Mawutọn: A fọ́n dagbe ya, Dona? Homẹ ṣie hùn nado mọ we to whégbè.

Dona: Homẹ yẹnlọsu tọn hùn nado mọ we.

Mawutọn: Gbetẹgbe die he n’wá fi, mí dọhodo numọtolanmẹ he Jiwheyẹwhe nọ tindo gando oyà he ji mí te lẹ go ji. * A dọna mi dọ sọn whenu dindẹn die wẹ whẹho enẹ ko nọ duahunmẹna emi, titengbe to whenue onọ̀ emitọn sọ wá gbleawu to asidan mọto tọn de whenu. N’já whẹ́, nawẹ e te do?

Dona: Whedelẹnu e nọ mọ ede mẹ pẹẹde, podọ whedelẹnu awú ma nọ yá ẹ. Amọ́, e mọ ede mẹ pẹẹde to egbé.

Mawutọn: Homẹ ṣie hùn nado sè enẹ. E ma nọ bọawu nado hẹn pọndohlan dagbe go to ninọmẹ ehe nkọ mẹ.

Dona: Nugbo wẹ a dọ. To whedelẹnu, n’nọ kanse dee whenue awufiẹsa lọ na wá doalọte.

Mawutọn: Jọwamọnu wẹ enẹ yin. A na flindọ, to vivọnu hodọdopọ mítọn he wayi tọn, n’fọ́n kanbiọ de dote gando nuhewutu Jiwheyẹwhe na dotẹnmẹ yajiji nado zindonukọn to whenuena e yindọ ewọ tindo huhlọn nado doalọtena ẹn go.

Dona: N’flin gbau.

Mawutọn: Whẹpo mí nido pọ́n nuhe Biblu dọ gando kanbiọ enẹ go, gbọ mí ni gbadopọnna nuagokun he ji mí dọhodo wayi delẹ to kleun mẹ.

Dona: E yọ́n.

Mawutọn: Jẹnukọn whẹ́, mí plọn dọ dawe nugbonọ he nọgbẹ̀ to ojlẹ Biblu tọn mẹ de tlẹ kanse ede nuhewutu Jiwheyẹwhe do jotẹnna yajiji. Etomọṣo, Jiwheyẹwhe ma gblewhẹdo e gbede na kanbiọ enẹ wutu, kavi dọna ẹn dọ yise wẹ whèdo e gba.

Dona: Onú yọyọ de wẹ enẹ yin bọ n’plọn to gbenẹgbe.

Mawutọn: Mí sọ plọn dọ e nọ vẹna Jehovah Jiwheyẹwhe nado mọdọ mí to yaji. Di apajlẹ, Biblu dọ dọ to whenue omẹ etọn lẹ tin to nukunbibia mẹ, “yè bianukun na ẹn.” * Be e ma yin homẹmiọnnamẹnu de wẹ e yin nado yọnẹn dọ Jiwheyẹwhe nọ vẹawu mí eyin mí to yaji ya?

Dona: Mọwẹ.

Mawutọn: Enẹgodo, mí mọnukunnujẹemẹ dọ, po lehe huhlọn Mẹdatọ mítọn tọn klo do sọ po, ayihaawe ma tin dọ ewọ tindo nugopipe lọ nado doalọtena yajiji to ojlẹ depope mẹ.

Dona: Nue nọ paṣa mi to hó lọ mẹ niyẹn. Naegbọn Jiwheyẹwhe na dotẹnmẹ nuylankan ehe lẹpo nado to jijọ to whenuena e yindọ ewọ tindo huhlọn nado doalọtena yé?

Mawutọn: Nado mọ gblọndo na kanbiọ enẹ, gbọ mí ni hùn owe tintan Biblu tọn, enẹ wẹ Gẹnẹsisi. Be a yọ́n otàn Adam, Evi po atin-sinsẹ́n he yè dosẹ́n etọn lọ po tọn ya?

Dona: Mọwẹ, n’plọn otàn enẹ to wehọmẹ dimanche tọn to ṣọṣi. Jiwheyẹwhe dọ dọ yé ma dona dù  sọn sinsẹ́n atin tangan de tọn mẹ, amọ́ yé sinyẹnta bo dù atin-sinsẹ́n lọ.

Mawutọn: Lehe e yì do pẹpẹ niyẹn. Todin, gbọ mí ni na ayidonugo nujijọ he hẹn Adam po Evi po biọ ylando mẹ lẹ. Nujijọ enẹlẹ tindo kanṣiṣa po nuhewutu mí do nọ jiya po. Jaale, be a sọgan hia Gẹnẹsisi weta 3, wefọ 1 jẹ 5 ya?

