HOSỌ HE JẸNUKỌN | A SỌGAN MỌALEYI SỌN BIBLU HIHIA MẸ DOGỌ
Naegbọn Mí Dona Hia Biblu?
“N’nọ lẹndọ e na vẹawu taun nado mọnukunnujẹ Biblu mẹ.”—Jovy
“N’nọ mọdọ e ma na fọnjlodotenamẹ.”—Queennie
“Eyin n’pọ́n lehe Biblu klo do, n’ma nọ jlo na hia ẹ paali.”—Ezekiel
Be a ko jlo na hia Biblu bọ nuhe yin nùdego to aga enẹlẹ hẹn we gbọjọ pọ́n ya? Mẹsusu nọ mọdọ Biblu hihia ma nọ yin awuvivinu. Ṣigba, etẹwẹ lo, eyin a yọnẹn dọ Biblu sọgan gọalọna we nado tindo gbẹzan he gọ́ na ayajẹ po pekọ po? Podọ etẹwẹ lo, eyin a wá mọdọ afọdide delẹ tin he sọgan gọalọna we nado duvivi Biblu hihia tọn? Be e na jlo we nado mọ ale he Biblu sọgan hẹnwa na we lẹ ya?
Pọ́n vude poun to nuhe mẹhe ko jẹ Biblu hia ji bo ko mọaleyi sọn e mẹ lẹ dọ mẹ.
Ezekiel he tindo owhe 20 linlán dọmọ: “To dai, n’taidi mẹhe to húnkun bo ma yọ́n fihe e jei. Amọ́, Biblu hihia ko gọalọna mi nado tindo gbẹzan dagbe. E bẹ ayinamẹ dagbe he sọgan gọalọna mi to azán lẹpo ji hẹn.”
Frieda he tindo owhe 20 linlán lọsu dọmọ: “N’nọ yawu duadi. Ṣigba, Biblu hihia ko gọalọna mi nado nọ duto dee ji. Ehe zọ́n bọ n’yọ́n dọnsẹpọ, bosọ tindo họntọn susu todin.”
Nawe de he nọ yin Eunice bo tindo owhe 50 linlán dọ gando Biblu go dọ, “E to alọgọna mi nado lẹzun gbẹtọ-jọ-gbẹtọ, enẹ wẹ nado diọ walọ ylankan ṣie lẹ.”
Dile omẹ enẹlẹ po omẹ livi susu devo lẹ po ko dọ do, Biblu hihia sọgan gọalọna we nado duvivi gbẹzan dagbe de tọn. (Isaia 48:17, 18) Gbọnvona enẹ, e sọgan gọalọna mí (1) nado nọ basi nudide dagbe lẹ, (2) nado jihọntọn dagbe lẹ, (3) nado duto flumẹjijẹ ji, podọ hú popolẹpo (4) nado plọn nugbo lọ gando Jiwheyẹwhe go. Jiwheyẹwhe dè wẹ ayinamẹ Biblu tọn lẹ wá sọn, enẹwutu e ma na vẹna we gbede eyin a nọ hodo yé. Jiwheyẹwhe ma nọ na ayinamẹ ylankan gbede.
Onú titengbe lọ wẹ yindọ mí ni jẹ Biblu hia ji. Afọdide tẹlẹ wẹ sọgan zọ́n bọ e na bọawu bo yin awuvivinu na we?
