Baabule la mea pa’alɛ to la yɛla zo’e zo’e n wan soŋɛ tɔ ti to ta’an bɔkɛ ku. La ka pakɛ la hon ze’ele zɛ’an, Naayinɛ yelesum n boi Baabule la poan la ‘ka ba’ɛ kpe’em bo ho bii zãɛ la hɔ.’​—Tɛɛnhegɔ 30:11.

Yelese’a n wan soŋɛ hɔ ti ho bɔkɛ Baabule la

1.   Tara putɛsonɛ. Sakɛ ti Baabule la dela Naayinɛ Yelesum. Siregera homea, se’ere n sɔi la Naayinɛ ka boti zɛ̃kɛ n meadoma. (1 Tesalonika 2:13; Yames 4:6) Ge da sakera yɛla yoo yoo, se’ere n sɔi la Naayinɛ boti la ho tara ho ‘puti’irɛ tuna tuuma.’​—Arom 12:1, 2.

2.   Zusɛ Naayinɛ ti a bo ho yɛm. Magaha 3:5 yeti: “Da dekɛ homea delum homea bɔkerɛ.” Ge ‘tuɣum zusa Naayinɛ’ ti a bo ho yɛm ti ho bɔkɛ Baabule la.​—Yames 1:5.

3.   Zamesa saŋa woo. Ho san zamesa Baabule la saŋa woo, ho wan nyɛ nyuurɔ gana hon yibeseri zamesa ku.​—Yosua 1:8.

4.   Loe yele zamesɛ. Ho san bɔta ti ho bɔkɛ Baabule la soŋa soŋa, ni loe yele Baabule la poan zamesɛ ge bala wan soŋɛ hɔ ti ho bɔkɛ Baabule la n pa’alɛ yele la se’em. Ho ta’an pɔsɛ zamesa ‘yelese’a n ka kpe’em la’ ge ti pooren ho nyaa ta zamesa ‘pa’alegɔ seto n kpe’em la.’ (Hebru 6:1, 2, Easy-to-Read Version) Ho wan ta’an dekɛ kaalegɔ zɛ’an kayima makɛ la kaalegɔ zɛ’an kayima me ge baŋɛ ti Baabule la mea n soŋeri hɔ ti ho bɔkera ku vuurɛ, hali la zɛse’esi ‘bɔkerɛ n kpe’em la.’​—2 Peter 3:16.

5.   Basɛ ti nɛreba soŋɛ hɔ. Baabule la kpemese to giila ti, to basɛ ti sɛba n bɔkɛ Baabule la soŋɛ tɔ ti to ta’an bɔkɛ ku. (Tooma 8:30, 31) Yehowa Sɛɛradoma iti la Baabule zamesegɔ zaŋa bɔ’ɔra nɛreba. Ba tari la Baabule la soŋera nɛreba ti ba bɔkera Baabule la n sirum pa’alɛ sɛla. Diimi Kristakɔma la me yuun iti la bala.​—Tooma 17:2, 3.

Yelese’a n ka pakɛ

1.   La yele ka pakɛ ti ho dɛna gɔnmi’ila bii ho keŋɛ sukuu zo’e. La boi bim ti nɛreba yuun geele Yezu tuuntuneba pia la bayi la ti ba dela ‘yire mɔɔsi.’ Tuuntuneba wa yuun bɔkɛ Gulesegɔ la mɛ ge me pa’ala nɛreba sɛla n boi bim.​— Tooma 4:13.

2.   Ligeri. Ho ta’an zamesɛ Baabule la n pa’alɛ sɛla ge kan yɔ sɛla. Yezu yuun yele a podɔleba la yeti: “Ya to’e la zaŋa, me bo ya zaŋa.”​—Matu 10:8.