (paashajeʼera Daniel 2:44). Süchikijee paʼaraiiseerü tü Mmakat sutuma.

15. ¿Kasa wayuu tü «jeketkat mma»?

¹⁵ Saashin tü Wiwüliakat eejeerü ‹wanee mma jeketü otta tü wanee kasakalüirua chaka iipünaa. Watüjaa aaʼu sülateerüin tia süka pansaain nünüiki Maleiwa› (2 Pedro 3:13; Isaías 65:17). Wanaa sümaa saashajaain tü Wiwüliakat süchiki tü «mmakat» eeshii nayale na wayuukana (Génesis 11:1). Tü «jeketkat mma» naya na wayuu anakana nümüin Maleiwa.

16. ¿Kasa nüsülajüinjatka Maleiwa namüin na anamiakana nümüin? ¿Kasa waainjainjatka süpüla katüin woʼu waneepia?

¹⁶ Paʼaraiisüpa tü Mmakat naashin Jesuu «eeinjana nümaa Maleiwa waneepia [katüinjatü noʼu waneepia, TNM]» na anamiakana nümüin (Marcos 10:30). Süpüla pütüjaain saaʼu tü paainjainjatkat süpüla katüin poʼu waneepia paashajeʼera suluʼu tü Wiwüliakat Juan 3:16 otta 17:2, 3. Wekirajaa sünainjee tü Wiwüliakat tü kasa anasü eeinjatkat nutuma Maleiwa suluʼu tü Paʼaraiisükat.

17, 18. ¿Jamüsü watüjaaka saaʼu eeinjatüin jimataa aaʼin otta anaa akuwaʼipaa saaʼu tü Mmakat?

¹⁷ Nnojoleerü kasa mojusü, atkawaa otta kaainjalaa.  «Nnojoleechi chi mojulaashikai [...]. Akanasaʼa na anamiakana namüinjeerü tü mmakat.» (Salmo 37:10, 11, TNM). Nnojoleerü atkawaa süka ‹najaʼttirajatüin Maleiwa tü atkawaakat suluʼupünaa süpüshuaʼa tü mmakat› (Salmo 46:9, TNM; Isaías 2:4). Sülatapa tia, «eejeerü lotoo akuwaʼipaa» otta «jimataa aaʼin waneepia maʼaka eein waneepia chi kashikai» (Salmo 72:7, TNM).

¹⁸ Aneerü nakuwaʼipa na aʼyataakana nümüin Jeʼwaa. Anapuʼusü nakuwaʼipa na israeliitakana wanaa sümaa noonooin sümaa nünüiki Maleiwa (Levítico 25:18, 19). ¡Aneerü maʼin wakuwaʼipa suluʼu tü Paʼaraiisükat maʼaka naaʼin na israeliitakana! (paashajeʼera Isaías 32:18; Miqueas 4:4.)

19. ¿Jamüsü watüjaaka saaʼu wainmeerüin eküülü suluʼu tü mma jeketüinjatkat?

¹⁹ Nnojoleerü choʼujaain eküülü. Müshi David: ‹Wainmeerü eküülü saaʼu tü mmakat otta saaʼupünaa tü uuchikat› (Salmo 72:16, TNM). Aneerü nakuwaʼipa na oonookana waneepia sümaa nünüiki Jeʼwaa otta «wainmeerü eküülü saaʼu tü mmakat nutuma Maleiwa» (Salmo 67:6, TNM).

20. ¿Jamüsü watüjaaka saaʼu paʼaraiisüinjatüin tü Mmakat?

²⁰ Paʼaraiisüinjatü tü Mmakat. Eeinjatü piichi anasü otta mma anasü süchikumüin tü mma namojujakat na wayuukana (paashajeʼera Isaías 65:21-24; Alateetkat Mapeena 11:18). Mapa, aneerü maʼin tü Mmakat otta wainmeerü eküülü saaʼu, meerü aka tü mmakat Edén. ‹Ojutaleechi najapü Maleiwa jee naapeerü namüin napüshuaʼa na katoʼuchiikana tü keeʼireekat naaʼin› soʼu kaʼika süpüshuaʼa (Salmo 145:16, TNM).

21. ¿Jamüsü watüjaaka saaʼu maüseerüin mürüt sümüin wayuu?

²¹ Maüseerü mürüt sümüin wayuu. Kotteena sünain ekajawaa na mürüt jashichikana namaa na maüsükana.  Nnojoleechi mmoluin wanee jintüi seema tü mürüt jashichikat maaʼulu (paashajeʼera Isaías 11:6-9; 65:25).

22. ¿Kaseerü alataka namüin na ayuuishiikana?

²² Nnojoleerü ayuulii. Sülaülapa Jesuu Nuluwataaya Maleiwa, niiyajeena napüshuaʼa na ayuuishiikana (Mateo 9:35; Marcos 1:40-42; Juan 5:5-9). «Nnojoleechi eein wanee wayuu eeka nümüin: ‹Ayuuishi taya›.» (Isaías 33:24, TNM; 35:5, 6.)

23. ¿Jamüsü talateetka waaʼin sutuma süsoʼiraainjatüin naaʼin na ouktüshiikana?

²³ Asoʼiraajeerü naaʼin na wapüshi eekana ouktüin jee nnojoleena ouktüin nachikuaʼa. Asoʼiraajeerü naaʼin napüshuaʼa na sotokana naaʼin Maleiwa. ‹Asoʼiraajeerü saaʼin tü eekai saaʼinrüin tü anasükat jee tü mojusükat› (Aluwataaushikana 24:15; paashajeʼera Juan 5:28, 29).

24. ¿Jamüsü saaʼin pümüin kepiaa suluʼu tü Paʼaraiisükat?

²⁴ Anasü maʼin tü aapünajatkat namüin na ekirajaweekana maʼin nünain Jeʼwaa otta na aʼyataweekana nümüin. Tü Paʼaraiisü eeinjatkat, nüküja achikit Jesuu nümüin wanee wayuu kaainjarai ouktaka naʼatoʼu, müshi nia nümüin: «Cheechi pia tamaa chaʼaya ‹paraíso› » (Lucas 23:43). Anasü maʼin wekirajaale maʼin nüchiki Jesukürisüto süka niainjachin kanainjeein tü kasa anasü antajatkat.