Anashaatasü maʼin sukuwaʼipa tü mmapaʼakat sutuma nuwarala chi kaʼikai. Miyoʼusü wunuʼuliakat sutuma, wüitüsü shia, kasiisü otta kachonsü. Saapaain tü wunuʼuliakat tü wüinkat sükajee suurala, wüitaka shia sutuma. Oʼunusü tü wüinkat sünainjee suurala süraloʼuleʼeyamüin tü wunuʼukat, shiasaʼa sünainjee süpanakalüirua akaʼitsü iipünaamüin tü wüinkat süpüla sirumainjatüin shia. Alatüsü tia sutuma naaʼayula chi kaʼikai.

Anashaatasü maʼin tü juyakat. Naapajala Maleiwa wamüin süpüla wapünajüin otta wakotchojüin süchon waʼttia. Eesü emiraa jee talataa aaʼin sutuma.

Watta naalii na wayuu shapaakana maʼin naaʼin süchiirua nousütüin tü neküinjatkat otta tü nasheʼinjatkat napüshi. Anuu tü sümakat tü Wiwüliakat: «Jülüja jaaʼin sukuaippa tü wuchiikalüirua. Mapünajüinsat shia je manaajaalasat shia shiküin, nnojotpaja eʼrüin jamü shia, süka shikinnüin nütüma chi Jüshikai Maleiwa chakai iipünaa. Jialeeka jiakana, aaʼinmajünüshii waneepia nütüma Maleiwa, süka alanaʼaleein jia sünain kojutüin nütüma suulialeʼeya tü wuchiikalüirua» (Mateo 6:25, 26).

«Jülüja jaaʼin sukuaippa tü süsiikat tü wüitshiikat sünain anashantain maʼi tü sünoʼukot [...], alanaʼaleesia maʼi sünain anachonin shiyolojo suulialeʼeya sünoʼu nüsheʼin Salomón chi washitshaanakai sülaülashikai mma paala sümaiwa [...]. Müshiʼiya jiakana, aaʼinmajünüshii nütüma suulialeʼeya tü süsiikalüirua wüitshii» (Mateo 6:28-30).

Naapüin Maleiwa wamüin tü weküinjatkat otta tü washeʼinjatkat. Shieematataaka nnojoluin naapüin wamüin waneirua kasa choʼujaaka wamüin. Waaʼinrüle tü nuluwataakalü anain Maleiwa, nükaalinjeena waya süpüla eeinjatüin wamaʼana weküin otta süpüla wousütüinjatüin wanee aʼyatawaa wepijaainjatkalü aaʼu (Mateo 6:32, 33).

Shiimainjaʼa alin maʼin waya nüpüla chi Maleiwakai naapaka wamüin chi Kaʼikai, tü juyakat, tü wüchiikalüirua otta tü süsiikat wunuʼu. Kooʼomüinsü naalin wapüla sutuma tia. Sünain tü wane pütchikat, wekirajaajeerü anain jamakuwaʼipat süpüla nüküjain Maleiwa wamüin tü naaʼinrajatkat mapeena.