Whlasusu wẹ omẹ Juda tọn lẹ nọ jo Jehovah do bo nọ sẹ̀n yẹwhe lalo lẹ. Na owhe susu, Jehovah zindonukọn nado to alọgọna yé. E do yẹwhegán susu hlan nado na yé avase, amọ́ yé ma nọ dotoai. Kakatimọ, yé nọ ṣàn yẹwhegán lọ lẹ kò. Nawẹ Jehovah na doalọtena boṣiọ-sinsẹ̀n yetọn gbọn?

Ahọlu Babilọni tọn, Nẹbukadnẹzali, to awhàn akọta lẹ tọn gbà debọdo-dego. Whla tintan he e gbawhàn Jelusalẹm tọn, e wle Ahọlu Jehoiakini, ahọvi lẹ, awhànfuntọ lẹ po anazọ́nwatọ lẹ po bo bẹ yemẹpo yì Babilọni. E sọ bẹ adọkunnu he tin to tẹmpli Jehovah tọn mẹ lẹpo yì. Enẹgodo, Nẹbukadnẹzali yí Zedekia do doahọlu do Juda ji.

To bẹjẹeji, Zedekia nọ setonuna Nẹbukadnẹzali. Ṣigba, akọta he sẹpọ yé lẹ po yẹwhegán lalo lẹ po na ayinamẹ Zedekia nado diọnukunsọ Babilọni. Jelemia na ẹn avase dọmọ: ‘Eyin a diọnukun, mẹhuhu, huvẹ po azọ̀n po na hẹnnugble to Juda.’

To whenue Zedekia ko dugán na owhe ṣinatọ̀n godo, e de nado diọnukunsọ Babilọni. E biọ alọgọ awhànpa Egipti tọn. To whenẹnu, Nẹbukadnẹzali do awhànpa etọn hlan nado tọ́nawhàn Jelusalẹm, bọ yé dosla lẹdo tòdaho lọ. Jelemia sọ dọna Zedekia dọmọ: ‘Jehovah dọ dọ eyin a jo dewe do alọmẹ na Babilọni, hiẹ po tòdaho lọ po na yin whinwhlẹngán. Amọ́ eyin a gbẹ́, Babilọninu lẹ na domiyọ́n Jelusalẹm bo na wle we taidi gàntọ.’ Zedekia gblọn dọmọ: ‘N’ma na jo dee do alọmẹ na yé!’

 To owhe dopo daa godo, awhànpa Babilọni tọn gbà adó Jelusalẹm tọn lẹ bo biọ e mẹ bosọ domiyọ́n tòdaho lọ. Yé fiọ tẹmpli lọ bo hù mẹsusu bosọ bẹ omẹ fọtọ́n susu yì taidi gàntọ.

Zedekia họ̀n sọn Jelusalẹm, ṣigba Babilọninu lẹ dómọna ẹn. Yé wá wle e sẹpọ Jẹliko bo plan ẹn sọyi Nẹbukadnẹzali dè. Ahọlu Babilọni tọn hù visunnu Zedekia tọn lẹ to nukun etọn mẹ. Enẹgodo, Nẹbukadnẹzali tọ́nnukunna Zedekia bo ze e do gànpamẹ, fihe e wá kú do to godo mẹ. Ṣigba, Jehovah dopà na omẹ Juda tọn lẹ dọ: ‘To owhe 70 godo, yẹn na hẹn mì lẹkọyi Jelusalẹm.’

Etẹwẹ na jọ do jọja he yin bibẹ yì Babilọni taidi gàntọ lẹ go? Be yé na gbẹ́ yin nugbonọ na Jehovah ya?