¿EESÜCHE SÜPÜLA WANEEKÜIN MAAʼULU TÜ WAKUWAʼIPAINJATKAT MAPEENA? Eeshii na wayuu anoujakana sünain aleinjatüin neʼe tü alatakat namüin otta eeshii na anoujakana sünain nukumajatüjülin Maleiwa sukuwaʼipa tü alatajatkat wamüin. Shiasaʼa nnojorüle nasaʼwatüin tü keeʼireekat naaʼin, ayüülajaashii jee müshii naya: «Aleinjatia neʼe».

Eeshii na mojukana aaʼin sutuma nnojoluin natüjain saaʼu kasainjatüin naaʼinrüin shiʼipajee tü müliaa neʼrakat. Eeshiijaʼa nachajaale sukuwaʼipa süpüla nanoutuin tü alatakat namüin. Nnojotpejeʼe nountuin tia sutuma jouluin atkawaa, jouluin kaʼruwarannuu jee na oʼutuliikana saaʼin wayuu. Otta müsia nnojotsü nountuin tia sutuma jouluin maʼin ayuulii , sukutkujaain tü Mmakat jee süsetüin wüin. Sutuma sülatüin tia, eeshii na makana: «Nnojotsü kasain anain apüla eejirakuʼu tamüin sümaa tü alatakat tamüin».

Shiimain sünain eein süpüla suʼwanajaʼalaa sümüin wakuwaʼipa sutuma tü alatakat mmapaʼa (Eclesiastés 9:11). Eepejeʼe süpüla waneeküin maaʼulu tü wakuwaʼipainjatkat mapeena. Saashin tü Wiwüliakat, tü waneekakat maaʼulu shieerü oʼuniraka tü wakuwaʼipainjatkat mapeena. ¿Jamüsü maka sünüiki?

Wanaa sümaa nalüʼülüin na israeliitakana süpüla ekeroloo suluʼu tü Mma Aapünajatkat namüin, müshi Maleiwa namüin nükajee Moisés: «Teʼitaain jüpüleerua tü kataakalü oʼu jee tü outaakat, tü anaakat jee tü mojaakat. Shia püneeküinjatka tü kataakalü oʼu süpüla katüinjatüin joʼu namaa jüchonnii. Alinjachi jüpüla Jeʼwaa chi Jümaleiwasekai, joonoo sümaa nünüiki otta jüchecheraa nünain» (Deuteronomio 30:15, 19, 20).

Taashishii nutuma Maleiwa na israeliitakana Egiptojee otta niʼitaain napüleerua ayatüinjatüin taashin nakuwaʼipa otta talatüinjatüin naaʼin suluʼu tü mma naapüinjatkat namüin. Naaʼinrüinjatpejeʼe wanee kasa süpüla nountuin tia: naneeküinjatü tü kataakalü oʼu. ¿Jamüinjatü sukuwaʼipa tia natuma? Alinjachi napüla Jeʼwaa chi Namaleiwasekai, oonooinjana sümaa nünüiki otta achecheraainjana nünain.

Müinjatü neʼe tü püneeküinjatkat; tü püneekakat maaʼulu shieerü eʼitaaka shikii tü pukuwaʼipainjatkat mapeena. Shiale püneeküin alinjachin püpüla Maleiwa, poonooin sümaa nünüiki otta püchecheraain nünain, kateerü poʼu suluʼu tü Paʼaraiisükat yaa saaʼu tü Mmakat. ¿Kasa sünainpünaaka aaʼinraa tia?

Nüshajirüin Maleiwa chi aluwataaushikai Juan pütchikat tüü: «Aipürai maʼin wayuu Maleiwa», tüü, shia tü nukuwaʼipakat maʼin Maleiwa (1 Juan 4:8, TNM). Süka nütüjaain aaʼu Jesuu müin nukuwaʼipa Maleiwa, wanaa sümaa nüsakinnüin sünain jaralin maʼin tü alanaʼaleekat saʼakajee tü Pütchi aapünakat nümüin Moisés, müshi nia: «Alinjachi püpüla Jeʼwaa süka süpüshuaʼa paaʼin, süka süpüshuaʼa pukuwaʼipa otta süka tü jülüjakat paaʼin» (Mateo 22:37, TNM). Aleewashii waya nümaa Maleiwa woonoole nümaa süka alin nia wapüla. Nnojotsü shiain süka mmoluin waya neema otta sutuma wanoujain neʼe nünain süpaʼa mma. ¿Jamüshiche alinjachika wapüla Maleiwa?

Aisü wayuu nüpüla Jeʼwaa maʼaka alin nüchonnii wanee wayuu nüpüla. Nnojoliaapejeʼe lotuin nakuwaʼipa na wayuu kachonshiikana, nachajaain maʼin sukuwaʼipa süpüla nekirajüin nachonnii otta natütüleʼerüin naaʼin. Nakaaliinjain naya otta nachiaain naya sümaa kamaneein naya namüin, süka jamüin, keeʼireein naaʼin talateein naaʼin nachonnii otta anainjatüin nakuwaʼipa. ¿Jamüinjatka nakuwaʼipa na nachonniikana  neʼipajee? Alinjana napüla, oonooinjana sümaa tü namakat namüin otta nayaawatüinjatü saaʼu nachiaanüin süpüla anain nakuwaʼipa. ¿Jamüinjatka wakuwaʼipa niʼipajee chi Washi iipünaajachikai? Keeʼireesü naaʼin alin nia wapüla otta waapüin nümüin analuʼut saaʼu tü kasa anasü naaʼinrakat wapüleerua.

