LEKSION 05
Ang Biblia Mensahe sang Dios Para sa Aton
Si Jehova naghatag sa aton sing manami nga regalo—ang 66 ka libro nga gintingob sa isa lang ka libro. Amo ini ang Biblia. Pero mahimo mamangkot ka: ‘Sa diin naghalin ang Biblia? Sin-o ang awtor sini?’ Para masabat ini nga mga pamangkot, hibalua kon paano ang mensahe sang Dios sa Biblia nakalab-ot sa aton.
1. Kon mga tawo ang nagsulat sang Biblia, ngaa makasiling kita nga naghalin ini sa Dios?
Mga 40 ka tawo ang nagsulat sang Biblia sa sulod sang mga 1,600 ka tuig, halin sang 1513 B.C.E. asta sang mga 98 C.E. Lainlain ang nagsulat sini, may manugbantay sang karnero, mangingisda, kag hari. Pero ang ila mga ginsulat nagasanto gid. Ngaa? Kay ang Dios ang nagpasulat sang Biblia. (Basaha ang 1 Tesalonica 2:13.) Wala ginsulat sang mga tawo ang ila ideya, “kundi ang ginhambal [nila] naghalin sa Dios samtang ginapahulag sila sang balaan nga espiritu.” a (2 Pedro 1:21) Gingamit sang Dios ang iya balaan nga espiritu para giyahan ang mga tawo nga isulat ang iya panghunahuna.—2 Timoteo 3:16.
2. Sin-o ang makabenepisyo sa Biblia?
Ang mga tawo sa “tagsa ka pungsod kag tribo kag hambal kag katawhan” makabenepisyo sa maayong balita nga mabasa sa Biblia. (Basaha ang Bugna 14:6.) Ginsigurado sang Dios nga ang Biblia mabasa sa pinakamadamo nga lenguahe. Gani halos tanan subong makabasa sang Biblia, diin man sila nga lugar ukon ano man ang ila lenguahe.
3. Ano ang ginhimo ni Jehova para makalab-ot sa aton ang Biblia?
Ang Biblia ginsulat sa mga materyal nga wala nagadugay. Pero maayo lang kay gin-utihan gid ini kopya sang mga tawo nga nagapabalor sa Biblia. Bisan pa gintinguhaan gid sang impluwensiado nga mga tawo nga dulaon ang Biblia, may iban nga handa mapatay para proteksionan ini. Wala gid sing makapugong kay Jehova nga mapalab-ot niya sa aton ang iya mensahe. Ang Biblia nagasiling: “Ang pulong sang aton Dios nagapadayon sa wala sing katubtuban.”—Isaias 40:8.
USISAA PA GID
Hibaluon naton kon paano gingiyahan sang Dios ang mga tawo sa pagsulat sang Biblia, kon paano niya ini ginproteksionan, kag kon paano ini nakalab-ot sa aton subong.
4. Ginasugid sang Biblia kon sin-o ang Awtor sini
Tan-awa ang VIDEO. Dayon basaha ang 2 Timoteo 3:16, kag binagbinaga ang masunod nga mga pamangkot.
-
Kon mga tawo ang nagsulat sang Biblia, ngaa gintawag ini nga Pulong sang Dios?
-
Sa banta mo, posible ayhan nga masugid sang Dios ang iya panghunahuna sa mga tawo nga nagsulat sang Biblia?
Ang sekretaryo ang nagahimo sang sulat, pero ang mensahe sini halin sa tawo nga nagadikta sa iya. Mga tawo man ang nagsulat sang Biblia, pero ang mensahe sini halin sa Dios
5. Nakalampuwas ang Biblia
Ang Biblia halin sa Dios, gani mapaabot naton nga proteksionan niya ini. Gintinguhaan sang impluwensiado nga mga tawo nga dulaon ang Biblia. Indi gusto sang mga lider sang relihion nga mabasa ini sang mga tawo. Pero madamo ang handa nga mapatay para proteksionan ang Biblia. Hibalua ang isa nga naghimo sini. Tan-awa ang VIDEO, dayon binagbinaga ang masunod nga mga pamangkot.
-
Bangod nabal-an mo subong nga madamo ang handa nga mapatay para proteksionan ang Biblia, nangin interesado ka pa gid bala nga basahon ini? Ngaa?
Basaha ang Salmo 119:97, dayon binagbinaga ini nga pamangkot:
-
Ngaa madamo nga tawo ang handa nga mapatay para ma-translate kag mapanagtag ang Biblia?
6. Libro para sa tanan nga tawo
Ang Biblia amo ang may pinakamadamo nga translation kag nahimo nga kopya sa kasaysayan. Basaha ang Binuhatan 10:34, 35, dayon binagbinaga ini nga mga pamangkot:
-
Ngaa gusto sang Dios nga ang iya Pulong ma-translate sa madamo nga lenguahe kag madamo ang makabasa sini?
-
Ano ang nanamian mo gid parte sa Biblia?
Halos
100%
sang populasyon sang kalibutan
ang may Biblia sa lenguahe nga ila maintiendihan
Mabasa sa sobra
3,000
ka lenguahe
ang bilog nga Biblia ukon ang bahin sini
5,000,000,000
Ang ginabulubanta nga kadamuon sang nahimo nga kopya,
kag wala sing iban nga libro ang makalabaw sa sini
KON MAGSILING ANG IBAN: “Ang Biblia daan na nga libro kag tawo man lang ang nagsulat.”
-
Ano ang isabat mo?
-
Ano ang ebidensia nga ang Biblia Pulong sang Dios?
SUMARYO
Ang Biblia Pulong sang Dios, kag ginsigurado niya nga mabasa ini sang tanan nga tawo.
Rebyu
-
Ano ang buot silingon nga gingiyahan sang Dios ang mga tawo sa pagsulat sang Biblia?
-
Ano ang masiling mo sa Biblia kon parte sa inagihan sini, sa translation, kag sa nahimo nga mga kopya?
-
Ano ang imo ginabatyag kay ginatinguhaan gid sang Dios nga ipalab-ot ang iya mensahe sa imo?
DUGANG NGA IMPORMASYON
Basaha kon paano ang Biblia nakalab-ot sa aton halin sa daan nga mga manuskrito asta sa bag-o nga mga translation.
“Kon Paano Nakalab-ot ang Biblia Tubtob sa Aton Adlaw” (Magmata!, Nobiembre 2007)
Hibalua kon paano nakalampuwas ang Biblia bisan pa sang tatlo ka rason nga mahimo magdula sini.
“Ang Biblia—Kon Paano Ini Nakalab-ot sa Aton” (Ang Lalantawan Num. 4 2016)
Tan-awa kon ano ang ginrisgo sang mga tawo para ma-translate ang Biblia.
Ang Biblia sulitsulit nga ginkopya kag gin-translate sing madamo nga beses. Paano ka makasiguro nga wala nagbag-o ang mensahe sini?
“Gin-islan Bala Ukon Ginbag-o ang Biblia?” (Artikulo sa website)
a Matun-an sa Leksion 07 nga ang balaan nga espiritu amo ang aktibo nga puersa sang Dios.
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
