NUDỌNAMẸ DOGỌ
Be Mí Dona Basi Hùnwhẹ Whedudu Tọn lẹ Wẹ Ya?
BIBLU ma yin dodonu na hùnwhẹ sinsẹ̀n tọn lẹ po whedudu aihọn tọn lẹ po he gbayipe to fisusu to egbehe gba. To whelọnu lo, etẹwẹ yin dodonu hùnwhẹ mọnkọtọn lẹ tọn? Eyin hiẹ penugo nado basi dodinnanu to wesẹdotẹn de, homẹ towe na hùn nado doayi nuhe owe alọdlẹndonu tọn lẹ dọ gando hùnwhẹ he gbayipe to lẹdo towe mẹ lẹ go. Gbadopọnna apajlẹ kleun delẹ.
Paaki. Otanwe lọ The Encyclopædia Britannica dọmọ: “Fidepope ma tin to Alẹnu Yọyọ mẹ he dọho gando hùnwhẹ Paaki tọn go.” Nawẹ Paaki bẹjẹeji gbọn? E wá sọn sinsẹ̀n kosi tọn mẹ. Dile etlẹ yindọ yé dọ dọ oflin fọnsọnku Jesu tọn wẹ hùnwhẹ lọ yin, nuwiwa po aṣa lẹ po he nọ zọnpọ hẹ ojlẹ Paaki tọn ma sọgbe na Klistiani lẹ gba. Di dohia, gando “azui Paaki tọn” he nọ yin yiyizan gbayipe lọ go, otanwe The Catholic Encyclopedia dọmọ: “Azui lọ yin ohia kosi tọn podọ ko yin yẹhiadonu vijiji tọn de to whepoponu.”
Hùnwhẹ Owhe Yọyọ Tọn. Azán po aṣa he nọ zọnpọ hẹ hùnwhẹ Owhe Yọyọ tọn lẹ po nọ gbọnvo sọn otò de mẹ jẹ devo mẹ. Gando dodonu hùnwhẹ ehe tọn go, otanwe The World Book Encyclopedia dọmọ: “Togán Lomu tọn Jules César ze 1er janvier dai taidi Azán Owhe Yọyọ tọn to 46 J.W.M. Lomunu lẹ klan azán ehe do wiwe hlan Janus, yẹwhe họngbo lẹ tọn, ohọ̀n lẹ tọn, po bẹjẹeji lẹ tọn po. Janus mẹ wẹ oyín osun janvier tọn wá sọn, yèdọ yẹwhe de he tindo nukunmẹ awe—dopo pànta nukọn podọ awetọ pọ́n godo.” Enẹwutu hùnwhẹ Owhe Yọyọ tọn bẹjẹeji sọn aṣa kosi tọn lẹ mẹ.
Halloween [he nọ yin bibasi to azán he jẹnukọnna Hùnwhẹ Mẹwiwe lẹ tọn]. Otanwe The Encyclopedia Americana dọmọ: “Aṣa he nọ zọnpọ hẹ hùnwhẹ Halloween tọn lẹ nọ sọgbe hẹ nuhe nọ yin wiwà to hùnwhẹ druide [yẹwhenọduta omẹ hohowhenu Celte tọn] tọn lẹ mẹ jẹnukọnna ojlẹ Klistiani tọn. Omẹ Celte tọn lẹ nọ basi hùnwhẹ na yẹwhe nukundeji awe—yẹwhe owhè tọn po yẹwhe oṣiọ tọn po . . . , ehe sin hùnwhẹ nọ yin bibasi to 1er novembre, bẹjẹeji Owhe Yọyọ Celte lẹ tọn. Gbọnmọ dali hùnwhẹ bibasi hlan oṣiọ lẹ yin hinhẹn biọ nuwiwa Klistiani tọn mẹ vudevude.”
Hùnwhẹ Devo lẹ. E ma sọgan yọnbasi nado dọhodo hùnwhẹ he nọ yin bibasi lẹdo aihọn pé lẹpo ji gba. Ṣigba, Jehovah ma nọ kẹalọyi hùnwhẹ he nọ pagigona gbẹtọvi lẹ kavi titobasinanu gbẹtọ tọn lẹ gba. (Jẹlemia 17:5-7; Owalọ lẹ 10:25, 26) Flin ga, dọ dodonu hùnwhẹ sinsẹ̀n tọn lẹ wẹ na dohia vlavo eyin yé nọ hẹn homẹhun Jiwheyẹwhe kavi lala. (Isaia 52:11; Osọhia 18:4) Nunọwhinnusẹ́n Biblu tọn he yin nùdego to Weta 16tọ owe ehe tọn mẹ lẹ na gọalọna we nado yọ́n nukun he Jiwheyẹwhe nọ yí do pọ́n mahẹ tintindo to hùnwhẹ paa he ma sọgbe lẹ mẹ.
