HOSỌ he wayi lẹ ko dọhodo lehe ninọmẹ ylankan lẹ sọgan hẹn gbẹninọ pé agbọ́ mí do ji. Dile a to akọndona nuhahun towe lẹ, a gán nọ kanse eyin a gán gbẹ́ duvivi gbẹninọ tọn kavi eyin mẹde tlẹ nọ dọ towe. Deji dọ Jiwheyẹwhe yọ́n ninọmẹ towe lẹ. A vẹna ẹn taun.

Mẹhe kàn Salmu lẹ 86tọ do jidide etọn to Jiwheyẹwhe mẹ hia dọmọ: “Yẹn na dawhá ylọ we to azán ayimajai tọn gbè, na hiẹ na siọ mi.” (Salmu lẹ 86:7) Amọ́, a gán kanse dọ, ‘Nawẹ Jiwheyẹwhe na siọ mi “to azán ayimajai tọn gbè” gbọn?’

Nugbo wẹ dọ Jiwheyẹwhe gán nọma de nuhahun towe lẹ sẹ̀ tlolo, amọ́ Ohó etọn Biblu na we jide dọ ewọ gán gọalọna we nado vò to ahun mẹ bo doakọnna, na e dọmọ: “Mì yin magbọjẹnọ na nudepope blo, ṣigba to nulẹpo mẹ, mì nọ yí odẹ̀, ovẹ̀ po pẹdido po do hẹn obiọ mìtọn lẹ zun yinyọnẹn na Jiwheyẹwhe; jijọho Jiwheyẹwhe tọn he yiaga hugan nukunnumọjẹnumẹ lẹpo nasọ họ́ ahun mìtọn po linlẹn mìtọn po.” (Filipinu lẹ 4:6, 7, nudọnamẹ odò tọn) Jaale pọ́n lehe wefọ Biblu tọn he bọdego lẹ na mí jide dọ Jiwheyẹwhe nọ dọ mítọn do.

“Jiwheyẹwhe ma nọ yí nukunpẹvi do pọ́n depope to [oblẹnọ lẹ] mẹ. . . . Mìwlẹ họakuẹ hú oblẹnọ susu.”—Luku 12:6, 7, nudọnamẹ odò tọn.

LẸNNUPỌN: Ohẹ̀ he yè ma nọ kiyana enẹlẹ nọ họakuẹ to nukun Jiwheyẹwhe tọn mẹ. Jiwheyẹwhe nọ doayi ohẹ̀ oblẹnọ pẹvi enẹlẹ dopodopo go; yemẹpo wẹ yin nudida họakuẹ lẹ. Gbẹtọvi lẹ ka họakuẹ kavi vẹna Jiwheyẹwhe taun hú oblẹnọ lẹ. Gbẹtọvi lẹ wẹ yin nudida nukundeji hugan to aigba ji bo yin didá to “apajlẹ” Jiwheyẹwhe tọn mẹ podọ yé gán wleawuna nugopipe jiawu etọn lẹ bo do yé hia.—Jenẹsisi 1:26, 27.

“Jehovah E, hiẹ ko dindona mi bo yọ́n mi. . . . Hiẹ nọ mọ linlẹn he to ohò ṣie mẹ lẹ . . . Gbeje mi pọ́n bo yọ́n magbọjẹ ṣie lẹ.”—Salmu lẹ 139:1, 2, 23.

LẸNNUPỌN: Jiwheyẹwhe yọ́n we ganji. E yọ́n linlẹn towe po nuhe to ahun ji na we lẹ po. Eyin mẹdevo lẹ ma tlẹ yọ́n nuhahun he a to pipehẹ lẹ, Jiwheyẹwhe uwọ yọ́n yé bo jlo na gọalọna we. Enẹwutu, a gán gbẹ́ duvivi gbẹninọ tọn.

“Jehovah E, sè odẹ̀ ṣie; dike awhágbe ṣie na alọgọ ni jẹ dè we. . . . Lẹ́ otó towe hlan mi; yawu siọ mi to whenue n’ylọ we. . . . Ewọ na na ayidonugo odẹ̀ agbátọnọ tọn.”—Salmu lẹ 102:1, 2, 17.

LẸNNUPỌN: E taidi dọ sọn whenue yajiji gbẹtọvi tọn ko bẹjẹeji gbọ́n wẹ Jehovah ko nọ doayi dasin gbẹtọvi tọn lẹpo go. (Salmu lẹ 56:8) Dasin towe lẹ to e mẹ ga. Jiwheyẹwhe nọ doayi whlepọn po dasin towe lẹpo po go, na a vẹna ẹn wutu.

“A yin magbọjẹnọ blo, na yẹn wẹ Jiwheyẹwhe towe. Yẹn na hẹn we lodo, mọwẹ, n’na gọalọna we . . . yẹn, Jehovah Jiwheyẹwhe towe, yẹn . . . Mẹhe to didọna we dọ, ‘A dibu blo. N’na gọalọna we.’”—Isaia 41:10, 13.

LẸNNUPỌN: Jiwheyẹwhe to gbesisọ mẹ nado gọalọna we. Eyin a jai, e na jlọ we ṣite.

“Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.”—Johanu 3:16.

LẸNNUPỌN: A vẹna Jiwheyẹwhe sọmọ bọ e yí Visunnu etọn Jesu do sanvọ́ do ota towe mẹ. Avọ́sinsan ehe wẹ zọ́n bọ a tindo todido lọ nado nọgbẹ̀ kakadoi bo do ayajẹ. *