To gbèdopo, Jesu dọho gando Otọ́ etọn, Jehovah go to Jelusalẹm bo de sinsẹngán lalo ojlẹ etọn mẹ tọn lẹ gbà. (Johanu 8:12-30) Nuhe e dọ to gbenẹgbe lẹ plọn mí lehe mí na nọ gbeje nuyise he gbayipe gando Jiwheyẹwhe go to egbehe lẹ do. Jesu dọmọ: “Eyin mì gbọṣi ohó ṣie mẹ, be devi ṣie wẹ mì yin nugbonugbo, mìwlẹ nasọ yọ́n nugbo lọ, nugbo lọ nasọ hẹn mì jẹ mẹdekannu.”—Johanu 8:31, 32.

“Mì gbọṣi ohó ṣie mẹ.” Po hogbe ehelẹ po, Jesu ze nujinọtedo de dai, ehe mí na nọ hodo nado gbeje sinsẹ̀n-nuplọnmẹ lẹ pọ́n, nado yọnẹn eyin yé yin “nugbo” kavi lalo. Eyin a sè nude gando Jiwheyẹwhe go, nọ kanse dewe dọ, ‘Be e sọgbe hẹ ohó Jesu tọn lẹ po adà Owe-Wiwe tọn he pò lẹ po ya?’ Nọ hodo apajlẹ mẹhe dotoaina ohó apọsteli Paulu tọn lẹ bosọ “yí sọwhiwhe do gbadopọnna Owe-wiwe lẹ egbesọegbesọ nado pọ́n eyin onú ehelẹ [nuhe yé to pinplọn lẹ] yinmọ.”—Owalọ lẹ 17:11.

Marco, Rosa po Raymonde po he yin nùdego to hosọ tintan lọ mẹ lẹ wá yí sọwhiwhe do gbeje nuyise yetọn lẹ pọ́n gbọn Biblu pinplọn hẹ Kunnudetọ Jehovah tọn lẹ dali. Etẹlẹ wẹ yé plọn?

Marco: “Mẹhe plọn Biblu hẹ mí nọ yí Owe-wiwe lẹ zan nado na gblọndo na kanbiọ he yẹn po asi ṣie po nọ kanse lẹ dopodopo. Owanyi mítọn na Jehovah fọ́n bo to jijideji, podọ mí sọ dọnsẹpọ ode awetọ dogọ taidi asu po asi po!”

Rosa: “To tintan whenu, n’nọ lẹndọ Biblu ma yin nudevo de hú owe tamẹnuplọnmẹ tọn de, he mẹ yè yí aliho nulẹnpọn tọn gbẹtọ tọn lẹ do basi zẹẹmẹ gando Jiwheyẹwhe go te. Amọ́, vudevude, n’wá mọ gblọndo he Biblu na na kanbiọ ṣie lẹ. Todin, n’nọ mọdọ Jehovah tin nugbonugbo. Mẹhe go n’gán dejido de wẹ Ewọ.”

Raymonde: “N’hodẹ̀ hlan Jiwheyẹwhe dọ ni gọalọna mi nado yọ́n mẹhe ewọ yin. Ojlẹ vude to enẹgodo, yẹn po asu ṣie po jẹ Biblu plọn ji. To godo mẹ, mí wá yọ́n nugbo lọ gando Jehovah go! Homẹ mítọn hùn taun nado mọ Jiwheyẹwhe he nkọ ewọ yin.”

E ma yin lalo he yin dido dokọna Jiwheyẹwhe lẹ kẹdẹ wẹ Biblu degbà, e sọ bẹ nugbo lọ hẹn gando jẹhẹnu dagbedagbe etọn lẹ go. Ohó gbọdo Jiwheyẹwhe tọn wẹ, podọ e sọ nọ gọalọna mí nado “yọ́n nuhe Jiwheyẹwhe ko gbọn homẹdagbe dali na mí lẹ.” (1 Kọlintinu lẹ 2:12) Be e ma jẹ dọ hiẹ lọsu ni dindona gblọndo he Biblu gán na, na kanbiọ titengbe he mẹlẹ nọ saba kanse gando Jiwheyẹwhe, lẹndai etọn po sọgodo mítọn po go lẹ ya? A sọgan mọ delẹ to kanbiọ ehelẹ mẹ sin gblọndo to adà lọ “Nuhe Biblu Plọn Mí > Gblọndo Na Kanbiọ Sinai Do Biblu Ji Lẹ” glọ to www.ps8318.com ji. A sọgan sọ doalọwemẹ to nọtẹn Intẹnẹt tọn enẹ ji, nado biọ dọ mẹde ni wá plọn Biblu hẹ we kavi biọ to Kunnudetọ Jehovah tọn de si tlọlọ nado plọnnu hẹ we. Mí kudeji dọ eyin a wàmọ, a na wá mọdọ e bọawu taun nado yiwanna Jiwheyẹwhe hú lehe a gán ko nọ lẹn do.