Suluʼu tü anüiki ashajünakalü aluʼu tü Wiwüliakat, tü pütchikat aapaa eesü «oonowaa» sümüle. Tia shia tü keeʼireekat naaʼin wanee wayuu naaʼinrajatüin nüchon wanaa sümaa nümüin nümüin: «Paapa tanüiki». Aapaa nünüiki Maleiwa sünainpünaasü atüjawaa saaʼu kasain keeʼireein naaʼin otta aaʼinraa shia. Süka nnojoluin süpüla waapüin nünüiki Maleiwa maaʼutpünaa, waashajeʼerüinjatü tü Wiwüliakat otta weʼitaainjatü suluʼu wakuwaʼipa tü sümakat (1 Juan 5:3).

Soʼu wanee kaʼi nüküjain Jesuu jamüin choʼujaaka maʼin waapüin nünüiki Maleiwa. Müshi nia: «Nnojotsü shiain sümüiwa tü pankat katüin atüma soʼu wayuu, kateerü oʼu shiaya sütüma süpüshua tü nünüikikat chi Maleiwakai» (Mateo 4:4). Shiimain choʼujaain weküinjanain, akatsaʼa choʼujaʼaleein maʼin wayaawatüin saaʼu tü nümakat Maleiwa. ¿Jamüsü choʼujaaka tia? Müshi chi aluwataaikai Salomón: «Tü kekiiwaakat maʼin süpülajatü saaʼinmajüin waya maʼaka tü saaʼinmajakalü anain waya tü nneetkat. Shiapejeʼe anain maʼin tü atüjaakat süka katüin woʼu sünainjee kekiin maʼin waya» (Eclesiastés 7:12). Tü kekiiwaakat maʼin jee tü atüjaa nümaʼanajeejatkat Maleiwa, saaʼinmajeena waya maaʼulu otta sükaaliinjeena waya süpüla waneeküin tü wopu lotusükat, tü sünainmüinkat kataa oʼu süpüla kaʼikat süpüshuaʼa.

Suluʼu tü wane ekirajaayakat, waküja achikit tü nümakat Jesuu soʼu nümüin: «Müshii aka naya saaʼin wayuu eekai süneeküin wopu eekai moulin jaʼitasü kapüleein napüleerua. Anakaja müle aka jia naaʼin na wayuu oʼunakana suluʼu wopu mouisü. tü wopu sünainmüinkat tü kataakalü oʼuu» (Mateo 7:13, 14). Süpüla woʼunuin suluʼupünaa tia wopukot, choʼujaasü woʼuninnüin nutuma wanee wayuu eʼraajakai maʼin shia süpüla wasaʼwatüin tü kataakalü oʼu waneepia. Müsüjeseʼe choʼujaain maʼin icheinjanain waya nünain Maleiwa (Salmo 16:8). ¿Kasa waaʼinrajatka süpüla ichein waya nünain Maleiwa?

Wainma kasa waaʼinrawaika waneepia otta eesü tü waaʼinreekalü amüin. Shapaapejeʼe neʼe waaʼin saaʼu tü waʼyataainkat jee saaʼu waneirua kasa. Nnojotsü apütaayain kaʼi süpüla wasakireʼerüin waaʼin kasain keeʼireein naaʼin Maleiwa wapüleerua. Müsüjeseʼe sümüin tü Wiwüliakat: «Jülüja jaaʼin tü jukuwaʼipakat suulia müin aka jia naaʼin chi wayuu mayaawatüinkai saaʼu nukuwaʼipa, wayuuinjana kekiishii maʼin jia. Shia anaka jajayatüle tü kaʼi apütaakat, süka wainmain kasa mojusü maaʼulu» (Éfeso 5:15, 16, TNM). Achecheraajeena waya nünain Maleiwa aleewale maʼin waya nümaa (Mateo 6:33, TNM).

Mayaapejeʼe isain püchiki punouteʼerüin sukuwaʼipa tü alatüitpakat pümüin, eesü süpüla paaʼinrüin wanee kasa süpüla anain pukuwaʼipa otta sukuwaʼipa püpüshi. Süküjain tü Wiwüliakat alin maʼin waya nüpüla Jeʼwaa, chi Washi iipünaajachikai otta nüküjain wamüin tü waaʼinrajatkat. Jülüja paaʼin tü nümakat Miqueas, wanee nünüikimaajachi Maleiwa:

«Nüküjain pümüin tü kasa anasükat, piakai süchonkai wayuu. ¿Aashin shiain neʼe nuchuntuin Jeʼwaa pümüin lotuinjatüin pukuwaʼipa jee anainjatüin maʼin pümüin tü aijirawaakat jee nnojoluinjatüin yaletüin paaʼin sünain aaʼinraa tü nuluwataakalü anain pia chi Pümaleiwasekai?» (Miqueas 6:8).

¿Oonoweeiche pia nümaa Maleiwa? Müle shia putuma, watteerü maʼin saalii kasa anasü piʼreetka mapeena nutuma Maleiwa. Pia neʼe aneeküinjachikai tia.