EKIRAJAWAISHI Jesús süchiki tü oʼuraajaakat. Soʼu nakalioʼu na nekiipüʼükana na judíokana kamalainpuʼusü namüin oʼuraajaa eere «sujununtaain kaaye». ¿Jamüsü naainjaka tia? «Süpüla neʼnnaajanain sutuma wayuu». Shia keeʼireeka naaʼin müinjatüin nanüiki na wayuukana nachiki «wayuu amüliajülin naya». Noʼutku nayakana kamaʼawaishii sünain oʼuraajaa jee neiteʼerakuʼu müin nanüiki süpüla naapajüinjatüin shia Maleiwa (Mateo 6:5-8). Nüküjain Jesús nnojoluin kasain saamüin tü naaʼinrakat. Sutumajee tia, nayaawata aaʼu na wayuu anamiakana tü nnojoluinjatkat naaʼinrüin noʼuraajapa. Nnojotsü neʼe shiain nüküjain Jesús tü nnojoluinjatkat waaʼinrüin woʼuraajapa, nüküjaleein tü wachuntajatkat.

Nikirajüin waya Jesús sünain wachuntajatüin nümüin Jehová kojutuinjatüin tü nünüliakat sutuma wayuu jee nuluwataainjachin saaʼu tü mmakat süpüla saainjünüin tü keeʼireekat naaʼin yaa mmapaʼa. Eeshii süpüla wachuntuin kaalinwaa nümüin wanaapünaa sümaa tü alatakat wamüin (Mateo 6:9-13; Lucas 11:2-4). Kayaawasesü nutuma Jesús tü nikirajakalü anain süpüla masütaajüin waya sünain achuntaa, nnojoluinjatüin yaletüin waaʼin jee kanoulainjanain waya, müle shia watuma naapajeerü Jehová wanüiki (Lucas 11:5-13; 18:1-14). Pansaasü nukuwaʼipa Jesús sümaa tü nikirajakalü anain (Mateo 14:23; Marcos 1:35).

Anakajasaʼa maʼin sukuwaʼipa nachuntia na nikirajüinkana Jesús sutumajee nikirajüin naya. Soʼu tü ai outajachikalü oʼu Jesús nikirajüin na nikirajüinkana sooʼomüin süchiki tü oʼuraajaakat.

Soʼu tü ai outajachikalü oʼu Jesús wataawasü tü aikat naaʼu sümaa nütütüleʼerüin naaʼin na nikirajüinkana. Nikirajüinjana naya sünain wanee kasa jeketü, müshi nia namüin: «Müshi taya maʼaka saaʼin wopu, tayaʼaya chi shiimainkai otta taya kataka atuma soʼu wayuu. Nnojoishi süpüla nürütkaain wanee wayuu nünainmüin chi Tashikai, aluʼusaʼa tayale arütkeʼerüin nia». Nüküjaka wanee pütchi anashaatasü maʼin namüin: «Jaʼitasü kasain juchuntuin saaʼu tanülia, taainjeeriaʼaya süpüla kojutuinjachin atumawaa chi Tashikai tanainjee tayakai chi Nüchonkai». Kettaapa nünüiki namüin nümakalaka: «Maaʼutpünaa yaa, nnojotyülia juchuntuin wanee kasa tanülialuʼu, juchunta, saapüneetka jümüin wanee kasa. Miyoʼuleejeetka tü talataa eejeetka suluʼu jaaʼin» (Juan 14:6, 13, 14; 16:24).

Anakatche maʼin tü aküjünakat namüin. Müsü sünüiki wanee diccionario süchikimaajatka tü Bibliakat: «Tia shia wanee kasa jeketü nachuntajatka noʼuraajapa». Tü nüküjeekalü achiki Jesús nnojotsü niainjachin oʼuraajünüin amüin nuulialeʼe Maleiwa, tü nikirajakalü anain müsü aka saaʼin wanee wopu jeketü arütkeʼereenaka na wayuukana nünainmüin Jehová.

Naapapuʼuin Maleiwa noʼuraajai na waneepiapuʼukana nümaa (1 Samuel 1:9-19; Salmos 65:2). Süpüla naapajüinjatüin Jehová nanüiki na wayuu nnojoliikana israelitain, kojutuinjatü namüin tü pueulo nüneekakat, tü nüpansaajakat amüin nünüiki, na israelitakana. Soʼu nükalia Salomón, oʼunajana na wayuukana suluʼu tü aʼwaajüleekat Maleiwa süpüla naʼajüinjatüin mürüt nümüin (Deuteronomio 9:29; 2 Crónicas 6:32, 33). Nnojotsü müin waneepia nuʼwaajia Maleiwa natuma na wayuukana. Maʼaka nüshajüin chi aluwataaushikai Pablo tü Pütchi Aapünakat nümüin Moisés jee müsia tü aʼajaakat mürüt shiyaawasesü neʼe tü kasa eeinjateetkat (Hebreokana 10:1, 2). Tia shiyaawasekat ekeraajüsü nünain Jesucristo (Colosas 2:17). Soʼujee tü juyakat 33 soʼu wakalia, süpüla anajiraainjachin wanee wayuu nümaa Jehová nnojotsü shiainjatüin sünainjee tü Pütchi Aapünakat nümüin Moisés, oonooinjachi nia nümüin Jesucristo, chi aküjünatüjüikai achiki paala (Juan 15:14-16; Galacia 3:24, 25).