Dona: Gbau. “Odàn sọ yin zinzintọ hú kanlin gbémẹ tọn lẹpo he OKLUNỌ Jiwheyẹwhe dá. E sọ dọhlan yọnnu lọ, dọmọ, Ojé, Jiwheyẹwhe ko dọmọ Mì ma na dù to atin lẹ mẹ he tin to jipa mẹ lẹ depope? Yọnnu lọ sọ dọhlan odàn lọ, dọmọ, Mí sọgan dù to sinsẹ́n atin he tin to jipa mẹ tọn lẹ mẹ. Ṣigba sọn sinsẹ́n atin he tin to jipa ṣẹnṣẹn tọn mẹ, Jiwheyẹwhe ko dọmọ, Mì ma na dù sọn e mẹ, mọ mì ma na doalọ e go, mì nikaa kú. Odàn lọ sọ dọhlan yọnnu lọ, dọmọ, Mì ma na kú dandan gba: na Jiwheyẹwhe yọnẹn dọ azán he gbè mìwlẹ dù to e mẹ te, whenẹnu wẹ yè na hùn nukun mìtọn, bọ mìwlẹ na tin di Jiwheyẹwhe, bo yọ́n onú dagbe po oylan po.”

Mawutọn: A wanu. Gbọ mí ni lẹnnupọndo wefọ ehelẹ ji pẹẹde. Jẹnukọn whẹ́, doayi e go dọ odàn de dọhona Evi. Wefọ Biblu tọn devo dohia dọ, na nugbo tọn, Satani Lẹgba wẹ to hodọna ẹn gbọn odàn lọ gblamẹ. * Satani kanhose Evi do gbedide he Jiwheyẹwhe na gando atin tangan de go ji. Be a doayi nuhe Jiwheyẹwhe dọ dọ e na yin kọdetọn lọ eyin Adam po Evi po dù sọn sinsẹ́n atin lọ tọn mẹ go ya?

Dona: Yé na kú.

Mawutọn: Mọwẹ. Podọ hogbe Satani tọn he bọdego lẹ dohia dọ ewọ sawhẹ lalo tọn daho de dokọna Jiwheyẹwhe. Pọ́n nuhe e dọ. E dọmọ: “Mì ma na kú dandan gba.” Satani to Jiwheyẹwhe ylọdọ lalonọ!

Dona: N’ma mọnukunnujẹ adà otàn lọ tọn enẹ mẹ gbede dai.

Mawutọn: Podọ, to whenue Satani ylọ Jiwheyẹwhe dọ lalonọ, e fọ́n whẹho sinsinyẹn de dote, ehe e na biọ whenu susu nado didẹ. Be a yọ́n nuhewutu wẹ?

Dona: Un-un. N’ma gán dọ taun.

Mawutọn: Eyọ́n, vlavo n’sọgan yí apajlẹ ehe zan nado do nue zọ́n lọ hia we. Mí ni dọ dọ n’dọna we to gbèdopo dọ n’dohuhlọn hugan we. Nawẹ a sọgan dohia dọ lalodo wẹ n’te gbọn?

Dona: E na biọ dọ mí omẹ awe lẹ ni bayi tẹnpọn kleun de nado yọ́n mẹhe dohuhlọn hugan.

Mawutọn: Nulọ pẹẹ niyẹn. Vlavo mí sọgan ze onú pinpẹn de dai bo pọ́n mẹhe sọgan penugo to mí omẹ awe lẹ mẹ nado ze e yiaga. Na taun tọn, e bọawu nado yọ́n mẹhe dohuhlọn hugan mẹde.

Dona: N’wle nue dọ a te.

Mawutọn: Amọ́, eyin n’dọ dọ n’nọ dọ nugbo hugan we lo? Whẹho devo pete wẹ enẹ yin maa, kavi?

Dona: Gbau.

Mawutọn: To popolẹpo mẹ, yè ma sọgan basi tẹnpọn kleun de poun nado dohia dọ mẹde yin nugbodọtọ, kẹdẹdile yè nọ wà do nado yọ́n mẹhe dohuhlọn hugan gba.

Dona: Nugbo wẹ.

Mawutọn: Na nugbo tọn, aliho dopo gee he mẹ whẹho enẹ sọgan yin dididẹ te wẹ nado jo whenu he pemẹnu do, na mẹdevo lẹ nido doayi mẹhe nọ dọ nugbo na taun tọn to mí omẹ awe lẹ mẹ go.

Dona: Hójọhó wẹ a dọ.

Mawutọn: Todin, gbọ mí ni gọwá otàn Gẹnẹsisi tọn lọ ji whladopo dogọ. Be Satani dọ dọ emi dohuhlọn hugan Jiwheyẹwhe wẹ ya?

Dona: Lala.

Mawutọn: Eyin mọ wẹ e ko yin, Jiwheyẹwhe na ko didẹ whẹho enẹ hoho. Amọ́, nuhe Satani dọ wẹ yindọ emi nọ dọ nugbo hugan Jiwheyẹwhe. Na taun tọn, nue dọna Evi e te wẹ yindọ, ‘Jiwheyẹwhe to lalodo na mì, amọ́ nugbo dọna mì wẹ yẹn te.’

