«Kasataalejeseʼe eein wanee kasa kataka atuma woʼu suluʼu kaʼikat süpüshuaʼa», müsü sünüiki wayuu. Nnojotsü jaralüin isain süchiki tü ouktaakat. Shiimainjaʼaya tü nümakat Job sünain nnojoluin wayuu eekai katüin noʼu suluʼu kaʼikat süpüshuaʼa. Yaamaʼayaairüle tia, kakaliairü suluʼu müin shia.

Keeʼireesia maʼin waaʼin wapüshuaʼa kateein woʼu waneepia. Makaʼa waya shia süka niʼitaatüjülüin Maleiwa suluʼu waaʼin tia (Eclesiastés 3:11). Nnojotsüjeʼe niʼitaain Maleiwa suluʼu waaʼin tia motsomüinjatüle neʼe wamaʼa sünain katüin woʼu. Süka aipüralin nia niʼitaain suluʼu waaʼin katüinjatüin woʼu waneepia. «Ooʼulaa meeria tü ouktaakat nütüma» Maleiwa, süka jamüin, nnojoluin anain shia nümüin (1 Corinto 15:24-26).

Nnojotsü jaralüin anain amüin tü ouktaakat. Jamüshijaʼa wanee wayuu nütüjaale saaʼu eein wanee kasa oukteechika atuma nia, jülüjüsü naaʼin nukuwaʼipa, ayuuire nia, eʼrajeʼeramaatüshi nia. Wachajaain maʼin sukuwaʼipa süpüla nnojoliinjanain waya ouktüin.

¿Shiimainchejeʼe ooʼulaa meerüin tü ouktaakat nutuma Maleiwa? Aa, shiimain tia. Jamüshiijaʼa waya, nukumajüin waya Maleiwa süpüla katüinjatüin woʼu suluʼu kaʼikat süpüshuaʼa yaa saaʼu tü Mmakat. Nikettaajeeria Maleiwa tü nukumajakalü apüla waya (Isaías 55:11).

¿Kasakaʼa naainjüinjatüin Maleiwa süpüla suuʼulaa sümüinjatüin tü ouktaakat nutuma? Shiimüinsaʼaya süchajaanüin sukuwaʼipa tü nipinjatkat wanee wayuu süpüla nnojoluinjachin ouktüin nia. Isapejeʼe achikii tia, ayatsia neʼe anaajaain wayuu maaʼulu yaa. Shiimain sünain anain wayuu sutuma tü emiraluushikat, tü utiakat. Ekirajaana achiiruat tü sünainkat nüsha wanee wayuu, kamaʼa eetaajeerüle nousütüin sünain wanee kasa nnojoleetkalü ouktüin atuma wanee wayuu. Ayatapejeʼe neʼe ouktüin wayuu maaʼulu yaa, nnojoishi eein wanee wayuu kepikai amaʼana shia (Eclesiastés 3:20).

Niaʼala neʼe Jeʼwaa nümüiwaʼa kamaʼanaka shipi tü ouktaakat, nukumajüin sukuwaʼipa süpüla woʼtteʼennüinjanain suulia. Nia nüneekaka Jesuu süpüla woʼttaainjanain suulia tü ouktaakat.