WETA 7
Huhlọn Hihọ́-Basinamẹ Tọn—‘Jiwheyẹwhe Wẹ Fibẹtado Mítọn’
1, 2. Owù tẹmẹ wẹ Islaelivi lẹ tin te to whenue yé biọ agbegbe Sinai tọn mẹ to bẹjẹeji 1513 J.W.M., podọ nawẹ Jehovah na yé jide gbọn?
ISLAELIVI lẹ tin to owù mẹ to whenue yé biọ agbegbe Sinai tọn mẹ to bẹjẹeji owhe 1513 J.W.M. Yé dona zìn gbejizọnlin budonamẹ tọn de gbọn “zungbo kiklo podọ he dobu lọ mẹ luntọ́n, fie mẹ odàn [adínọ] lẹ te po aklekle lẹ po.” (Deutelonomi 8:15) Yé sọ pannukọn owù mẹgbeyinyan akọta heyin kẹntọ yetọn lẹ tọn. Jehovah wẹ hẹn omẹ etọn lẹ biọ ninọmẹ ehe mẹ. Ṣigba, taidi Jiwheyẹwhe yetọn, be e na penugo nado basi hihọ́na yé ya?
2 Ohó Jehovah tọn lẹ namẹ jide taun dọmọ: “Mìwlẹ ko mọ nuhe yẹn wà hlan Egiptinu lẹ, podọ le yẹn ze mì hẹn awà akùn tọn lẹ ji do, bo hẹn mì wá dee dè do.” (Eksọdusi 19:4) Jehovah flinnu omẹ etọn lẹ dọ emi ko whlẹn yé sọn alọ Egiptinu lẹ tọn mẹ, gbọn yizan akùn lẹ tọn dali, to yẹhiadonu-liho, nado ze yé yì otẹn hihọ́ tọn mẹ. Ṣigba whẹwhinwhẹ́n devo lẹ tin he wutu e sọgbe nado yí “awà akùn tọn lẹ” zan taidi apajlẹ hihọ́ Jiwheyẹwhe tọn.
3. Naegbọn e do sọgbe nado yí “awà akùn tọn lẹ” zan taidi apajlẹ hihọ́ Jiwheyẹwhe tọn?
3 Akùn ma nọ yí awà daho huhlọnnọ etọn do zlọ́n poun gba. To owhè sinsinyẹn whenu, akùn he tindo ovivu lẹ nọ kẹ̀ awà etọn lẹ, he nọ gblo hú mẹtlu awe, nado wleawuna yẹtẹn he nọ basi hihọ́na ovivu etọn lẹ sọn owhè sinsinyẹn lọ nù. To ojlẹ devo lẹ mẹ, e nọ ṣinyọ́n awà etọn lẹ do ovi etọn lẹ ji nado basi hihọ́na yé sọn avivọ nù. Kẹdẹdile akùn nọ basi hihọ́na ovi etọn do, mọwẹ Jehovah ko penukundo akọta yọyọ Islaeli tọn go bo basi hihọ́na yé do. Todin, eyin omẹ etọn lẹ na zindonukọn nado nọ mọ fibẹtado to oyẹ̀ awà huhlọnnọ etọn lẹ tọn glọ to zungbo mẹ, yé dona yin nugbonọ. (Deutelonomi 32:9-11; Psalm 36:7) Ṣigba be e sọgbe dọ mí ni donukun hihọ́ Jiwheyẹwhe tọn to egbehe ya?
Opagbe Hihọ́-Basinamẹ Jiwheyẹwhe Tọn
4, 5. (a) Naegbọn mí sọgan tindo jide mlẹnmlẹn to opagbe hihọ́-basinamẹ Jiwheyẹwhe tọn mẹ?
4 E họnwun dọ Jehovah penugo nado basi hihọ́na devizọnwatọ etọn lẹ. Ewọ wẹ yin “Jiwheyẹwhe Ganhunupotọ”—yèdọ tẹnmẹ-yinkọ de he dohia dọ e tindo huhlọn he klohugan. (Gẹnẹsisi 17:1) Taidi agbówhẹn sinsinyẹn de, mọwẹ awà huhlọnnọ Jehovah tọn ma sọgan yin alọhẹndotena do niyẹn. To whenuena e yindọ ewọ penugo nado wà nudepope he jlo e, mí sọgan kanse dọ, ‘Be e jlo Jehovah nado yí huhlọn etọn zan nado basi hihọ́na omẹ etọn lẹ ya?’