Dona: Etẹ nkọ!

Mawutọn: Enẹwutu, sọgbe hẹ nuyọnẹn he Jiwheyẹwhe tindo, Ewọ yọnẹn dọ aliho dagbe hugan he mẹ whẹho enẹ sọgan yin dididẹ te wẹ nado dike ojlẹ ni juwayi. Gbọnmọ dali, mẹhe to nugbo dọ po mẹhe to lalodo po na wá họnwun gblegede to nukọn mẹ.

Dona: Amọ́, be okú Evi tọn ma dohia dọ Jiwheyẹwhe wẹ to nugbo dọ ya?

 Mawutọn: To linlẹn de mẹ, mọ wẹ. Amọ́, whẹho he Satani fọndote lọ gbloada hugan mọ. Pọ́n nuhe wefọ 5tọ lọ dọ whladopo dogọ. Be a doayi nudevo he Satani dọna Evi go ya?

Dona: E dọ dọ eyin ewọ dù atin-sinsẹ́n lọ, nukun etọn lẹ na hùn.

Mawutọn: Mọwẹ, podọ e na tin “di Jiwheyẹwhe, bo yọ́n onú dagbe po oylan po.” Gbọnmọ dali, Satani to didọ dọ Jiwheyẹwhe to onú dagbe de ze whlá do gbẹtọvi lẹ.

Dona: N’mọnukunnujẹ nue dọ a te mẹ.

Mawutọn: Amọ́, whẹho sinsinyẹn de wẹ enẹ lọsu yin ga.

Dona: Gbọnna?

Mawutọn: Hogbe Satani tọn lẹ dohia dọ gbẹzan Evi tọn—kakajẹ gbẹtọvi lẹpo tọn ji—na ko pọnte eyin yé ma tin to gandudu Jiwheyẹwhe tọn glọ. To whẹho ehe lọsu mẹ, Jehovah yọnẹn dọ aliho dagbe hugan he mẹ avùnnukundiọsọmẹ lọ sọgan yin dididẹ te wẹ nado dike na Satani lọsu ni tẹnpọn nado dohia eyin nuhe e dọ lọ yin nugbo. Enẹwutu, Jiwheyẹwhe na dotẹnmẹ Satani nado dugán do aihọn lọ ji na ojlẹ de. Nuhe zọ́n niyẹn bọ yajiji do gbayipe to aihọn lọ mẹ sọmọ—na Satani wẹ to gandu do aihọn lọ ji, e ma yin Jiwheyẹwhe. * Amọ́ wẹndagbe de tin.

Dona: Wẹndagbe tẹ niyẹn?

Mawutọn: Biblu plọn mí nugbo họakuẹ awe delẹ gando Jiwheyẹwhe go. Tintan, Jehovah nọ vẹawu mí eyin mí to yaji. Di apajlẹ, lẹnnupọndo hogbe Ahọlu Davidi tọn he to Psalm 31:7 mẹ lẹ ji. Davidi jiya susu to gbẹzan etọn mẹ, amọ́ doayi nuhe e dọna Jiwheyẹwhe to odẹ̀ mẹ go. Jaale, be a gán hia wefọ lọ ya?

Dona: Eyọ́n, e dọmọ: “Yẹn na yin homẹhunnọ bosọ jaya to dagbewanyi towe mẹ: na hiẹ ko lẹn magbọjẹ ṣie pọ́n; bosọ yọ́n ayiha ṣie to nukunbibia mẹ.”

Mawutọn: Mahopọnna dọ Davidi jiya susu, e yin homẹmiọnna, na e yọnẹn dọ Jehovah yọ́n adán he to emi gbò lẹpo. Be homẹmiọnnamẹnu wẹ e yin na hiẹ lọsu nado yọnẹn dọ Jehovah yọ́n adán he to mí gbò lẹpo, etlẹ yin numọtolanmẹ awufiẹsa tọn mítọn he mẹdevo lẹ ma sọgan mọnukunnujẹemẹ to gigọ́ mẹ lẹ ya?

Dona: Mọwẹ.

Mawutọn: Nugbo awetọ wẹ yindọ, Jiwheyẹwhe ma na dike mí ni to yaji kakadoi. Biblu plọn mí dọ to madẹnmẹ, ewọ na hẹn gandudu ylankan Satani tọn wá opodo. Podọ, e na de onú ylankan lẹpo sẹ̀, etlẹ yin dehe to awufiẹsa hẹnwa na hiẹ po onọ̀ towe po lẹ. Be n’sọgan lẹkọwa to osẹ he ja mẹ bo do nuhewutu mí sọgan deji dọ Jiwheyẹwhe na de yajiji lẹpo sẹ̀ to madẹnmẹ hia we ya? *

Dona: Enẹ na yọ́n taun.