Sang Hulyo 2019, isa ka bag-o nga Bible museum ang ginbuksan sa sanga talatapan sang mga Saksi ni Jehova sa Scandinavia, nga ara sa Holbæk, Denmark, nga mga 65 kilometros halin sa Copenhagen. Ang tema sang museum amo ang “The Bible and the Divine Name in Scandinavia.”

Makita sa sini nga museum ang pinasahi nga koleksion sang mga talagsahon kag importante nga mga Biblia sa lenguahe nga Danish, Faeroese, Greenlandic, Icelandic, Norwegian, Saami, kag Swedish. Sobra sa 50 ka Biblia ang nakadispley diri.

Ang isa sa pinakaimportante nga Biblia nga nakadispley diri amo ang orihinal nga 1541 Gustav Vasa Bible. Amo ini ang una nga kompleto nga Biblia nga na-translate sa isa ka lenguahe sa Scandinavia. Ang Gustav Vasa Bible amo ang basihan sang grammar kag bokabularyo sang Swedish nga lenguahe. Kag nangin basihan man ini sang iban pa nga translation sang Biblia sa Swedish sa sulod sang 300 ka tuig.

Makita man sa sini nga displey ang 1550 Christian III Bible. Amo ini ang una nga kompleto nga translation sang Biblia sa Danish. Ginhimo ini nga basihan sang Danish nga lenguahe kag talalupangdon ang nangin epekto sini sa daku nga bahin sang Northern Europe.

Si Erik Jørgensen halin sa sanga sang Scandinavia, nagsiling: “Ginapakita sining bag-o nga Bible museum nga halin pa sadto, ginarespeto gid sa Scandinavia ang Pulong sang Dios kag ang iya halangdon nga ngalan, nga Jehova.”