5 Do glido, gblọndo lọ yin mọwẹ! Jehovah na jide mí dọ emi na basi hihọ́na omẹ emitọn lẹ. Psalm 46:1 dọmọ: “Jiwheyẹwhe wẹ fibẹtado po huhlọn mítọn po, alọgọ alọnu-alọnu tọn to tukla mẹ.” Jiwheyẹwhe “ma nọ dolalo.” Enẹwutu mí sọgan tindo jide mlẹnmlẹn to opagbe hihọ́-basinamẹ tọn etọn mẹ. (Titu 1:2) Mì gbọ mí ni gbadopọnna hogbe awuvivinamẹ tọn delẹ he Jehovah yizan nado basi zẹẹmẹ nukunpedomẹgo hihọ́-basinamẹ etọn tọn.
6, 7. (a) Hihọ́ nankọ wẹ lẹngbọhọtọ he nọgbẹ̀ to ojlẹ Biblu tọn mẹ lẹ nọ basi na lẹngbọ yetọn lẹ? (b) Apajlẹ tẹwẹ Biblu yizan nado do ojlo sọn ahun mẹ wá Jehovah tọn nado basi hihọ́ bo penukundo lẹngbọ etọn lẹ go hia?
6 Jehovah yin Lẹngbọhọtọ de, podọ “omẹ etọn wẹ mí, lẹngbọ yìndugbo etọn tọn.” (Psalm 23:1; 100:3) Lẹngbọ yin kanlin madogánnọ de. Lẹngbọhọtọ he nọgbẹ̀ to ojlẹ Biblu tọn mẹ lẹ dona yin adọgbotọ nado sọgan basi hihọ́na lẹngbọ yetọn lẹ sọn owù kinnikinni, ohla, po beali po tọn mẹ, podọ sọn alọ ajotọ lẹ tọn mẹ. (1 Samuẹli 17:34, 35; Johanu 10:12, 13) Ṣigba to whedelẹnu, hihọ́-bibasina lẹngbọ lẹ nọ biọ awuvẹmẹ. To whenuena lẹngbọ de jivi to fie dẹn do apó etọn, lẹngbọhọtọ lọ na deanana ẹn to ojlẹ madogán tọn etọn mẹ bo na ze lẹngbọvu lọ yì apó mẹ.
‘E na ze yé do akọ́n etọn nù’
7 Gbọn ede yiyijlẹdo lẹngbọhọtọ de go dali, Jehovah to jide na mí gando ojlo sọn ahun mẹ wá etọn go nado basi hihọ́na mí. (Ezekiẹli 34:11-16) Flin mẹhe go Jehovah yin yiyijlẹdo to Isaia 40:11 mẹ, ehe yin hodọdeji to Weta 2tọ owe ehe tọn mẹ dọmọ: “Ewọ na yìn kanlinpa etọn di lẹngbọhọtọ de: e nasọ yí awà etọn do bẹ lẹngbọvu lẹ pli, bo ze yé do akọ́n etọn nù.” Nawẹ lẹngbọvu de na wá tin to “akọ́n” lẹngbọhọtọ de tọn nù—yèdọ to apò awugbó etọn tọn mẹ gbọn? Lẹngbọvu lọ dona ko wá lẹngbọhọtọ lọ dè, bo tlẹ sọgan ganjẹ afọ etọn go. Ṣigba, lẹngbọhọtọ lọ wẹ dona fẹ̀ yido bo ze lẹngbọvu lọ, bo nasọ wà dẹẹdẹ do ze e do akọ́n etọn nù fie e na mọ hihọ́ te. Apajlẹ awuvẹmẹ tọn nankọ die nado dohia dọ Lẹngbọhọtọ Daho mítọn tindo ojlo nado penukundo mí go bo basi hihọ́na mí!
8. (a) Mẹnu lẹ wẹ opagbe hihọ́-basinamẹ Jiwheyẹwhe tọn yin didó na, podọ nawẹ ehe yin didohia to Howhinwhẹn lẹ 18:10 mẹ gbọn? (b) Etẹwẹ fibẹtado dindin to oyín Jiwheyẹwhe tọn mẹ bẹhẹn?
