Biblu dohia dọ nado hẹn ojlo Jiwheyẹwhe tọn di, angẹli lẹ ko basi hihọ́na sinsẹ̀n-basitọ nugbo lẹ to ojlẹ delẹ mẹ. (Salmu lẹ 34:7) Di apajlẹ:

• Whenue Jehovah hẹn vasudo wá tòdaho ylankan Sodọmi po Gomọla po tọn lẹ ji, angẹli lẹ gọalọna Lọti nugbonọ lọ po whẹndo etọn po nado tọ́n.​—Jenẹsisi 19:1, 15-26.

• To Babilọni hohowhenu tọn mẹ, to whenue jọja Heblu atọ̀n lọ lẹ yin whẹdana nado kú to zòhọ miyọ́n tọn de mẹ, Jiwheyẹwhe “do angẹli etọn hlan bo whlẹn devizọnwatọ etọn lẹ.”​—Daniẹli 3:19-28.

• To whenue dawe dodonọ lọ Daniẹli ko yí ozán dopo zan to odò kinnikinni nutlẹndutọ lẹ tọn mẹ godo, e basi zẹẹmẹ dọ emi yin hinhẹn dogbẹ̀, na “Jiwheyẹwhe . . . do angẹli etọn hlan bo bọnùdo na kinnikinni lẹ” wutu.​—Daniẹli 6:16, 22.

To ojlẹ delẹ mẹ, angẹli he yin wẹnsagun Jiwheyẹwhe tọn lẹ nọ dádo nuyiwa agun Klistiani dowhenu tọn lẹ mẹ to whenue e biọ domọ nado hẹn lẹndai Jehovah tọn di. Di apajlẹ:

• Angẹli de hùn ohọ̀n gànpa de tọn lẹ bo deanana apọsteli he yin súsú do gànmẹ lẹ nado zindonukọn to yẹwhehodidọ mẹ to tẹmpli mẹ.​—Owalọ lẹ 5:17-21.

• Angẹli de deanana wẹndagbe-jlatọ Filipi nado yì aliho danfafa tọn he tọ́n sọn Jelusalẹm yì Gaza ji bo dọyẹwheho na Etiopianu de he ko yì Jelusalẹm nado basi sinsẹ̀n.​—Owalọ lẹ 8:26-33.

• To whenue ojlẹ Jiwheyẹwhe tọn sọ̀ na mẹhe ma yin Ju lẹ nido lẹzun Klistiani, angẹli de sọawuhia Kọneliọsi he yin awhàngán Lomu tọn de to numimọ mẹ bo na ẹn anademẹ nado ylọ apọsteli Pita wá owhé etọn gbè.​—Owalọ lẹ 10:3-5.

• Whenue apọsteli Pita yin súsú do gànmẹ, angẹli de sọawuhia ẹ bo de e tọ́n sọn gànpa lọ mẹ.​—Owalọ lẹ 12:1-11.

Kunnudenu de ma tin dọ Jiwheyẹwhe nọ yí angẹli lẹ zan todin nado gọalọna omẹ etọn lẹ to azọ́njiawu-liho dile Biblu basi zẹẹmẹ etọn do gba. Ṣigba, Jesu dọ gando ojlẹ mítọn go dọmọ: “Yẹwheho wẹndagbe Ahọluduta lọ tọn ehe na yin didọ to aigba fininọ lẹpo ji taidi okunnu de na akọta lẹpo, podọ whenẹnu wẹ opodo lọ na wá.” (Matiu 24:14) Be a yọnẹn dọ devi Klisti tọn lẹ to azọ́n ehe wà to anademẹ angẹli lẹ tọn glọ ya?

Owe Osọhia tọn dohia dọ angẹli lẹ na dovivẹnu nado gọalọna gbẹtọ lẹ lẹdo aihọn pé nado plọnnu gando Jehovah Jiwheyẹwhe po lẹndai etọn na gbẹtọvi lẹ po go. Apọsteli Johanu wlan dọmọ: “Yẹn sọ mọ angẹli devo to zinzlọn to agahomẹ, podọ e tindo wẹndagbe madopodo nado lá na mẹhe nọ nọ̀ aigba ji lẹ, yèdọ na akọta lẹpo, hẹnnu lẹpo, ogbè lẹpo podọ gbẹtọ lẹpo. E to didọ po ogbè lélé po dọmọ: ‘Mì dibusi Jiwheyẹwhe bo na gigo e, na ojlẹ whẹdida etọn tọn ko wá, enẹwutu mì sẹ̀n Mẹlọ he dá olọn, aigba, ohù po asisa osin tọn lẹ po.’” (Osọhia 14:6, 7) Numimọ egbezangbe tọn susu wẹ dohia dọ angẹli lẹ to godonọna azọ́n Ahọluduta lọ lilá lẹdo aihọn pé tọn. Na nugbo tọn, etlẹ yin to whenue ylandonọ dopo lẹnvọjọ bo lẹkọ do Jehovah dè, “ayajẹ nọ tin to angẹli Jiwheyẹwhe tọn lẹ ṣẹnṣẹn.”​—Luku 15:10.

Etẹwẹ na jọ to whenue azọ́n yẹwhehodidọ tọn lọ na yin tadona? Whenẹnu, “awhànpa [angẹli] he to olọn mẹ lẹ” tọn na gọalọna Jesu Klisti, yèdọ Ahọlu ahọlu lẹ tọn nado fùn “awhàn azán daho Jiwheyẹwhe Ganhunupotọ lọ tọn” to Amagẹdọni. (Osọhia 16:14-16; 19:14-16) Angẹli huhlọnnọ lẹ na yin yiyizan nado hẹn whẹdida Jiwheyẹwhe tọn ṣẹ dile Oklunọ Jesu “na hẹn ahọsuyi wá mẹhe . . . ma setonuna wẹndagbe he gando Oklunọ mítọn Jesu go lẹ ji.”​—2 Tẹsalonikanu lẹ 1:7, 8.

Enẹwutu, deji dọ angẹli lẹ nọ tindo ojlo to hiẹ mẹ tlọlọ. Dagbemẹninọ mẹhe nọ jlo nado sẹ̀n Jiwheyẹwhe lẹ tọn nọ duahunmẹna yé taun, podọ Jehovah ko yí yé zan whlasusu nado na huhlọn devizọnwatọ nugbonọ etọn he to aigba ji lẹ bo basi hihọ́na yé.​—Heblu lẹ 1:14.

Enẹwutu, dopodopo mítọn wẹ pannukọn nudide titengbe de. Be mí na dotoai bo setonuna wẹndagbe he to yinyin lilá lẹdo aihọn pé lọ ya? Homẹ Kunnudetọ Jehovah tọn he to lẹdo towe mẹ lẹ tọn na hùn nado gọalọna we nado mọaleyi sọn alọgọ owanyinọ angẹli huhlọnnọ Jiwheyẹwhe tọn lẹ tọn mẹ.