Mọwẹ. Ayinamẹ nuyọnẹn tọn sinai do Biblu ji delẹ die he ko gọalọna sunnu po yọnnu po livi susu nado tindo ayajẹ to whẹndo mẹ:

1.   Wlealọ sọgbe hẹ osẹ́n. Gbemima nado nọpọ́ sọyi gbọn alọwiwle sọgbe hẹ osẹ́n dali wẹ yin dodonu lọ nado tindo ayajẹ to whẹndo mẹ.—Matiu 19:4-6.

2.   Nọ do owanyi po sisi po hia. Ehe biọ dọ a ni nọ yinuwa hẹ alọwlemẹ towe dile a jlo dọ e ni nọ yinuwa hẹ we do.—Matiu 7:12; Efesunu lẹ 5:25, 33.

3.   Nọ dapana hogbe sinsinyẹn lẹ. Nọ dọho po homẹdagbe po, etlẹ yin to whenue alọwlemẹ towe dọ nude kavi wà nude he gbleawuna we. (Efesunu lẹ 4:31, 32) Dile Biblu dọ do to Howhinwhẹn lẹ 15:1 mẹ: “Gblọndo he yin nina po ogbè dẹẹdẹ po nọ lilẹ́ adi sẹ̀, ṣigba, hogbe kàunkàun nọ fọ́n homẹgble dote.”

4.   Nọ yin nugbonọ na alọwlemẹ towe. Ma nọ yí hogbe owanyi tọn lẹ zan kavi tindo ojlo zanhẹmẹ tọn na mẹde blo, adavo alọwlemẹ towe kẹdẹ. (Matiu 5:28) Biblu dọmọ: “Mì gbọ alọwle ni tindo gbégbò to nukun mẹlẹpo tọn mẹ, podọ adọzan alọwle tọn yin hinhẹnflu blo.”—Heblu lẹ 13:4.

5.   Nọ plọn ovi towe lẹ po owanyi po. Dapana alọjodokọjinamẹ po hùnyinylan po.—Howhinwhẹn lẹ 29:15; Kolosinu lẹ 3:21.