8 Ṣigba mẹhe dọnsẹpọ Jiwheyẹwhe lẹ kẹdẹ wẹ sọgan mọ hihọ́ he e dopagbe etọn yí. Howhinwhẹn lẹ 18:10, dọmọ: “Oyín [Jehovah] tọn, wẹ ohọ̀ gángán: Dodonọ họ̀n biọ e mẹ, bosọ gán.” To ojlẹ Biblu tọn lẹ mẹ, atọ̀họ̀ lẹ nọ yin gbigbá do zungbo mẹ to whedelẹnu taidi nọtẹn fibẹtado tọn. Ṣigba, e pò to mẹhe to owù mẹ lọ si nado họ̀n yì ohọ̀ gángán lọ mẹ nado mọ hihọ́. Mọjanwẹ fibẹtado dindin to oyín Jiwheyẹwhe tọn mẹ lọsu te ga. Ehe ma zẹẹmẹdo oyín Jiwheyẹwhe tọn kiké poun gba; oyín lọ lọsu ma yin bogbèsisa gba. Kakatimọ, mí dona yọ́n Mẹhe tindo oyín enẹ bo dejidego bosọ nọgbẹ̀ sọgbe hẹ nujinọtedo dodo tọn etọn lẹ. Lehe homẹdagbe Jehovah tọn sù do sọ nado na mí jide dọ, eyin mí tindo yise to emi mẹ, emi na yin atọ̀họ̀ hihọ́ tọn de na mí!
“Jiwheyẹwhe Mítọn . . . Tin Sọgan Nado Whlẹn Mí”
9. Gbọnvona opagbe hihọ́-basinamẹ tọn he Jehovah dó, etẹwẹ e sọ wà?
9 Jehovah ma nọ dopagbe hihọ́ tọn poun gba. To ojlẹ Biblu tọn lẹ mẹ, e dohia to aliho jiawu lẹ mẹ dọ emi penugo nado basi hihọ́na omẹ emitọn lẹ. To whenuho Islaeli tọn mẹ, “alọ” huhlọnnọ Jehovah tọn nọ saba glọnalina kẹntọ huhlọnnọ lẹ. (Eksọdusi 7:4) Ṣigba, Jehovah sọ yí huhlọn hihọ́-basinamẹ tọn etọn zan do ota mẹdopodopo tọn mẹ.
10, 11. Apajlẹ tẹlẹ to Biblu mẹ wẹ dohia lehe Jehovah nọ yí huhlọn hihọ́-basinamẹ tọn etọn zan do ota omẹ dopodopo tọn mẹ?
10 To whenuena Heblunu atọ̀n lọ lẹ—Ṣadlaki, Mẹṣaki, po Abẹdi-nẹgo po gbẹ́ nado litaina boṣiọ sika tọn he Ahọlu Nẹbukadnẹzali zedai, ahọlu lọ gblehomẹ bo sìn-adán nado ze yé dlan zòhọ he yin hinhẹn hùnmiyọ́n tlala de mẹ. Nẹbukadnẹzali he yin ahọluigbagán huhlọnnọ hugan to aigba ji yí yé do davlẹ dọmọ: “Mẹnu wẹ yẹwhe nẹ he na whlẹn mì sọn alọ ṣie lẹ mẹ?” (Daniẹli 3:15) Dẹpẹ atọ̀n lọ lẹ tindo jide mlẹnmlẹn to huhlọn Jiwheyẹwhe yetọn tọn mẹ nado basi hihọ́na yé, ṣigba yé ma kudeji dọ e na wàmọ dandan gba. Enẹwutu, yé gblọn dọmọ: “Jiwheyẹwhe mẹhe míwlẹ to sinsẹ̀n tin sọgan nado whlẹn mí.” (Daniẹli 3:17) Na nugbo tọn, zòhọ miyọ́n tọn he tlẹ yin hinhẹn hùnmiyọ́n whla ṣinawe hú lehe e te dai, ma glọnalina Jiwheyẹwhe huhlọnnọ hugan yetọn gba. E basi hihọ́na yé, bọ ahọlu lọ yin hinhẹn po huhlọn po nado yigbe dọ: “Yẹwhe devo de ma tin he tin sọgan nado whlẹnmẹ kẹdẹdi ehe hunkọ.”—Daniẹli 3:29.
