Plọn Ovi Towe Lẹ

Lahabi Sè Linlin Gando Islaelivi lẹ Go

MÍ NI dọ dọ mí tin to nudi owhe 3500 lẹ die, bo tin to tòdaho Jẹliko tọn mẹ, to aigba Kenani tọn ji. Viyọnnu de tin to tòdaho ehe mẹ he nọ yin Lahabi. Whenue Mose plan Islaelivi lẹ sọn kanlinmọgbenu Egipti tọn bo zinzọnlin gbọn Ohù Vẹẹ mẹ to aigba húhú ji godo wẹ e yin jiji. Ladio, televiziọn, kavi Internet depope ma tlẹ tin to whenẹnu, ṣigba Lahabi sè dogbọn azọ́njiawu ehe dali—dile etlẹ yindọ fie nujijọ enẹ wá aimẹ te dẹn do fie e nọ nọ̀. Be a yọ́n lehe Lahabi wagbọn do sè ya?— a

Matin ayihaawe, mẹhe nọ yì tògodo lẹ wẹ na ko pitàn azọ́njiawu ehelẹ tọn bọ e do sè. Dile Lahabi to whinwhẹ́n, e nọ flin nuhe Jehovah wà na Islaelivi lẹ. E sọ sè onú jiawu devo lẹ gando Islaelivi lẹ go. To owhe 40 he yé yizan to zungbo mẹ godo, yé biọ Kenani, podọ Jiwheyẹwhe nọ gọalọna yé nado gbawhàn mẹdepope he diọnukunsọ yé lẹ tọn. Todin, Lahabi sè dọ Islaelivi lẹ dosla sẹpọ Jẹliko, to Tọ̀sisa Jọdani godo!

To whèjai dopo, dawe awe delẹ wá Lahabi dè na yé yọnẹn dọ e nọ wazọ́n to fie jonọ lẹ sọgan dọ́. Enẹwutu, e yí yé do họmẹ. Whenue ozán kú, ahọlu Jẹliko tọn sè dọ Islaelivi amẹ́ delẹ wá Jẹliko bo yì fie Lahabi nọ wazọ́n te. Enẹwutu, ahọlu domẹhlan Lahabi, bo dọna ẹn dọ ni de sunnu he wá e dè lẹ tọ́n. Be a yọ́n nuhe Lahabi yọnẹn gando amẹ́ lọ lẹ go bosọ wà ya?—

Eyọn, whẹpo mẹhe ahọlu dohlan lẹ nido jẹ owhé Lahabi tọn gbè, e ko yọnẹn dọ amẹ́ Islaeli tọn lẹ wẹ jonọ etọn lẹ yin. Enẹwutu, e ze yé whlá do ozà ji, bo dọna mẹhe ahọlu dohlan lọ lẹ dọmọ: “Nugbo, omẹ ewlẹ wá dè e, . . . E sọ wá jọ to ojlẹ súsú họngbo tọn tọn, whenuena e yin zinvlu, wẹ dawe ewlẹ tọ́n yì.” Lahabi dọna yé dọmọ: “Mì yawu dómọna yé.”

Etẹwẹ a lẹndọ e na ko zọ́n bọ Lahabi do ze sunnu lọ lẹ whlá?— E dọ nuhe zọ́n lọ na yé dọmọ: “Yẹn yọnẹn dọ OKLUNỌ ko na aigba he mì . . . Na mí ko sè le OKLUNỌ hẹn osin Ohù Vẹẹ tọn hú to mì nukọn do, whenuena mì tọ́n sọn Egipti.” Lahabi ko sọ sè dogbọn lehe Jiwheyẹwhe gọalọna Islaelivi lẹ  nado gbawhàn kẹntọ yetọn lẹ tọn do dali.

Matin ayihaawe, homẹ Jehovah tọn hùn do aliho he mẹ Lahabi basi hihọ́na amẹ́ ehelẹ te go, dile Biblu dohia do to Heblu lẹ 11:31 mẹ. Homẹ Jehovah tọn sọ hùn to whenue Lahabi vẹ̀ amẹ́ lọ lẹ dọ: ‘Yẹn ko zan homẹhun hẹ mì, enẹwutu, yẹn vẹ̀ mì dọ mì ni dopà na mi dọ mìwlẹ na whlẹn otọ́ ṣie dogbẹ̀, po onọ̀ ṣie po, po nọvisunnu ṣie lẹ po, po nọviyọnnu ṣie lẹ po to whenue mì na gbawhàn Jẹliko tọn.’ Amẹ́ lọ lẹ dopà nado wàmọ, eyin Lahabi hodo nuhe yé dọ lẹ. Be a yọ́n nuhe yé dọna ẹn lẹ ya?—

‘Yí okàn vẹẹ ehe bo sìn in do fleṣe towe nù,’ wẹ amẹ́ lọ lẹ dona ẹn, ‘bo bẹ hẹnnumẹ towe lẹpo pli do owhé towe gbè. Eyin a wàmọ, mìmẹpo wẹ na gán.’ Lahabi wà nuhe amẹ́ lọ lẹ dọna ẹn pẹpẹ. Be a yọ́n nuhe wá jọ ya?—

Islaelivi lẹ wá adó Jẹliko tọn lẹ kọ̀n. Na azán voovo ṣidopo, yé nọ zinzọnlin lẹdo tòdaho lọ whladopo to gbèdopo abọẹ whii. To azán ṣinawetọ gbè, yé zinzọnlin lẹdo tòdaho lọ whla ṣinawe bo dawhá po ogbè lélé po. Adó lọ lẹ họ́—fie okàn vẹẹ te lọ kẹdẹ tọn wẹ pò to ote! Lahabi po whẹndo etọn po kẹdẹ wẹ gán.—Jọṣua 2:1-24; 6:1-5, 14, 15, 20-25.

Etẹwẹ mí sọgan plọn sọn nuhe Lahabi wà mẹ?— Eyọn, e ma yindọ e sè linlin gando nuhe Jiwheyẹwhe to wiwà nado whlẹn omẹ etọn lẹ go kẹdẹ wẹ gba, ṣigba e sọ gọalọna yé to whenue e biọ domọ. Mọwẹ, Lahabi de nado sẹ̀n Jehovah to pọmẹ hẹ omẹ Jiwheyẹwhe tọn lẹ! Be hiẹ lọsu na wà nudopolọ ya?— Odẹ̀ mítọn wẹ yindọ a ni wàmọ.

[Nudọnamẹ odò tọn]

Kanbiọ Lẹ:

○ Linlin titengbe tẹwẹ Lahabi sè to whenue e pò to ovu?

○ Nawẹ e yinuwa hẹ amẹ́ Islaeli tọn lẹ gbọn, podọ etẹwutu?

○ Opà tẹwẹ Lahabi biọ dọ amẹ́ lọ lẹ ni do na ẹn?

○ Nawẹ mí wagbọn do yọnẹn dọ homẹ Jehovah tọn hùn do Lahabi go, podọ nawẹ a sọgan hodo apajlẹ etọn gbọn?