“Mì wá dè e, mì mẹhe tin to magbọjẹ mẹ bọ yè doagban pinpẹn na lẹpo, yẹn nasọ fakọna mì. Mì yí zẹgẹ ṣie do okọ̀ mìtọn bosọ plọnnu sọn dè e, na homẹmimiọnnọ po whiwhẹnọ to ahun mẹ po wẹ yẹn, mìwlẹ nasọ mọ kọfanamẹ na mìde. Na zẹgẹ ṣie bọawu bọ agbàn ṣie sọ fua.”—Matiu 11:28-30, Lẹdogbedevomẹ Aihọn Yọyọ Tọn.

 “Mì wá dè, mì he to tuklajẹ, bọ yè doagban pinpẹn na lẹ, yẹn nasọ na gbọjẹ mì. Mì yí zẹgẹ ṣie do okọ̀ mìtọn, na mì nisọ plọn nupinplọn ṣie: na homẹmimiọnnọ podọ ayiha whiwhẹnọ wẹ yẹn: mì nasọ mọ gbọjẹ hlan alindọn mìtọn lẹ. Na zẹgẹ ṣie bọawu, agbàn ṣie sọ fua.”—Matiu 11:28-30, Biblu Wiwe lọ—Gun Alada.

 Jesu to mẹhe to ohó etọn sè lẹ ylọ dọ yé ni wá emi dè. E to tulina yé dọ, eyin yé plọnnu sọn emi dè, yé na mọ pọngbọ bo vọ́ huhlọn mọyi.

 “Mì wá dè e, mì mẹhe tin to magbọjẹ mẹ bọ yè doagban pinpẹn na lẹpo.” Sinsẹ̀ngán lẹ ko yí gbedide po aṣa he gbẹtọ lẹ doai lẹ po do “doagban pinpẹn na” mẹhe Jesu to oylọ basina lọ lẹ. (Matiu 23:4; Malku 7:7) Omẹ ehelẹ sọ dona wazọ́n susu whẹpo do mọ nuhe sin hudo yé do taun lẹ. Ehe yin agbàn bo to kọ̀ji na yé bosọ nọ do lẹnpọn na yé.

 “Yẹn nasọ fakọna mì.” Jesu dopà dọ emi na de agbàn he to kọ̀ji na mẹhe kẹalọyi oylọ emitọn lẹ sẹ̀. E wàmọ to whenue e gọalọna yé nado yọ́n nuhe Jiwheyẹwhe jlo dọ yé ni wà taun lẹ. (Matiu 7:24, 25) Enẹ yinyọnẹn zọ́n bọ yé vò sọn linlẹn agọ̀ po aṣa sinsẹ̀n tọn he ma sọgbe bo yin agbàn to kọ̀ji na yé lẹ po si. (Johanu 8:31, 32) Nugbo wẹ dọ e nọ biọ vivẹnudido nado plọn bosọ wànu sọgbe hẹ nuhe Jesu plọnmẹ lẹ. Amọ́, eyin mí wàmọ, mí na mọ kọfanamẹ.

 “Mì yí zẹgẹ ṣie do okọ̀ mìtọn bosọ plọnnu sọn dè e.” To ojlẹ he mẹ yè kan Biblu te, azọ́nwatọ lẹ nọ saba yí zẹgẹ lẹ zan, enẹ wẹ opò he yè nọ zedo abọ́ ji do hẹn agbàn pinpẹn lẹ. Enẹwutu, hogbe lọ “zẹgẹ” nọ zẹẹmẹdo nado nọ aṣẹpipa mẹde tọn glọ bo wà nuhe mẹlọ jlo lẹ. (Levitiku 26:13; Isaia 14:25; Jelemia 28:4) Hogbe lọ lẹ “plọnnu sọn dè e” gán sọ yin lilẹdo “lẹzun devi ṣie lẹ” kavi “lẹzun nuplọntọ ṣie lẹ.” E dohia dọ Jesu to tulina mẹhe to todoaina ẹn lẹ dọ yé ni hodo emi bo lẹzun devi emitọn lẹ bosọ nọ wanu di emi.—Johanu 13:13-15; 1 Pita 2:21.

 “Mìwlẹ nasọ mọ kọfanamẹ na mìde.” Jesu ma to didọna mẹhe to todoaina ẹn lẹ dọ nuhahun yetọn lẹpo na gbọ̀ hadopo lọ gba. Amọ́, e miọnhomẹna yé bosọ gọalọna yé nado mọdọ todido tin. (Matiu 6:25-32; 10:29-31) Mẹhe lẹzun devi etọn bo kẹalọyi nuplọnmẹ etọn lẹ nọ mọdọ Jiwheyẹwhe sinsẹ̀n ma vẹawu gbau. Yé nọ mọdọ e nọ zọ́n bọ emi nọ do ayajẹ nujọnu tọn.—1 Johanu 5:3.

 “Na zẹgẹ ṣie bọawu bọ agbàn ṣie sọ fua.” Jesu gbọnvona sinsẹ̀ngán azán etọn gbè tọn lẹ, na e nọ whiwhẹ ede bosọ yin homẹmimiọnnọ. (Johanu 7:47-49) E ma nọ ylanhùn kavi gbidikọnamẹ gbede. Kakatimọ, e nọ bọawuna mẹlẹ nado wá e dè na e jọ̀-gbẹtọ wutu. E ma nọ donukun dọ hodotọ etọn lẹ ni wà nue go yé ma pé. (Matiu 7:12; Malku 6:34; Luku 9:11) E sọ plọn yé nue yé gán wà bọ Jiwheyẹwhe nado do lẹblanu hia yé, gọna ale he yé na mọ eyin yé plọn ayiha yetọn nado nọ yọ́n dagbe dovo na oylan. (Matiu 5:23, 24; 6:14) Jijọ dagbedagbe Jesu tọn lẹ zọ́n bọ gbẹtọ lẹ nọ dọnsẹpọ ẹ, yé nọ kẹalọyi zẹgẹ etọn he bọawu bosọ nọ lẹzun devi etọn lẹ.

 Jesu dọ nuhe to Matiu 11:28-30 mẹ lẹ whenue e to wẹndagbe lá to Galili to owhe 31 W.M. Apọsteli Matiu kẹdẹ wẹ yin wẹndagbe-kantọ he dọhodo oylọ Jesu tọn enẹ ji. Tòkuẹ wẹ Matiu nọ ṣinyan dai bosọ yin Ju de, enẹwutu e yọ́n lehe takuẹ Lomu tọn súsú po sinsẹ̀n Ju lẹ tọn he ma nọ plọnmẹ nugbo po yin agbàn bo to kọji na akọta lọ do. Abajọ, ayiha etọn do jai to whenue e mọ bọ Jesu nọ yí aṣẹpipa he Otọ́ etọn, Jehovah, a na ẹn zan nado ylọ whiwhẹnọ lẹ po mẹhe yè to kọgbidina lẹ po wá ede dè.—Matiu 11:25-27.

 Wẹndagbe Matiu tọn zinnudo jijọ dagbedagbe Jesu tọn lẹ ji, enẹ wẹ jẹhẹnu he e na dohia lẹ taidi Mẹsia dopagbe lọ podọ to whenue e na wá lẹzun ahọlu Ahọluduta Jiwheyẹwhe tọn.—Matiu 1:20-23; Isaia 11:1-5.

 Pọ́n video kleun ehe nado mọ nue to owe Matiu tọn mẹ delẹ.