11 Jehovah sọ do huhlọn hihọ́-basinamẹ tọn etọn hia to aliho ayidego tọn devo mẹ to whenuena e diọadana ogbẹ̀ Ovi dopo akàn etọn tọn biọ vidọ Juvi awhli he yin Malia lọ tọn mẹ. Angẹli de dọna Malia dọ e na “mọhò to ohò [etọn] mẹ, bo nasọ ji visunnu de.” Angẹli lọ basi zẹẹmẹ dọmọ: “Gbigbọ [wiwe] na wá oji we, huhlọn Gigogán tọn nasọ ṣinyọ́n oyẹ̀ oji we.” (Luku 1:31, 35) Na taun tọn, Ovi Jiwheyẹwhe tọn ma ko nọ owù de mẹ pọ́n gbede gba. Be ylando po mape onọ̀ etọn tọn po na bẹpla ovivu he to homẹ lọ wẹ ya? Be Satani na penugo nado gbleawuna Ovi lọ kavi hù i whẹpo E na do yin jiji wẹ ya? Paali! Jehovah wleawuna adó yẹhiadonu tọn de lẹdo Malia bọ nudepope taidi mape, huhlọn ylankan de, gbẹtọvi mẹhutọ de, kavi aovi depope ma sọgan hẹn ohò lọ gble gba. Jehovah sọ zindonukọn nado basi hihọ́na Jesu to jọja whenu etọn. (Matiu 2:1-15) Jiwheyẹwhe basi hihọ́na Ovi yiwanna etọn kakajẹ ojlẹ dide etọn mẹ.
12. Naegbọn Jehovah basi hihọ́na omẹ dopodopo delẹ to azọ́njiawu-liho to ojlẹ Biblu tọn lẹ mẹ?
12 Naegbọn Jehovah do basi hihọ́na omẹ dopodopo delẹ to aliho jiawu mọnkọtọn lẹ mẹ? To whẹho susu mẹ, Jehovah whlá omẹ dopodopo delẹ nado sọgan basi hihọ́na onú titengbe hugan de: enẹ wẹ hẹndi lẹndai etọn tọn. Di apajlẹ, gbẹninọ Jesu tọn to whenuena e gbẹ́ yin viyẹyẹ de yin dandannu de na hẹndi lẹndai Jiwheyẹwhe tọn, ehe na hẹn ale wá na gbẹtọvi lẹpo to godo mẹ. Kandai susu he do huhlọn hihọ́-basinamẹ tọn ehelẹ hia yin apadewhe Owe-wiwe gbọdo lọ tọn, ehe “yè wlan yé na oplọn mítọn, dọ míwlẹ gbọn homẹfa po homẹmiọn Owe-wiwe lẹ tọn po dali nido tindo otodo.” (Lomunu lẹ 15:4) Mọwẹ, apajlẹ ehelẹ nọ hẹn yise mítọn lodo to Jiwheyẹwhe huhlọnnọ hugan mítọn mẹ. Ṣigba hihọ́ nankọ wẹ mí sọgan donukun sọn Jiwheyẹwhe dè to egbehe?
Nuhe Hihọ́-Basinamẹ Jiwheyẹwhe Tọn Ma Zẹẹmẹdo
13. Be dandan wẹ e yin na Jehovah nado wà azọ́njiawu lẹ do ota mítọn mẹ ya? Basi zẹẹmẹ.
13 Opagbe hihọ́-basinamẹ Jiwheyẹwhe tọn ma zẹẹmẹdo dọ e yin dandan na Jehovah nado wà azọ́njiawu lẹ do ota mítọn mẹ gba. Lala, Jiwheyẹwhe mítọn ma dopagbe dọ mí ma na tindo nuhahun to titonu ehe mẹ gba. Devizọnwatọ nugbonọ Jehovah tọn susu wẹ nọ pehẹ yajiji sinsinyẹn lẹ, ohẹ́n, awhàn, azọ̀n, po okú po. Jesu dọna devi etọn lẹ hezeheze dọ mẹdelẹ to yé mẹ sọgan yin hùhù na yise yetọn wutu. Enẹwutu wẹ Jesu zinnudo nuhudo akọndidona kakajẹ opodo tọn ji. (Matiu 24:9, 13) Eyin Jehovah nọ yí huhlọn etọn zan nado hẹn whlẹngán wá to azọ́njiawu-liho to whepoponu, Satani na tindo whẹwhinwhẹ́n nado vlẹ Jehovah kò bo na tindo ayihaawe gando mẹdezejo mítọn na Jiwheyẹwhe go.—Job 1:9, 10.
