Pagbantay sa Kalibutan

Ginbaton na sang Serbian Ministry of Religious Affairs ang aplikasyon nga marehistro ang legal nga organisasyon nga nagarepresentar sa mga Saksi ni Jehova. Suno sa rekord sang gobierno, may mga Saksi ni Jehova na sa amo nga lugar sugod pa sang mga 1930.

Ginabulubanta nga sa bilog nga kalibutan, ilegal ang 95 porsiento sang gin-download nga musika sang 2009.—TIME, U.S.A.

Linog—“Ang Pinakamakamamatay nga Kalamidad”

“Sang nagligad nga dekada, ang linog amo ang pinakamakamamatay nga kalamidad,” siling sang United Nations International Strategy for Disaster Reduction, sa Geneva, Switzerland. Sang nagligad nga napulo ka tuig, sobra sa 780,000 ang napatay sa 3,852 ka lainlain nga kalamidad. Mga 60 porsiento sa sini ang napatay sa linog. Ining “natural nga katalagman” delikado gid kay may 8 sa 10 ka siudad nga may pinakamadamo nga populasyon ang ara nayon sa ginaagyan sang linog.

Delikado nga Obra

“Sang 2009, may 110 ka reporter nga ginpatay bangod sa ila obra, kag amo ini ang pinakamakamamatay nga tuig sa nagligad nga dekada” para sa mga reporter, siling sang International Press Institute, sa Vienna, Austria. Sa sini lang nga tinuig, “ginatarget gid ang mga reporter” sa magamo nga mga pungsod pareho sang Afghanistan, Iraq, Pakistan, kag Somalia, siling sang report. Bangod sini, nagdiutay ang mga coverage sang media kag ‘indi na mabal-an ang matuodtuod nga natabo’ sa sini nga mga lugar. Ang Iraq amo ang pinakadelikado nga pungsod para sa mga reporter sang nagligad nga dekada. Ginasundan ini sang Pilipinas, Colombia, Mexico, kag Rusya.

Baratuhon nga Produkto, Nagpadiutay sa Pagpangawat

Mahimo wala na sing kalawaton ang mga kawatan sa Britanya kay “nagdagsa ang baratuhon nga elektroniko nga mga gamit,” siling sang manunudlo sa criminology nga si James Treadwell sang University of Leicester, England sa report sang Reuters sa London. Halimbawa, bangod puerte ka barato sang bag-o nga mga DVD player, halos indi na ini mabaligya pa liwat. ‘Indi na ini mapuslan kon kawaton,’ siling ni Treadwell. Pero, wala sini napauntat ang krimen. Ginatarget naman subong sang mga kawatan ang malahalon kag mahapos ibaligya nga mga butang ‘pareho sang mga cell phone kag iPod, nga ginadala pirme sang mga tawo.’ Ang mga nagpangawat sa mga balay sang una, nagapang-hold-up na subong ukon nagapang-snatch.