Niʼitaain Jesús wanee sukuwaʼipa anaka maʼin süpüla narütkaainjanain na wayuukana nünainmüin Jehová. Müshi nia maʼaka naaʼin wanee wayuu kaawainka anüiki süpüla neerulüinjatüin wanee wopu süpüla naapüinjatüin Maleiwa nanüiki na wayuu achuntakana nümüin. ¿Jamüsü naaʼinrüinjatka tia Jesús wapüleerua?

Süka joʼuujiraain waya sümaa kaainjalaa nnojoishii süpüla anajiraain waya nümaa Maleiwa jaʼitairü kasain maʼin waaʼinrüin, süka wulein maʼin nukuwaʼipa (Roma 3:20, 24; Hebreokana 1:3, 4). Süka naapajiraain nikii Jesús nuwalaajüin naainjala napüshuaʼa na wayuu kaainjaraliikana (Roma 5:12, 18, 19). Sutumajee tia, eeitpa süpüla narütkaain napüshuaʼa na wayuukana sümaa nnojoluin mmoluin seema arütkawaa nünainmüin chi Maleiwakai. Wanee kasa naainjainjatka shia nanoujain sünain naapajiraain nikii Jesús naaʼu jee noʼuraajüinjanain nünülialuʼu (Éfeso 3:11, 12).

Woʼuraajapa nünülialuʼu Jesús weʼitaain waaʼin sünain apünüinsü kasa naaʼinraka Cristo süpüleerua tü keeʼireekat naaʼin Maleiwa: (1) «Chi Anneetchon nümaʼanajeejachikai Maleiwa», aapajiraashi nikii Jesús süpüla sülaʼajaanüin saainjala wayuu kaainjarannuu. (2) Aʼyataashi nia maʼaka naaʼin «chi sacerdote müloʼushikai», eesü tü kasa anasü naaʼinrakat sünainjee naapajiraain nikii. (3) Nia neʼe wopukai süpüla warütkaainjanain nünainmüin Jehová jee woʼuraajüin nümüin (Juan 1:29; 14:6; Hebreokana 4:14, 15).

Kojutushi wamüin Jesús woʼuraajapa saaʼu nünülia. Anasü maʼin tia süka pansaain sümaa tü nüchekakat Jehová: «Nücheküin chi Maleiwakai süpüleerua süsapainyoʼukainjatüin wayuu süpüshua nümülatuʼumüin Cristo […]. “Pia Wasenyotseka”, meena napüshua nümüin Jesucristo sümaa naʼwaajeenain chi Washikai Maleiwa sükajee tia» (Filipos 2:10, 11). Wanee kasa anaʼleeka maʼin woʼuraajapa saaʼu nünülia Jesús shia waʼwaajüin Jehová, nia chi aapakai Nüchon süpüla anainjatüin wakuwaʼipa (Juan 3:16).

Süpüla wayaawatüinjatüin saaʼu tü naaʼinrakat Jesús süküjain tü Bibliakat kojuyasü nünüliayaasü. Sutumajee tia, wayaawatüin saaʼu wattain saalii kasa anasü weʼraka sutuma tü naaʼinrakat Jesús jee tü ayateetkat naaʼinrüin wapüleerua (pünaʼlaa tü kanüliakat « Tü nünüliayaasükalüirua Jesús»). Anuu wanee kasa aapünaka nümüin Jesús: «Eʼitaanüshi nia nutuma Maleiwa süpüla kojutuinjachin sutuma wayuu süpüshua». Tia maluʼulu laülaainjachin nia chaʼayaa sirumatuʼu jee müsia yaa saaʼu tü mmakat (Filipos 2:9; Mateo 28:18). a

Maʼaka wekirajaainnapain achuntajana waya nümüin Maleiwa saaʼu nünülia Jesús süpüla naapüin wanüiki (Juan 14:13, 14). ¿Jamüsü nnojotka wachuntajatüin neʼe nünülia Jesús süpaʼa mma?

Jülüjataa paaʼin nuluwataain karaloʼuta wanee wayuu otta apütaashi nia sajaʼttiamüin tü nüshajüinkat. Tia pütchi nüpütaayakat, ¿nüshajüinche shia süka alin pia nüpüla? ¿Nüshanalaatapa neʼe shia? Kojutuleeinjatüin maʼin watuma tü nünüliakat Jesús woʼuraajapa suulialeʼeya nüpütaaya wanee wayuu. Woʼuraajapa nümüin Maleiwa yootuinjana waya süka süpüshuaʼa waaʼin, nnojotsü weiteʼerakuʼu müinjatüin wanüiki (1 Tesalónica 5:17; Salmo 119:145).

¿Kasa waaʼinrajatka suulia wachuntuin neʼe nünülia Jesús süpaʼa mma? Shia anaka sotule waaʼin tü akuwaʼipa anaka maʼin nünain Cristo. Jülüja waaʼin süpüshuaʼa tü naaʼinrakat Jesús otta tü keeʼireekat naaʼin wapüleerua. Woʼuraajapa nümüin Jehová waapüin analuʼut nümüin otta waʼwaajüin nia saaʼujee naapajiraain nikii chi Nüchonkai waaʼu. Müle shia watuma, weʼitaajeerü maʼin waaʼin sünain tü nümakat Jesús: «Jaʼitasü kasain juchuntuin nümüin chi Tashikai tanülialuʼu, naapeerü shia jümüin» (Juan 16:23).