14. Apajlẹ tẹlẹ wẹ dohia dọ Jehovah ma nọ basi hihọ́na devizọnwatọ etọn lẹpo to aliho dopolọ mẹ to whepoponu?
14 Etlẹ yin to ojlẹ Biblu tọn lẹ mẹ, Jehovah ma yí huhlọn hihọ́-basinamẹ tọn etọn zan nado basi hihọ́na devizọnwatọ etọn lẹ dopodopo sọn okú ajiji mẹ tọn si gba. Di apajlẹ, Hẹlodi hù apọsteli Jakobu to nudi owhe 44 W.M. mẹ; ṣogan to ojlẹ gli de godo, Pita yin whinwhlẹngán “sọn alọ Hẹlodi tọn mẹ.” (Owalọ lẹ 12:1-11) Podọ Johanu, nọvisunnu Jakobu tọn nọgbẹ̀ dẹn hú Pita po Jakobu po. Enẹwutu, mí ma sọgan donukun Jiwheyẹwhe mítọn nado basi hihọ́na devizọnwatọ etọn lẹpo to aliho dopolọ mẹ gba. Humọ, “ojlẹ po kosọ po mẹ wẹ onú te na” mímẹpo. (Yẹwhehodọtọ 9:11) To whelọnu lo, nawẹ Jehovah nọ basi hihọ́na mí to egbehe gbọn?
Jehovah Nọ Basi Hihọ́na Mí to Agbasa-Liho
15, 16. (a) Kunnudenu tẹwẹ dohia dọ Jehovah ko basi hihọ́na sinsẹ̀n-basitọ etọn lẹ to agbasa-liho taidi pipli de? (b) Naegbọn mí sọgan tindo nujikudo dọ Jehovah na basi hihọ́na devizọnwatọ etọn lẹ todin podọ to “nukunbibia daho” lọ whenu?
15 Jẹnukọn whẹ́, lẹnnupọndo hihọ́ agbasa-liho tọn ji. Taidi sinsẹ̀n-basitọ Jehovah tọn lẹ, mí sọgan donukun hihọ́ mọnkọtọn taidi pipli de. Eyin e ma yinmọ, mí na yawu jai jẹ omọ Satani tọn mẹ. Lẹnnupọndo ehe ji: Satani, “ahọvi aihọn he tọn,” ma na jlo nudevo depope hugan nado sukúndona sinsẹ̀n-bibasi nugbo. (Johanu 12:31; Osọhia 12:17) Delẹ to gandudu huhlọnnọ hugan aigba ji tọn lẹ mẹ ko hẹnalọdotena azọ́n yẹwhehodidọ tọn mítọn bo ko tẹnpọn nado sukúndona mí mlẹnmlẹn. Ṣogan, omẹ Jehovah tọn lẹ gbẹ́ pò to tenọgli yetọn go hẹn, bo to nukọnzindo nado dọyẹwheho madoalọte! Naegbọn akọta huhlọnnọ lẹ ma do penugo nado doalọtena azọ́n pipli pẹvi Klistiani ehelẹ tọn? Na Jehovah ko yí awà huhlọnnọ etọn do basi awọ̀yinu na mí wutu!—Psalm 17:7, 8.
16 Etẹwẹ dogbọn hihọ́ agbasa tọn dali to “nukunbibia daho” he ja lọ whenu? Mí ma dona dibuna whẹdida hinhẹnṣẹ Jiwheyẹwhe tọn gba. Na, Jehovah “yọ́n le e na whlẹn ayihawiwenọ lẹ do sọn whlepọn mẹ, bosọ yí mawadodonọ lẹ whla hlan whẹdazangbe nado doya na.” (Osọhia 7:14; 2 Pita 2:9) Ṣigba to alọnu din, mí sọgan tindo jide gando onú awe go. Tintan, Jehovah ma na dike devizọnwatọ nugbonọ etọn lẹ ni yin kúnsúdona sọn aigba ji gba. Awetọ, e na na ale ogbẹ̀ madopodo tọn tenọgligo-hẹntọ lẹ to aihọn yọyọ dodo tọn etọn mẹ—gbọn fọnsọnku gblamẹ, eyin e biọ domọ. Na mẹhe kú lẹ, fidepope ma tindo hihọ́ hú oflin Jiwheyẹwhe tọn he mẹ yé tin te.—Johanu 5:28, 29.
