Oiko jave peteĩ trahédia térã desgrásia la hénte oikuaase jepi: “¿Mbaʼére piko oiko koʼã mbaʼe?”. La Biblia orresponde porã ko porandu, ¡ha upéva tuichaiterei ñanekonsola!

1. ¿Mbaʼépa ojapo vaʼekue Satanás oñepyrũ hag̃ua oĩ heta mbaʼe vai?

Satanás opuʼã vaʼekue Ñandejárare ha orekose enterovépe ipoguýpe. Upévare omomýi vaʼekue Adán ha Évape opuʼã hag̃ua avei Ñandejárare, ha upearã ijapu Évape (Génesis 3:1-5). Satanás oipota kuri haʼe opensa Jehová ndoipotaiha odisfruta hikuái álgo iporãvagui, ha la hénte ovyʼavetaha naiñeʼẽrendúiramo Ñandejárape. Satanás haʼe vaʼekue pe primero ijapúva heʼírõ guare Évape nomanomoʼãiha. Upévare Juan 8:44 heʼi voi hese: “Haʼe ijapueterei ha haʼe voi pe japu ruvicha”.

2. ¿Mbaʼépa odesidi Adán ha Eva?

Jehová ningo omeʼẽ vaʼekue Adán ha Évape oĩva entéro. Ha heʼi chupekuéra ikatuha hoʼu umi yvyramáta hiʼávagui oĩva pe hardín de Edénpe, peteĩ rehe añoite la ndopokói vaʼerã kuri (Génesis 2:15-17). Péro haʼekuéra odesidi lomímonte hoʼutaha pe yvyramátagui. Eva “ipojái hese ha hoʼu”, ha upéi Adán “hoʼu avei” (Génesis 3:6). Mokõivévante naiñeʼẽrendúi Ñandejárape. Adán ha Eva ningo perfékto vaʼekue, upévare ifásil kuri chupekuéra ojapo hag̃ua iporãva. Péro haʼekuéra voi odesidívo naiñeʼẽrendumoʼãiha, opeka ha ohechauka ndoipotaiha Ñandejára ogoverna chupekuéra. Ha upéva káusare hetaiterei osufri hikuái (Génesis 3:16-19).

3. ¿Mbaʼéichapa ñandeafekta la ojapo vaʼekue Adán ha Eva?

Adán ha Eva opeka rire, oiko chuguikuéra imperfékto ha upéi ombohasa pe imperfeksión entéro ifamiliarépe. La Biblia heʼi voi Adán rehe: “Peteĩ kuimbaʼe rupive pe pekádo oike ko múndope, ha pe ñemano oike pekádo rupive. Upéicha pe ñemano ohupyty entéro persónape pórke enterovéva opeka” (Romanos 5:12).

Oĩ ningo heta mbaʼe ñanembosufríva. Por ehémplo jasufri jadesidi vai rupi, térã ótro odesidi vai ha upéva ñandeafekta. Ha avése katu jasufri ñaime rupi kavalete oiko jave peteĩ desgrásia (elee Eclesiastés 9:11).

 EJEPYʼAMONGETAMÍNA

4. ¿Máva káusarepa jasufri?

Heta hénte oguerovia Ñandejára ogovernaha ko múndo, ¿siértopa upéva? Ehecha pe VIDÉO.

Elee Santiago 1:13 ha 1 Juan 5:19, ha upéi erresponde ko porandu:

• ¿Ñandejára káusarepa oĩ hetaite mbaʼe vai ha sufrimiénto?

5. ¿Mbaʼe mbaʼépa oiko ko múndope Satanás oñepyrũ guive ogoverna?

1. Adán ha Eva haʼe vaʼekue perfékto ha oiko kuri peteĩ paraísope, péro haʼekuéra opena Satanás rehe ha opuʼã Jehová kóntrape

2.   Adán ha Eva opeka rire, opárupi oĩ hetaiterei hénte osufríva, opekáva ha omanóva

3. Jehová oipeʼaitéta pe pekádo ha ndaiporimoʼãvéima osufríva ni omanóva. Upe rire, yvyporakuéra perfékto jeýta ha oikóta peteĩ paraísope

6. Jehová ombyasy ohecha jave jasufriha

¿Siértopa Ñandejára ombyasy ohecha jave jasufriha? Ehechamína la heʼi vaʼekue rréi David ha apóstol Pedro. Elee Salmo 31:7 ha 1 Pedro 5:7, ha upéi erresponde ko porandu:

• ¿Mbaʼéichapa reñeñandu reikuaávo Jehová ojepyʼapyha káda únore jasufri jave?

 RRESÚMEN

Entéro umi mbaʼe vai oĩva ko múndope oiko prinsipálmente Satanás ha Adán ha Eva káusare. Jehová katu ojepyʼapyeterei ñanderehe jasufri jave ha koʼẽrõitéma oipeʼaitéta pe sufrimiénto ko múndogui.

Rrepáso

• ¿Mbaʼe japúpa heʼi vaʼekue Satanás Évape?

• ¿Mbaʼéichapa ñandeperhudika Adán ha Eva opuʼã haguére Ñandejárare?

• ¿Mbaʼéichapa jaikuaa Jehová ombyasyha ohecha jave jasufriha?