Akakuaa peteĩ siuda héravape Jyväskylä, Finlándiape. Chemitãme, pyʼỹinte rohómi che hentekuéra ndive rojepasea umi kaʼaguy ha arrójo porã porã oĩvare upe lugárpe. Che ahayhueterei voi umi mbaʼe ha avei umi animál. Chemitãme ahupími che jyva ári umi jagua ha mbarakaja ajuhúva, ha aañuã chupekuéra. Upéi akakuaavévo, chemoñeñandu vaieterei ahechávo mbaʼéichapa oñemaltrata umi animálpe, upévare aike peteĩ organisasión odefendévape umi animál derécho. Upépe aikuaa heta héntepe, opensáva avei che apensaháicha.

Rojapo vaʼekue heta mbaʼe rodefende hag̃ua umi animál derécho. Por ehémplo, rorrepartími heta informasión oñeʼẽva upévare, avei roñemanifesta umi lavoratório renondépe, ojejapohápe pruéva animál rehe ha avei umi negósio oñevendehápe ao ojejapóva animál pirekuégui. Amo ipahápe roforma peteĩ organisasión rodefende hag̃ua umi animál. Pyʼỹinte oreprovléma umi autorida ndive rojapógui heta mbaʼe rohechauka hag̃ua ndaoregustaiha ojetrata lája umi animálpe. Upéicha rupi, heta vése ajegueraha préso.

Péro ndahaʼéi umi animál añónte chepyʼapýva, ajepyʼapy avei che rapichakuérare. Upévare aike mokõi organisasiónpe, peteĩva héra Amnistía Internacional ha pe ótro Greenpeace. Upépe ajapo ikatúva guive aipytyvõ hag̃ua koʼã organisasiónpe. Avei, opáichavo añehaʼã oñepytyvõ hag̃ua umi imboriahu ha ndorekóivape hoʼu vaʼerã.

Péro ndahapukúi ahechakuaa hag̃ua ndaikatumoʼãiha akambia ko múndo. Sapyʼánte ningo rosẽ porã, péro umi provléma tuichavéva ndaikatúi rosolusiona. Ambyasy rei ahechávo mbaʼéichapa ko múndo oñehundi ohóvo, ha haʼete avavépe noimportáiva upéva. Añeñandu vaieterei aikuaágui ndaikatuiha ajapo mbaʼeve akambia hag̃ua umi mbaʼe.

Ndaikatúimarõ ajapo mbaʼeve, añepyrũ apensa Ñandejárare ha la Biblia omboʼévare. Astudiáma vaʼekue voi la Biblia umi testígo de Jehová ndive ha aagradesémi chupekuéra imbaʼeporã ha ojepyʼapy haguére cherehe, péro upérõ napensaiete gueteri akambiávo. Koʼág̃a katu apensáma diferénte.

Añepyrũ jey alee che Biblia ha tuichaiterei chembopyʼaguapy aikuaávo upépe heʼiha jatrata porã vaʼerãha umi animálpe. Por ehémplo, Proverbios 12:10 heʼi: “Hekojojáva oñangareko hymbakuérare”. Avei ahechakuaa ndahaʼeiha Ñandejára káusare oikoha umi mbaʼe vai ko múndope, síno ivai vaive ñande situasión ndojejapói rupi Jehová oipotáva. Ahechakuaa Ñandejára ñanderayhu ha ipasiensiaitereiha, ha upéva chemoñeñandu porãiterei (Salmo 103:8-14).

Upe tiémpope atopa peteĩ kupón ha amyenyhẽ ajerure hag̃ua pe lívro Mbaʼépa añetehápe omboʼe la Biblia?, ha aguerahauka por korréo. Upe riremínte ou chevisita peteĩ testígo de Jehová hembirekóndi, ha oporandu chéve ndastudiaséipa la Biblia. Pyaʼe voi aasepta ha upe riremínte aháma rreunionhápe, ojejapóva peteĩ Salón del Réinope. Péicha mbeguekatúpe amombaʼeve ahávo umi mbaʼe aaprendéva la Bíbliagui.

La Biblia chepytyvõ rupi, tuicha akambia. Por ehémplo, ndapitavéi, ndakaʼuvéi, chepínta porãvéma, ndachejurukyʼavéi ha arrespeta umi autoridápe (Romanos 13:1). Avei yma cherekokyʼa vaʼekue, ha koʼág̃a ndaupeichavéima.

Heta mbaʼépe ningo akambia, péro ijetuʼueterei vaʼekue chéve ahecha hag̃ua Ñandejára ohechaháicha umi organisasión che aĩ hague. Ndahaʼéi peteĩ tesapirĩmente akambiáva apensa lája, ñepyrũrã aimoʼã atraisionataha chupekuéra asẽrõ umi organisasióngui. Péro upe rire ahechakuaa Ñandejára Rréino añoite ikatuha oipytyvõ yvyporakuérape ha osolusiona opa mbaʼe oĩ vaíva. Upémarõ ajapo ikatúva guive aikuaauka hag̃ua upe esperánsa che rapichakuérape (Mateo 6:33).

Ymave ningo che ahusgámi umi héntepe che aikuaaháicha, ha apensa vaʼekue umi iñañáva omereseha ojekastiga, ha añemoĩ voi hesekuéra. Péro astudia rire la Biblia ahechakuaa ahayhu vaʼerãha enterovépe, ha añehaʼã ajapo upéva (Mateo 5:44). Upévare amombeʼu opa ikatúvape umi mbaʼe porã ojapótava Ñandejára Rréino. Chembopyʼarory aikuaávo upéva omeʼẽha esperánsa umi héntepe ha oipytyvõha enterovépe oiko hag̃ua vyʼápe ha pyʼaguapýpe.

Koʼág̃a aheja Jehová pópe umi mbaʼe chepyʼapýva ha upéva tuicha chembopyʼaguapy. Aikuaa porã haʼe ndohejamoʼãiha oñehundi ko yvy porãite ni oñemaltrata opa árare umi hénte ha animalkuérape. Irréino rupive Ñandejára osolusionáta opa mbaʼe yvypóra ombyai vaʼekue (Isaías 11:1-9). Avyʼaiterei aikuaágui koʼã mbaʼe ha ikatu haguére aipytyvõ che rapichakuérape ojerovia hag̃ua koʼã promésare. Koʼág̃a napensavéima tekotevẽha che akambia ko múndo.