17. Nawẹ Jehovah nọ yí Ohó etọn do basi hihọ́na mí gbọn?
17 Jehovah tlẹ nọ basi hihọ́na mí todin gbọn “ohó” etọn gblamẹ, ehe tindo huhlọn mẹwhinwhàn tọn he nọ basi diọdo na ahun po gbẹzan gbẹtọvi lẹ tọn po. (Heblu lẹ 4:12) Gbọn nunọwhinnusẹ́n etọn lẹ yiyido-yizan mẹ dali, mí sọgan yin hihọ́-basina to aliho delẹ mẹ to agbasa-liho. “Yẹn wẹ OKLUNỌ, . . . he plọn we na ale,” wẹ Isaia 48:17 dọ. Matin ayihaawe, gbẹninọ sọgbe hẹ Ohó Jiwheyẹwhe tọn sọgan hẹn agbasalilo mítọn pọnte bo na hẹn mí dọ́jì. Di apajlẹ, na míwlẹ nọ hodo ayinamẹ Biblu tọn he jẹagọdo galilọ po hẹnflu agbasa tọn po wutu, mí nọ dapana walọ mawé po awugblenamẹ tọn lẹ po he nọ hẹn gbẹzan mẹylankan susu tọn gble. (Owalọ lẹ 15:29; 2 Kọlintinu lẹ 7:1) Lehe mí yọ́n pinpẹn hihọ́ he Ohó Jiwheyẹwhe tọn nọ basi na mí tọn do sọ!
Jehovah Nọ Basi Hihọ́na Mí to Gbigbọ-Liho
18. Hihọ́ gbigbọmẹ tọn tẹwẹ Jehovah nọ basi na mí?
18 Dehe yin nujọnu hugan wẹ yindọ, Jehovah nọ basi hihọ́na mí to gbigbọ-liho. Jiwheyẹwhe owanyinọ mítọn nọ basi hihọ́na mí sọn owù gbigbọmẹ tọn mẹ gbọn awuwiwlena nuhe mí tindo nuhudo etọn lẹ dali nado sọgan doakọnna whlepọn lẹ bo zindonukọn to haṣinṣan mítọn hẹ ẹ mẹ. Gbọnmọ dali, Jehovah nọ yinuwa nado whlẹn ogbẹ̀ mítọn, e mayin na owhe vude poun gba ṣigba kakadoi. Gbadopọnna awuwledainanu Jiwheyẹwhe tọn delẹ he sọgan basi hihọ́na mí to gbigbọ-liho.
19. Nawẹ gbigbọ wiwe Jehovah tọn sọgan gọalọna mí nado pehẹ whlepọn depope he pannukọn mí gbọn?
19 Jehovah wẹ “nọ sè odẹ̀.” (Psalm 65:2) To whenuena nuhahun gbẹ̀mẹ tọn lẹ to kọgbidinamẹ, hùnhùn ahun mítọn na ẹn to odẹ̀ mẹ sọgan hẹn kọgbọ susu wá na mí. (Filippinu lẹ 4:6, 7) E sọgan nọ ma de whlepọn lọ lẹ sẹ̀ to azọ́njiawu-liho, ṣigba to gblọndo mẹ na odẹ̀ sọn ahun mẹ wá mítọn, e sọgan na mí nuyọnẹn he mí na yí do pehẹ ẹ. (Jakobu 1:5, 6) Humọ, Jehovah nọ na gbigbọ wiwe hlan mẹhe to bibiọ ẹ lẹ. (Luku 11:13) Gbigbọ huhlọnnọ mọnkọtọn sọgan gọalọna mí nado pehẹ whlepọn kavi nuhahun depope he sọgan pannukọn mí. E sọgan na mí ‘huhlọn he hú jọwamọ tọn’ nado doakọnna kakajẹ whenue Jehovah na de nuhahun lẹpo sẹ̀ to aihọn yọyọ he ko to yakẹ lọ mẹ.—2 Kọlintinu lẹ 4:7.
