To juillet 2022, danuwatọ lẹ desòdomẹ lẹdo aihọn pé bọ nuhe jọ lẹ dobu:

•   Shinzo Abe he yin “tonudọtọ de he diyin taun to Japon yin hùhù bọ enẹ dobuna mẹlẹ to otò lọ mẹ taun bosọ paṣa aihọn lọ blebu, na yè ma yọ́n Japon di otò he mẹ danuwiwa sù te dai podọ osẹ́n [he tin to otò lọ mẹ] gando sòdide go lẹ sinyẹn taun.”—Linlin The Japan Times tọn to 10 juillet 2022.

•   “Obu jẹ mẹlẹ ji to Danemark whenue mẹde yí osò do hù omẹ atọ̀n to nusatẹn de to Copenhague.”—Linlin Reuters tọn to 4 juillet 2022.

•   “Afrique du Sud: Gbẹtọ 15 wẹ kú to whenue pipli de jẹ sòdedo mẹlẹ ji to ahàn-nutẹn de to Soweto.”—Linlin The Guardian tọn to 10 juillet 2022.

•   “To sẹfifo [he jẹnukọnna] 4 juillet he yin ojlẹ whedudu tọn de, gbẹtọ hugan 220 wẹ danuwatọ lẹ hù po osò po to États-Unis.”—Linlin CBS News tọn to 5 juillet 2022.

 Be todido de ka tin dọ danuwiwa enẹlẹ na doalọte ya? Etẹ Biblu dọ?

 Biblu ylọ ojlẹ he mẹ mí to gbẹnọ te dọ “azán godo tọn lẹ,” enẹ wẹ ojlẹ he mẹ gbẹtọ lẹ na nọ wàdanu, na nọ ylanhun bo nasọ nọ wà okà te taun. (2 Timoti 3:1, 3) Danuwiwa enẹlẹ nọ zọ́n bọ gbẹtọ lẹ nọ to sijọsijọ ji. (Luku 21:11) Amọ́, Biblu dopagbe dọ ojlẹ de na wá bọ danuwiwa ma nasọ tin ba, bọ gbẹtọ lẹ “na nọ nọ̀ lẹdo jijọho tọn de mẹ, to fininọ he tindo hihọ́ lẹ podọ to gbọjẹtẹn he vò fẹẹ lẹ mẹ.” (Isaia 32:18) Nawẹ danuwiwa na doalọte gbọn?

 Mawu na de mẹylankan lẹ sẹ̀ bo na và adánwanu lẹpo sudo.

•   “Na mẹylankan lẹ tọn, yé na yin sinsánsẹ sọn aigba ji.”—Howhinwhẹn lẹ 2:22.

•   “[Jiwheyẹwhe] to awhàn hẹnwa opodo lẹdo aigba pé. E wẹ́n ogá bo sán owhán do flinflin; e yí miyọ́n do mẹ̀ awhàn-kẹkẹ lẹ.”—Salmu lẹ 46:9.

 Mawu na plọn gbẹtọ lẹ nado nọ nọ̀ jijọho mẹ nado de adọ̀ danuwiwa tọn sẹ̀.

•   “Yé ma na nọ gbleawunamẹ paali kavi hẹn husudo depope wá to osó wiwe ṣie pete ji, na e họnwun dọ aigba na gọ́ na oyọnẹn Jehovah tọn dile osin ṣinyọ́n ohù ji do.”—Isaia 11:9.

•   Etlẹ yin todin, Jiwheyẹwhe to gbẹtọ lẹ plọn lẹdo aihọn pé nado jo danuwiwa po adánwanu lẹ zinzan po do. To linlẹn de mẹ, yé nọ “yí ohí yetọn lẹ do tùn glepọnu podọ owhán yetọn lẹ do tùn agbogọdọẹ.”—Mika 4:3.

 Eyin a jlo na plọnnu dogọ gando opagbe Biblu tọn he dohia dọ to sọgodo, nude ma nasọ nọ dobunamẹ to ogbẹ̀ lọ mẹ ba go, hia hosọ lọ “Affranchis de la peur : est-ce possible ?”

 Eyin a jlo na plọnnu dogọ gando lehe danuwiwa na yin didesẹ kakadoi do go, hia hosọ lọ “Enfin la paix sur la terre !”