Ñamombaʼe ñande rapichakuéra ojapóva
Konsého 3
Ñamombaʼe ñande rapichakuéra ojapóva
MBAʼÉPA HEʼI LA BIBLIA: “Pemeʼẽ pende aguyje [...] opa mbaʼére” (1 Tesalonicenses 5:18).
PROVLÉMA: Heta tapicha oĩva ñande jerére oñemombaʼeguasu, ha naimbaʼerechakuaái, ha koʼãichagua lája ikatu ova ñanderehe (2 Timoteo 3:1, 2). Ikatu avei hetaiterei ñane kompromíso ha ñanerembiapoitereígui ñanderesarái jaagradese hag̃ua ojejapóva ñanderehe térã ndajahechakuaái umi mbaʼe porã jarekóva.
MBAʼÉPA IKATU JAJAPO: Ñañemotiémpo jajepyʼamongeta hag̃ua umi mbaʼe porã jarekóvare. Heta vése umi provléma ñandeahoʼi ha ñaimoʼã ndaikatuveimaha jagueropuʼaka. Péicha oñeñanduvaʼekue rréi David. Péro mbaʼépa oipytyvõ chupe? Haʼe heʼi: ‘Chemanduʼa umi ára ymaguare rehe, chemanduʼa opaite umi ne rembiapokuére’ (Salmo 143:3-5, ÑÑB). Ohasa asýramo jepe, haʼe akóinte oagradese hapichápe ha Ñandejárape, ha upéva ombopyʼarory chupe.
Upéicharõ ñande avei jahechakuaavaʼerã umi mbaʼe ojejapóva ñanderehehápe ha jaagradese umívare. Péicha ojapovaʼekue Jesús. La Biblia omombeʼu peteĩ jey María omona hague peteĩ aséite hepyetereíva Jesús py ha iñakãre. Upérõ oĩvaʼekue heta ojepicháva ha heʼíva: ‘Mbaʼupe piko oñeñohẽ rei pe aséite?’. * Haʼekuéra oimoʼã iporãveha oñevende ha oñemeʼẽ pe pláta umi imboriahúvape. Jesús katu heʼi: ‘Pehejána, mbaʼére anga piko péicha pemyangekói chupe? Haʼe ningo ojapo pe ikatumíva’ (Marcos 14:3-8, NM; Juan 12:3). Jesús omombaʼe María ojapovaʼekue, ha ndojesarekói umi mbaʼe ndojapoivaʼekuére.
Ñambyasýramo jepe oĩ heta tapicha nomombaʼéiva ifamília térã iñamigokuérape. Upéi umíva oho térã omano ha upépe ae ohayhuete guaʼu chupe hikuái. Ani hag̃ua oiko upéva, ára ha ára ñamombaʼevaʼerã umi mbaʼe porã jarekóva. Pór ehémplo, ikatu jajapo peteĩ lísta ha ñamoĩ pype mbaʼérepa ikatu jaagradese.
Avei ñanemanduʼáke ñañemboʼevaʼerãha Ñandejárape ha jaagradese chupe omeʼẽ haguére ñandéve “opa mbaʼe porã” (Santiago 1:17). Iporãite ningo jajepokuaa jaagradese, péicha avei javyʼavéta umi mbaʼe jarekóvare (Filipenses 4:6, 7).
[Nóta]
^ párr. 6 Yma Jesús tiémpope umi ogajára ojepokuaa oñohẽ aséite hyakuã asýva imbohupa akãre ohechauka hag̃ua oguerohoryha chupe. Ha María ohechauka avei oñemomirĩha omoĩvo pe aséite Jesús pýre.
[Nóta oĩva taʼanga ndive páhina 6]
Jahechaukápa jaagradeseha ñande rapichakuéra ojapóva?