20. Nawẹ huhlọn hihọ́-basinamẹ Jehovah tọn sọgan yin didohia gbọn sinsẹ̀n-basitọ hatọ mítọn lẹ gblamẹ gbọn?
20 To ojlẹ delẹ mẹ, huhlọn hihọ́-basinamẹ Jehovah tọn sọgan yin didohia gbọn sinsẹ̀n-basitọ hatọ mítọn lẹ gblamẹ. Jehovah ko kọ̀n omẹ etọn lẹ dopọ do ‘gbẹdido mẹmẹsunnu lẹ tọn’ lẹdo aihọn pé de mẹ. (1 Pita 2:17; Johanu 6:44) To owanyi mẹmẹsunnu-yinyin tọn ehe mẹ, mí nọ mọ kunnudenu he họnwun lehe huhlọn gbigbọ wiwe Jiwheyẹwhe tọn nọ yinuwado gbẹtọ lẹ ji to aliho dagbe mẹ do tọn. Gbigbọ enẹ nọ wleawuna sinsẹ́n dagbe, po jẹhẹnu he họakuẹ lẹ po to mí mẹ taidi owanyi, homẹdagbe, po dagbewà po. (Galatianu lẹ 5:22, 23) Enẹwutu, eyin mí tindo ayimajai bọ mẹmẹsunnu hatọ de ze afọdide nado na mí ayinamẹ alọgọnamẹ tọn kavi dọ ohó tulinamẹ tọn delẹ na mí, mí sọgan dopẹna Jehovah na hogbe hihọ́-basinamẹ tọn etọn lẹ.
21. (a) Núdùdù gbigbọmẹ tọn he wá do ganmẹ tẹwẹ Jehovah nọ wleawuna gbọn “afanumẹ nugbonọ, nuyọnẹntọ” lọ gblamẹ? (b) Nawẹ hiẹ lọsu titi ko mọaleyi sọn nuhe Jehovah wleawuna nado basi hihọ́na mí to gbigbọ-liho lẹ mẹ gbọn?
21 Onú devo he Jehovah nọ wleawuna nado basi hihọ́na mí wẹ: núdùdù gbigbọmẹ tọn to osaa sisọ mẹ. Jehovah ko deazọ́nna “afanumẹ nugbonọ, nuyọnẹntọ” lọ nado na mí núdùdù gbigbọmẹ tọn, ehe na gọalọna mí nado mọ huhlọn yí sọn Ohó etọn mẹ. Afanumẹ nugbonọ lọ nọ yí owe lẹ, gọna linlinnamẹwe Atọ̀họ̀-Nuhihọ́ Lọ Tọn po Réveillez-vous! po zan. Humọ, yé sọ nọ yí opli lẹ po plidopọ lẹ po zan nado na mí “núdùdù . . . to osaa sisọ mẹ”—kavi nuhe mí tindo nuhudo etọn lẹ, to whenue mí tindo nuhudo etọn pẹpẹ. (Matiu 24:45) Be a ko sè nudọnamẹ de to opli Klistiani tọn de ji, to gblọndo de mẹ, to hodidọ de mẹ, kavi etlẹ yin to odẹ̀ mẹ, he na we huhlọn podọ tuli he a tindo nuhudo etọn lọ pẹpẹ pọ́n gbede ya? Be hosọ he yin zinzinjẹgbonu to linlinnamẹwe mítọn lẹ mẹ de ko yinuwado gbẹzan towe ji pọ́n gbede ya? Flindọ, Jehovah wẹ wleawuna onú ehe lẹpo nado sọgan basi hihọ́na mí to gbigbọ-liho.
22. Aliho tẹmẹ wẹ Jehovah nọ yí huhlọn etọn zan to whepoponu te, podọ naegbọn enẹ nọ yin na dagbe mítọn?
22 Na jide tọn, Jehovah yin awọ̀yinu de na “yé he dín fibẹtado to e mẹ lẹ.” (Psalm 18:30) Mí mọnukunnujẹemẹ dọ e ma nọ yí huhlọn etọn zan nado basi hihọ́na mí sọn nugbajẹmẹji lẹpo mẹ todin gba. Ṣigba, e nọ yí huhlọn hihọ́-basinamẹ tọn etọn zan to whepoponu nado hẹn lẹndai etọn di. To godo mẹ, enẹ lọ wẹ nọ yin dagbe na omẹ etọn lẹ. Eyin mí dọnsẹpọ Jehovah bo gbọṣi owanyi etọn mẹ, e na na mí ogbẹ̀ pipé mavọmavọ. Po nukundido enẹ po to ayiha mẹ, mì gbọ mí ni pọ́n yajiji depope to titonu ehe mẹ hlan taidi “nukunwhiwhe dopo” tọn.—2 Kọlintinu lẹ 4:17.
