¿Reikuaasépa ne renonderã? Heta oĩ oikuaaséva upéva. Upéicha rupi oĩ voi ojededikáva oikuaa hag̃ua umi mbaʼe oikótava tenonderãme, ha heta vése ojaserta hikuái, péro hetave vése ojavy. Por ehémplo:

• UMI SIENTÍFIKO ogasta hetaiterei pláta ha oiporu umi mákina iporãmba jepéva ostudia hag̃ua mbaʼéichapa umi kontaminasión ombyai ko yvy, avei opronostika hag̃ua okýtapa térã nahániri ha oikuaa hag̃ua hetave mbaʼe.

• UMI ANALÍSTA PROFESIONÁL ostudia mbaʼéichapa ombaʼapo umi polítiko ha umi negósio tuicháva, ha asegún upéva opredesi mbaʼépa ikatu oiko. Por ehémplo, peteĩ kuimbaʼe ipláta hetáva, hérava Warren Buffett, ojekuaa opárupi ivaleterei rupi opredesi hag̃ua mbaʼéicha ha mbaʼépepa umi emprésa guasu oiporu vaʼerã ipláta osẽ porã hag̃ua. Ótro analísta ifamósova avei haʼe Nate Silver, haʼe ostudia umi mbaʼe oikóva opárupi opredesi hag̃ua mávapa umi polítiko apytégui oganáta térã mbaʼeichagua pelíkulapa ikatu ogana umi prémio.

• UMI DOKUMÉNTO YMA GUARE oñeinterpreta peteĩ profesíaicha. Heta oĩ heʼíva oñekumpliha hína koʼág̃a pe kuatiañeʼẽ ohai vaʼekue Michel de Notredame (Nostradamus), síglo 16-pe. Pe kalendário máyape el 21 de diciembre de 2012 oñemboty peteĩ síklo, ha upévare heta oĩ opensáva kuri upe féchape oikotaha sarambi ha outaha pe “fin del múndo”.

• HETA UMI RRELIHIÓN OMOAKÃVA opredesi oikotaha heta mbaʼe ivaietereíva ko múndo tuichakuére. Upéicha omongyhyje hikuái umi héntepe ikatu hag̃uáicha oike irrelihiónpe. Peteĩ karai oprofetisáva, hérava Harold Camping, ha avei iñirũnguéra, heʼi mbaʼéichatapa pe fin. Peteĩ jey haʼekuéra heʼi kuri ko yvy oñehunditaha áño 2011-pe. Ha jaikuaaháicha, tuicha ojavy hikuái.

• UMI PSÍQUICO heʼi ivaletereiha opredesi hag̃ua umi mbaʼe oikótava. Edgar Cayce ha Jeane Dixon ojaserta kuri heta mbaʼe oikótava síglo 20-pe, péro hetaitereive ojavy hikuái. Por ehémplo, Dixon heʼi kuri 1958-pe oñepyrũtaha pe Tercera Gérra Mundiál, ha Cayce katu heʼi 1970-rupi Nueva York oñapymitamaha pe océanope.

¿Ikatu piko añetehápe jaikuaa umi mbaʼe oikótava amo gotyove? Jaikuaáramo upéva, katuete ñapensa porãta umi mbaʼe jajapótavare ha jadesidíta umi mbaʼe okonvenivétava ñandéve.